Un Oasis; esaki ta e forma cu por cuminsa describi The St. Regis Aruba Resort, durante su apertura dia 22 di Januari 2025. Rondona pa esnan tras di realisacion di e proyecto aki, empleadonan y prensa, a oficialmente habri e portanan di e prome resort di e marca renombra aki awor presente riba Palm Beach na Aruba. The St. Regis Aruba Resort ta trece elegancia sin igual y ta marca un punto di realse pa turismo di Aruba, halsando e nivel den hospitalidad y luho ainda mas.
Diseña pa Hirsch Bender Associates, e resort ta representa un fusion perfecto entre naturalesa y diseño contemporaneo. E decoracion ta inspira na naturalesa di Aruba, cu hopi uzo di palo di color cla y un estilo minimalista cu ta crea un mescla elegante y di hopi trankilidad. Desde momento cu bo drenta den e lobby espectacular, un ‘wow effect’ ta sorprende: Cu su bentanan di vloer te plafond, bo ta topa c’un bista grandioso di e lama bo dilanti, brindando un sensacion di paz y grandiosidad.
E resort tambe ta briya cu su pool enorme y amplio c’un diseño minimalista, ideal pa relaha cu e estilo St. Regis. Su posicion strategico edn e skina di Palm Beach ta agrega otro dimension visual ora bo ta den e pisonan mas ariba: un bista di 180 grado cu ta captura tanto e ‘beach stretch’ di Palm Beach for di balcon di cambernan of di restaurant como tambe e area natural di Bubali Plas y incluso e iconico Hooiberg for di e otro banda di e hotel.
E resort ta ofrece 252 camber luhoso, incluyendo 52 suite, cu servicio personalisa cu ta defini e marca St. Regis, y tambe introduci Aruba su prome casino St. Regis y un restaurant riba e rooftop dirigi pa Chef Akira Back, reconoci mundialmente y galardona c’un strea Michelin.
Durante apertura, David Marriott, presidente di Marriott International, a expresa su orguyo: “Nos ta sumamente orguyoso di traha hunto cu Aruba pa introduci un resort cu no solamente ta eleva e nivel di luho na e isla, pero tambe e reputacion global di St. Regis. Aruba su naturalesa espectacular y sentimiento vibrante ta complementa perfectamente cu nos tradicionnan y servicio unico.”
“Aruba ta un di e islanan mas destaca den Caribe, y nos ta orguyoso di presenta The
St. Regis Aruba Resort riba e beach precioso di Palm Beach, expandiendo ainda mas
nos portafolio global di hotel y resorts legendario,” George Fleck, Vice
Presidente Senior y Lider Global di Marca di St. Regis Hotels Resorts a bisa.
Na The St. Regis Aruba Resort, huespednan por disfruta di un variedad di experiencia gastronomico unico:
- Akira Back: Fusion Hapones y Koreano c’un bista panoramico espectacular.
- Eskama: Platonan Mediteraneo dilanti di beach.
- Nuba: Inspiracion local cerca di piscina.
- Tradicional Bloody Mary, transforma den "Bon Bini Mary," cu toke unico di papaya, lima, y habanero.
Ademas di su gastronomia exkisito, e resort ta brinda un gym moderno, tres pool cu cabana priva, y un spa inspira pa e naturalesa di Aruba. Un club infantil ta ofrece experiencia educativo y cultural.
Pa celebracionnan grandioso, e resort ta conta cu 20,000 metro cuadra di espacio elegante, incluyendo Astor Ballroom, ideal pa eventonan exclusivo.
The St. Regis Aruba Resort ta mas c’un hotel; e ta un destinacion iconico di luho c’un experiencia unico. Cu su diseño natural y elegancia refina, e resort ta pone Aruba firmemente riba e mapa global di hospitalidad.
Xclusivo Magazine ta felicita na tur e ekipo di The St. Regis Aruba Resort pa e logro excepcional y e apertura spectacular di e resort. Un danki special tambe pa Mikayla Ruiz y Yahira Santoni hunto cu e team completo di The St. Regis Aruba Resort, cu a guia nos riba un tour di e resort y a haci nos parti di un dia asina special y memorabel.
Pa reservacion, bishita stregisarubaresort.com
Tocante St. Regis Hotels & Resorts
Combinando un glamour clasico c’un spirito moderno, St. Regis Hotels &Resorts ta
comprometi na ofrece experiencianan exkisito na mas di 60 hotel y resort di luho ubica
na e miho adresnan di mundo. For di su debut cu The St. Regis Hotel na New York,
funda pa John Jacob Astor IV na principio di siglo XX, e marca a mantene su
compromiso cu un nivel solido di servicio personalisa y anticipa pa tur su huespednan,
ehecuta di manera perfecto pa e exclusivo Servicio di Mayordomo di St. Regis. Pa haya
mas informacion y conoce aperturanan nobo, bishita stregis.com of sigui e marca riba
Instagram y Facebook. St. Regis ta orguyoso di participa den Marriott Bonvoy®, e
programa global di biahe di Marriott International. E programa aki ta ofrece na su
miembro nan un portafolio extraordinario di marcanan global, experiencianan exclusivo
na Marriott Bonvoy Moments y beneficionan incomparabel, manera anochi gratis y
reconocemento di status Elite. Pa inscribi gratis of pa haya mas informacion tocante e
programa, bishita marriottbonvoy.com.
Tocante Marriott Bonvoy®
E portafolio extraordinario di Marriott Bonvoy ta ofrece hospitalidad di renombre na e
destinonan mas memorabel di mundo, cu mas di 30 marca diseña pa cada tipo di
biahe. For di The Ritz-Carlton y St. Regis te na W Hotels y mas, Marriott Bonvoy ta
ofrece mas opcion di luho cu cualkier otro programa di biahe. Miembronan por gana
punto pa estadia na hotel y resorts, incluyendo all inclusives y casnan di luho, ademas
di compra regular cu credit card participante. E puntonan acumula por cambia pa
experiencianan cu ta inclui futuro estadia, Marriott Bonvoy Moments™ o a traves di
socionan pa adkiri productonan di luho na Marriott Bonvoy Boutiques®. Pa inscribi
gratis of pa haya mas informacion tocante Marriott Bonvoy, bishita marriottbonvoy.com.
Built with Shorthand