There is power in kindness.
Small steps every day.
Progress over perfection.
Do the best you can until you know better. Then when you know better, do better.
Skirbi pa: Jacqueline Wernet
Como un Terapeuta di comportamento y Hipnoterapeuta dedica, Uleike a haya su berdadero yamado cu su trabou yudando muchanan cu e spectrum di autismo of cu mester di atencion special hunto cu nan famianan pa yega na un calidad di bida pa un futuro mas briyante. E impacto di su trabou riba bida di muchanan y nan famia ta su compromiso pa bida haci cu ta resalta pa e gesto di duna, na lugar di ricibi.
Hende muhernan cu ta inspira ta expande e posibilidadnan pa otro hende muhernan y nos futuro generacion di hende muher. E ta motiva otro pa pensa mas amplio y kibra e “taboo” cu hende muhernan no por eherse cierto posicionnan. Muhernan cu ta inspira ta demonstra otro muhernan y hobennan pa amplia nan modo di pensa pa por logra mas cu nan ta kere cu nan por.
BARERA
E barera di mas grandi cu mi ta pensa ta e manera di pensa di algun hende, cu ta hende homber so por eherse cierto posicion, of cu hende homber so por practica cierto deporte. Si bo a wordo lanta cu mentalidad aki, esei ta bira bo “believe system” y no ta tur hende ta “open minded” pa cambia e pensamento aki. Ami mes ta gustan weightlifting y esaki ta ser considera un deporte pa hende homber. Awendia bo ta haya hopi hende muher cu ta haci weightlifting y esaki sigur lo motiva mas muhernan y hobennan pa haci esaki.
SOLIDARIDAD, CON?
Ami ta pensa dor di apoya y yuda otro. No mester compara ni envidia otro. Nos mester traha hunto pa por inspira e futuro generacion cu ta wak nos como ehempel. Nos tur tin e capacidad pa para den nos poder y amplia nos pensamento pa por empower e futuro generacion di hende muher.
ORGUYOSO LOGRO
Pa prome ta ser mama. Mi ta traha riba mi mes y purba di ta mihor cada dia pami mes y pa nan. Durante di un klas di “career development” na Merca, mi a planea “Brighter Future”. Ora mi a yega Aruba na aña 2011, mi a lanta un eenmanszaak Brighter Future cu e meta pa mi por duna guia na muchanan y nan mayornan pa tin un mihor futuro. Mi a cuminsa ta bay na cas di 1 mucha, mi a traha cune na su cas y despues mi a cuminsa laga muchanan bin mi cas den mi sala. Mi a muda despues pa La Sallestraat y awe mi ta directora/ President di Brighter Future y Brighter Future Academy Foundation. E ta un meta cumi a pone mi dilanti y mi a logra ( cu ayudo di otro hende muhernan cu ta inspira) y ainda falta.
INSPIRACION
Mi meta semper tabata pa eherse un ofishi cu por yuda otro hiba un mihor calidad di bida y haci un diferencia. Mi tin pasion pa yuda otro, vooral mucha. Na 2011 ora mi a bin Aruba bek y mi a ripara e necesidad pa guia di nos muchanan special y mayornan. No tabatin educacion special pa muchanan cu no ta fit den Aruba su sistema educacional. Esey a bira e reto di mas grandi cu mi a encontra na caminda. Esaki a bira un di mi metanan, pa por haci un diferencia den bida di nos muchanan special y nan famia.
Mi ta pone metanan personal y profesional mi dilanti y cu e siguransa cu mi lo haci algo tur dia, ni maske con chikito e ta, pami por logra mi metanan. Mi no ta laga ningun obstaculo stroba mi di logra mi metanan. No ta tur dia mi ta sinti motiva, pero si mi tin disciplina y dedicacion na tur locual cumi ta haci y kere aden.
