Cu tur atardi na Aruba ta magico no tin duda, pero un atardi riba beach di Atardi Restaurant c’un chef poseedor di 2 strea Michelin pa su abilidad culinario a pasa tur limite di exclusividad y perfeccion.
Xclusivo Magazine tabatin e honor di a keda invita pa sinta na mesa di gerencia di Marriott Aruba Resort & Stellaris Casino como invitado pa experencia un biahe culinario unico riba beach di Aruba. Esaki tabata e prome di dos evento organisa cu Chef Francois Geurds na Aruba den un tremendo evento Micheline Pop-Up, cu tabata sold out. Nos a sinta hunto cu otro 70 huespuednan cu a saborea un nivel culinario unico, pareu cu e bahada di solo y anochi cu streanan como decoracion unico di e evento cu musica pa Serghio Jansen, creando e vibe perfecto.
Nos ta comparti cu boso, nos experiencia di e biahe culinario mahestuoso aki.
Chef Francois Geurds, e forsa tras di e evento excepcional aki, ta propietario di e restaurant FG Restaurant na Rotterdam. E restaurant prestigioso aki a gana un strea Michelin di 2010 te 2013 y a subi pa 2 strea desde 2014. E cede culinario aki tin hopi premio desde cu el a habri su portanan. Loke ta haci Chef Geurds mas special ainda pa nos na Aruba, ta su ‘roots’ cu ta conect’e cu nos isla; su mama ta di Aruba y ta un influencia crucial den su pasion y amor pa su abilidad y arte culinario di awe.
Chef Francois Geurds
Chef Francois Geurds
"Mi mama tabata stima cushina. For di hoben, su pasion pa cushina y exploracion di sabornan a cautivami. Mi tabata sinta dilanti e forno ta puntra mi mes kico ta pasando eyden. Mi tabatin e deseo pa siña cushina, pa comprende e magia y pa domina e tecnicanan culinario."
No menos cu 70 huesped fortuna tabata e promenan pa disfruta di e magia di Chef Francois Geurds. Na yegada, tur a keda invita pa kita sapato, relaha y prepara pa un velada unico. Sinta na mesa riba beach, cu dedenan den santo blanco y un bista pa e bahada di solo cu tabata asercando, e biahe yena di sabor a cuminsa.
Nos tabata entusiasma pa sa kico tur tabata spera nos. E anochi a cuminsa c’un amuse di macaroon Frances di beets cu galiña den forma di mouse y piel crocante ariba. Un prome sorpresa eskisito di un combinacion no spera. Den un ‘twist’ sorprendente, a sigui un sopi tradicional Arubano di Oyster den forma cremoso, complementa pa un oyster deeg yena poni riba chukulati blanco - kende lo por a imagina esey?
E biahe culinario a continua cu Ceviche di Bacalao cu tabata grita cu sabor y suavidad y un dushi carni stoba, ambos prepara cu e toke di strea Michelin. E Stoba, sigur tabata un punto culminante di e anochi, dunando honor na e raiz Arubano di Chef Francois Geurds. E climax tabata e postre di Bolo Preto, un version creativo di e bolo di casamento stima di nos isla, corona cu crème pâtissière y dorna c’un wafer y ijs cream. E suavidad y sabor di e dos pida di bolo preto tabata mas cu suficiente. Tabata simplemente, maestral. Nos no por bisa kico tabata mihor cu otro, paso tur cos tabata perfecto.
Sopi Oester
Sopi Oester
E pairing di biñanan di Pepia Est tabata 'magnifique' y perfectamente balansa. A cuminsa cu Champagne Tattinger Brut Reserve, y despues a bai pa biña di Francia, Spaña, y Merca. ASD a percura cu cada caracter di biña keda accentua y sirbi den e glas perfecto. Platonan y cubierto a añadi na e elegancia di e anochi hunto cu e servicio cu tabata simplemente ‘on point’.
Cada huesped a ricibi un carta for di e chef, reflehando su respet profundo pa Aruba, dunando redito na e herencia y recetanan di su mama. Su invitacion pa come na su restaurant na Rotterdam tabata un gesto inteligente, sigurando cu su magia culinario por continua na tur cu yega Rotterdam.
E cushina chikito di Atardi tabata yena cu mas cu dos dozijn di aspirantenan culinario di nos scol local. Nan tabata goza observando e expertonan, comprendiendo mas di kico ta nifica preparacion gourmet. Ta esencial pa reconoce y alimenta e pasion aki, specialmente den un region caminda turismo ta esencial manera Aruba y aki, sin duda, nos tin cu aplaudi Marriott Aruba Resort & Stellaris Casino pa haci esaki.
Un biaha mas, Marriott Aruba Resort & Stellaris Casino, a traves di e evento aki, a pone un standard den excelencia culinario. E anochi aki no tabata simplemente un cena, pero un prueba di e matrimonio armonioso entre cultura Arubano y e nivel Michelin.
Ora e anochi a caba, tabata evidente cu esaki no tabata simplemente un otro evento pero un experiencia extraordinario y agregacion na e compromiso di Marriott Aruba Resort & Stellaris Casino pa entrega exclusividad y calidad den tur loke nan ta haci.
Pabien!
Built with Shorthand