Sue Ann Lee, Rector di Universidad di Aruba

Den 2025, Sue-Ann Lee (45) a skirbi historia como un otro muher, academico nativo Arubiano cu a keda nombra como Rector Magnificus di Universidad di Aruba, sigui pa Dr. Lydia Emerencia, kende tabata e prome hende muhe cu a sirbi como rector di e universidad. Un paso cu ta representa un momento di orguyo y renobacion pa nos educacion superior.

Sue-Ann Lee su historia ta cuminsa na Santa Cruz, caminda el a siña hopi trempan cu disciplina ta e base pa logra meta nan proponi. “Mi a bay scol basico na Maria School. Mi niñez, mi ruman muher cumi, a lanta hopi hunto, ta hunga rond di cas, pero semper cu disciplina pa haci nos lesnan,” e ta conta. E no a lanta den luho, sino den structura y responsabilidad. “Mi tabata gusta scol, e tabata algo cu mi por domina,” e ta agrega. Desde chikito e tabata mira su futuro cla: studia, supera y crea oportunidad. “Nos mayornan semper a motiva nos pa sigui nos estudio y brinda nos e oportunidadnan cu nan mes no a ricibi,” e ta bisa. E fundeshi di un lider cu awe ta pone su marca den historia di educacion Arubiano.

Despues di termina su VWO na Colegio Arubano, Sue-Ann a tuma un paso balente pa sigui cu su estudio pafor di Aruba. Su destinacion tabata Hulanda, un mundo completamente diferente di loke e tabata conoci. El a cuminsa na Erasmus Universiteit den Rotterdam, y despues di a logra su propedeuse, el a continua su estudio na Rijksuniversiteit Groningen. “E experiencia tabata un culture shock hopi grandi, pasobra prome cu mi a bay studia, mi nunca a bishita Hulanda. Rotterdam tabata un ciudad grandi, y e universidad mes tabata un reto pa adapta.” Den medio di e cambio di idioma, cultura y ambiente social, Sue-Ann a enfrenta un sentimento di no ta na cas. “Nos tin un nacionalidad Hulandes, pero nos mester realisa cu esey no ta nos cas,” e ta bisa cu sinceridad.

Prome di yega na Universidad di Aruba, Sue-Ann a pasa mas c’un decada den e industria di turismo, tanto den sector priva como publico. E experiencia ey a dun’e un comprension real di con e industria ta move y crece. “Esaki a habri porta p’ami pa compronde con e industria aki ta funciona y desaroya,” e ta bisa. Pa Sue-Ann, turismo Aruba ta un case study bibo cu e ta uza awe pa conecta teoria cu practica den klas. “Duna les den e area turismo Aruba mes ta e ehempel perfecto,” e ta agrega. E paso di turismo pa educacion tabata natural: “Mi a kere den poder di traspasa mi conocemento, pero tambe yuda forma e generacion hoben aki pa ta lider cu pensamento nan critico cu por contribui na un Aruba sostenibel.”

Ademas di ta un muher y mama, Sue-Ann Lee ta mira su nombracion como un honor pero tambe un responsabilidad profundo. “Mi a sinti e sosten di comunidad pa mira un Arubiano y hende muher den e rol aki,” e ta bisa. P’e, e logro aki no ta personal, sino colectivo, un paso padilanti pa tur Arubiano cu soño nan grandi. E ta pone enfasi cu su rol no ta limita na administra un universidad, sino tambe na inspira y representa. “Mi ta mama tambe den e rol aki, pa por ta un inspiracion pa otro nan.” Su deseo ta pa cada studiante, colega y yiunan por wak cu disciplina, vision y trabou constante como hermentnan cu por habri porta. “Mi ta kere den e filosofia di tin rolemodels pero tambe den mentorship, unda cu lidernan den comunidad por fungi na un manera of otro pa comparti conocemento, experiencia y consehonan importante pa e desaroyo profesional y tambe contribucion na nos isla.”

Con bo tenure lo ta diferente na bo predecessor?

“Mi ta kere cu pa a nace y biba na Aruba, como yiu di tera, mi por wak e institucion no djis como un scol si no como Universidad di Aruba, na unda nos contexto, cultura y herencia ta central den nos curriculum, educacion y investigacion pa contribui cu e impacto aki unda cu nos studiante nan ta compronde nan rol cu nan tin y sinti e responsabilidad di contribui nan nos isla."

Segun Sue-Ann, Universidad por y mester ta un conector, un punto di encuentro entre academia y comunidad. “E Universidad di Aruba ta un centro di conocemento unda nos por contribui na investigacion riba tema nan di importancia pa nos pais,” e ta bisa. Pero segun Sue-Ann, e impacto no ta limita den klas. “Mi lo kier wak un universidad accesibel pa tur hende, un lugar unda bo por drenta pa ricibi conocemento, pero tambe pa crea vinculo cu diferente ‘stakeholders’ den comunidad,” e ta agrega. E ta kere cu e universidad mester ta presente den e bida real di Aruba, conectando studiantenan cu proyecto cu tin balor social y ambiental. “Nos studiante nan por contribui structuralmente na proyectonan cu ta duna bek na comunidad, of den e area social of ambiental,” e ta splica.

Pa Sue-Ann Lee, liderazgo no ta solamente un cuestion di conocimiento, sino di conciencia. “Un bon lider ta forma pa e manera cu bo ta trata otro, cu respet y empatia,” e ta bisa. E ta agrega cu liderazgo real ta nace di humanidad, di sa compronde otro, pero tambe bo mes. “Ta importante pa ta consciente di bo mes y siña maneha bo emocion nan.” E ta agrega cu e suerte di tabatin bon lidernan rond di dje desde principio di su carera, a influencia su estilo di guia y su comprension di poder, masha hopi mes.

Den su bida personal, Sue-Ann ta aplica mesun principio: ekilibrio. “Pa relaha, mi ta bay lama, wak un bahada di solo of cana den naturalesa. E sonido di naturalesa ta trece un tipo di silencio cu mi mester.” Banda di esey, e ta train tres biaha pa siman c’un personal trainer, un rutina cu e ta considera esencial pa mantene su salud mental y fisico. Como muher, esposa y mama, e ta mantene su vision realistico. “Mi no ta kere den ‘having it all’. Mi ta kere den tuma e mihor decision pa e momento y keda fiel na mi mes, mientras mi ta duna prioridad na mi famia,” e ta bisa.

“Social media a haci hopi cos mas accesibel, den e sentido di comparti y ricibi informacion. Na mes momento mester toch wak con y kico bo ta comparti eyriba di bo bida personal y realisa cu hende ta comparti e cosnan bon y pa nos uza e social media pa compara y tambe ta consciente cu e disinformacion. Mi ta kere si cu tin hopi informacion util cu ta wordo comparti y esaki ta mas accesibel awendia y den realtime cu ta yuda contribui na nos conocemento si mi uza e Plataforma di Linkedin como un ehempel.”

E reto principal pa Sue-Ann no ta solamente intern, sino transformacional. “Nos ta enfoca riba oportunidad. Nos mester un organisacion stabil cu capacidad humano y financiero pa sigui crece sin perde calidad.” E ta mira e Universidad di Aruba como un motor di cambio, unda investigacion, educacion y comunidad ta uni den un mismo meta.

Y como un rector Arubiano, y ademas un mama y muher profesional, e ta sinti un responsabilidad profundo. “Mi ta spera pa ta un inspiracion pa otro. Mi studiante nan, mi colega nan, y mi yiunan por wak cu disciplina, vision y gana di traha, tur cos ta posibel.”

Share on WhatsApp

Image captions