Carnaval di Aruba 71 a drenta un era fresco cu talento nobo riba e escenario. Tarrick Ras, un MC cu energia sin fin, locutor di X FM 102.7, influencer y entrepreneur, ta un di e figura clave den e movecion pa duna un aire moderno na e tradicion di nos dushi Carnaval.
TARRICK RAS
TARRICK RAS
Cu su 24 aña, el a caba su Bachelor’s Degree den Hospitalidad y Turismo na Universidad di Aruba, mientras cu e ta maneha su propio negoshi, "TR Entertainment", dedica na e mundo di entretenimento. Conoci pa su carisma y abilidad pa capta e atencion di publico, Tarrick a bay for di contenido humoristico online pa un di e MCnan mas solicita di Aruba.
TARRICK RAS
TARRICK RAS
Su carera a cuminsa den 2020 durante e pandemia, ora un livestream riba Facebook a bira viral y habri porta pa un mundo nobo. E momento crucial cu a cambia su rumbo tabata ora e a haya un oportunidad pa cuminsa su propio programa di radio. Awe, e ta anfitrion di "Afternoon Flowz" na X FM 102.7, cu ta emiti tur dialuna te diabierna di 2pm - 5pm.
Como MC, Tarrick a domina evento nan grandi manera Aruba Caiso & Soca Monarch, Eleccion di Reina di Carnaval y Miss Universe Aruba, pero su talento no ta limita solamente na Aruba. El a anima Flip Flop Festival, Bonaire Music Festival, y e concierto di Romeo Santos.
Na principio, Tarrick no tabata interesa den Carnaval. “E prome peticion pa MC un evento carnavalesco a bin di parti Stichting MUSICA. Tabata e aña cu e Legendario Tio Ruben Garcia(dfm) a bay laga nos y e festival tabata en busca di un MC capacita pa sigui cu e trabou pa e festival. Tabata riba un anochi cu pa casualidad mi tabata di bishita cerca famia di Tio Ruben, unda mi a ricibi un yamada di un amigo Ralph Maduro informando mi cu presidente di Stichting MUSICA ta interesa pa cera conoci cu mi. Na prome instante, mi a nenga e oportunidad. E motibo dicon ta pasobra e tempo ey mi tabata tin mas interes pa ta MC di fiesta y concierto so.”
Pero su amigo Ralph Maduro a insisti. Durante e yamada, Ralph a conseha mi cu esaki por tabata un oportunidad nobo pa mi carera como MC y a uza e ehempel di Tio Ruben, cu tabata un MC varia cu no solamente tabata anima pa Scorpio’s Disco, pero tambe tabata MC pa diferente tipo di evento y eleccion. Den e mesun yamada mi a cambia di opinion y awe un biaha mas mi lo ta riba e escenario pa ACSM’25.”
Mi preparacion ta cuminsa algun ora prome cu e evento mes. E ta :
✅ Repasa draaiboek
.
✅ Come algo light .
✅ Bebe té y awa temperatura normal.
✅ Ningun gas ni sucu.
Su experiencianan cu Thessaly como su co-MC tabata flui natural. "Nos ‘chemistry’ tabata hopi facil pasobra nos ta conoci bon. Bon comunicacion prome cu subi escenario tabata esencial."
Si mester eligi su Top 3, ta e siguiente:
🎭 Eleccion di Reina
🎶 Festival di Tumba
🎤 Caiso & Soca Monarch
Tarrick ta kere cu e generacion nobo mester trece su mesun energia, sin kita respet pa tradicion. "Hopi biaha e generacion grandi ta insisti cu Carnaval mester keda igual manera antes, pero nos mester agrega creatividad y innovacion." Esaki ta pa sigur Carnaval di Aruba ta sigui crece y briya mundialmente.
Tarrick ta sinti cu e tin su lugar den Carnaval y ta spera pa keda riba escenario por hopi aña mas. Si mester cambia un cos den Carnaval, e ta desea MAS UNION Y MENOS CRITICA.
"Nos ta e futuro di Carnaval! Nos ta carga nos cultura. Ban sigui aporta y trece nos talento pa sigur cu Carnaval ta crece y evoluciona."
Bo lo bolbe haci e rol di MC si bo keda pidi pa siguiente celebracion di Carnaval?
SI! Sin duda!
Si bo por describi Carnaval di Aruba den un palabra, kiko lo ta?
Carnaval ta… BIDA!
Built with Shorthand