Si bo tin un cuenta riba Facebook of Instagram, seguramente bo a mira algun potret bieu subiendo den 2024 cu ta duna bo un flashback directo pa e bida social di Aruba den e añanan ’90 y 2000. Un fiesta, un evento, un grupito di amigonan, bo pareha di e tempo ey (of ainda), un hende cu bo no a mira den hopi aña, ta baila, ta ‘pose’ of djis pasando bon.
Desde ora cu e potretnan a cuminsa subi riba e pagina di REXARUBA y hendenan a cuminsa comparti nan, e reacion tabata instantaneo. Tag tras di tag. E comentario nan tabata:
- "Mira nos ey!"
- "Omg, mi tabata flaco ey tempo!"
- "Check mi wenkbrauw, check e style!"
- "Ken ta e hende banda di mi?! 😂"
Esei tabata e prome señal: E ta bek. Rex ta bek. Tur eseynan tabata su potret. For di su archivo personal.
“Tur a cuminsa c’un simpel biahe na Bonaire,” Reynaldo Ponson, conoci awe dia como REX, ta conta. “Mi tabatin un camara di rol. Mi tabata cu mi primonan ta saca paisahe, e seronan di salo. Pero despues mi a ripara cu e camara no tabatin ningun rol aden. Ningun potret no a keda. E siguiente dia mes, mi mester a bolbe Aruba, pero mi tabata determina pa haña e shot nan. Mi a cumpra un rol fresco y a bolbe na tur e mesun lugarnan pa saca tur potret bek, di nobo.”
E momento ey algo profundo a spierta; un pasion real. E tabatin 15 aña y ta corda esey manera si tabata ayera.
Na Aruba, su talento pa captura hende y momento social a florece hopi liher. “Mi tabata biba serca di Robert, primo di Ataniro, y nos tabata bay riba bicicleta bende CD di Basic One cas pa cas.” Durante un show di Basic One, un oportunidad spontaneo a presenta su mes: “Curt Labadie a yama mi riba stage y a dunami e camara. E bisami: ‘Saca potret di e presentacion.’ Esaki tabata den Piedra Plat Entertainment Center. Di e momento ey, tur cos a cuminsa move.”
Rex tabata na tur evento di Basic One, saca potret solamente pa fun. E tabata bay scol anochi (avond havo) y traha mitar tempo na Antillean Dakota (awor conoci como Kooyman). Cu e placa cu e a spaar, e a cumpra su prome camara digital: un Sony Cybershot.
For di evento local pa fiesta mas grandi, su lens no a para move. Eventualmente el a bay Hulanda y a cuminsa saca potret pa fiestanan di Partypeeps 2000.
Ora el a bolbe Aruba, el a wordo contacta pa traha oficialmente pa e website Den e Sauce, pa documenta e eventonan riba isla pa cu Arubianonan na Hulanda por wak. El a haya un press badge, y tur cos a bira mas formal.
Un tiki despues, Renzo Muscarielo, DJ di CoolPro riba CoolFM, a yam’e. “E puntra si mi kier traha riba nan website, Coolaruba.com. Mi ta kere cu e oportunidad ey a habri hopi porta. Door di popularidad di e radio, hopi mas hende a cuminsa conoce mi. Esaki a cambia hopi pa mi.”
Ora Rex ta reflexiona riba su caminda, un momento a keda den su mente: “Allrick Kock di Diario a yama mi pa puntrami si mi tabata serca di un suceso. Mi tabata. Mi a saca e potret. E siguiente dia, e tabata riba front page di Diario. Esaki a duna mi un push grandi.”
Rex a bira fotografo oficial pa Diario y CoolFM.com, y tabata traha como freelancer pa hopi revista, incluyendo Xclusivo. Su potretnan tabata sali riba mas c'un medio casi tur dia.
Unda tabatin bida social, Rex tabata ey.
“Danki na e apoyo di boso tur, Rexaruba a nace. Nos a habri un studio di fotografia y hasta a gana un premio internacional. Ey tabata e añanan di gloria.”
Despues di esey, el a tuma un otro rumbo.
“Mi a laga fotografia un rato y a drenta den e mundo di emprendemento pa 15 aña. Tabata un otro tipo di trabou pero semper tabata falta algo… E feeling di tin e camara den mi man. Esey ta sin igual.”
Na 2024, sin anuncio grandi, Rexaruba a cuminsa pone potretnan bieu riba su social media. Un potret di un grupo di amigonan, c’un caption simpel: "Back in time…"
E reaccion tabata inmediato. Hendenan a cuminsa tag otro. Den un dos dia, su pagina a bira un sensacion local.
Fiestanan na Choose a Name, Havana, City One, Bahia, Carlos & Charlies, Garufa, Euphoria, Moomba Beach y hopi mas. Potret pa potret, Rex a trece hende bek na momentonan dushi, spontaneo y inolvidabel.
“For di momento cu mi a haci mi comeback, mi a sinti tanto amor y apoyo. Mi meta semper tabata pa trece e bon recuerdonan cu nos a biba bek y pa hornanan den un manera bunita.”
“Awor cu mi a reconecta cu mi pasion, mi ta trahando riba proyecto nobo, cu mesun entrega. Nos ta move dilanti den marketing, content creation y fotografia. Mi deseo ta pa expande Rexaruba for di frontera di Aruba.”
Y tur e amor, apoyo y likes cu el ta ricibi awor ta prueba:
Aruba no a lubida su fotografo stima.
Built with Shorthand