UN MOMENTO INOLVIDABEL DI INSPIRACION
Mi ta haya hopi stagiaire cu ta bin haci nan practica na Brighter Future. Mi ta kere asina hopi den nan cu esaki ta haci cu nan ta cuminsa kere mas den nan mes. Mi ta duna nan e espacio pa haci eror y siña na di nan erornan. Mi ta yuda nan pa cumpli cu nan metanan, di scol y personal. Tin sa bin cu hopi ansiedad y insiguridad na comienso y mi ta laga nan sinti dibiaha trankil den mi presencia. Locual cu ta haci mi orguyoso.
CUALIDADNAN
Un hende muher cu ta para pa locual cu e ta kere den dje. Un hende muher cu no ta laga otro nan opinion afect’e y kere den su mes pa por logra tur su metanan. Un hende muher cu disiplina, determinacion, amabel, y tin amor popio. Un hende muher fuerte mentalmente y fisicamente. Un hende muher cu por yuda otro reconoce nan potencial y tin un efecto positivo den otro hende nan bida.
KICO TA HACI ABO, UN MUHER CU TA INSPIRA?
Mi forma di ser y con mi ta trata otro hende. Mi ta reconoce potencial den otro hende y semper mi ta purba di motiva otro pa ta un mihor persona di djis ta mi mes. Mi ta yuda tur hende den necesidad. Mi tin disciplina, dedicacion, y pasion pami trabou y deporte. Mi ta dedica na mi famia. Mi ta purba tur dia di ta un mihor persona, pa mi por ta un bon ehempel pa mi yiunan, Leia y Demi.
BALANS
Actualmente esaki ta algo cu mi ta trahando riba dje. E no ta facil. Locual cu mi ta bezig ta haci, ta traha un “weekly schedule” cu ta traha pami y e ta specifica precies kico mi ta bay haci pa parti profesional y personal.
Hende muhernan cu ta inspira ta expande e posibilidadnan pa otro hende muhernan
UN OTRO MUHER CU TA INSPIRA BO
Mi mama ta inspira mi pasobra cu e ta bin di un famia humilde, e mester a bay traha na un edad jong pa por yuda su mayornan cu su rumannan mas chikito. Mi mama a logra hopi den bida riba su mes. Mi mama ta gusta yuda otro hende, vooral mucha. E semper ta cla pa yuda tur hende den necesidad.
CONSEHO:
Kere den bo mes y bo metanan. No laga ningun hende bisa bo cu e ta imposibel. Si abo ta kere aden, bay pe! Haci algo tur dia ni maske con chikito cu e por ta, pa yuda bo yega mas serca dibo metanan...
MOTIVA UN OTRO
Pa tur cos tin un solucion. Tuma tempo pa bo mes, mentalmente y fisicamente. Abo ta mas importante cu tur cos. Busca algo cu ta traha p’abo, pa bo por haya e paz y trankilidad cu bo merece. Esakinan ta e base; Naturalesa, solo, ehersisio, medita, come saludabel, y mas importante drumi bon. Busca personanan cu bo por confia pa scucha bo y conseha bo durante di e fase aki, e por ta un psicologo, terapista, of un persona cu tin un efecto positivo riba bo. Tur cos ta temporal, lo mas importante ta cu abo duna dibo banda.
INSPIRA NOS MUCHANAN
Dor di ta un bon ehempel pa nan, no ta locual nos ta bisa pero locual nos ta haci ta locual e muchanan ta wak y lo bay haci despues. Pesei ta importante pa nos como muhernan cu ta inspira yuda y apoya otro. Nos mester “lead by example.”
MUHERNAN NA ARUBA
Mi ta haya cu e la desaroya masha hopi mes for di tempo mi ta chikito pa awor. Awendia tin masha hopi hende muher cu ta eherse pocisionnan cu antes ta considera pa hende homber, of practica deporte cu antes ta considera deporte pa hende homber. Tin hopi hende muhernan den nos comunidad cu ta inspira y cu ta considera “role models” pa nos hende hombernan mes.
Built with Shorthand