E asignatura ta pa crea pa mayan loke na bida bo lo no weita. Comprende e esencia di e enseñansa aki y bib’e manera bo prome y ultimo (dia) y e lo ta e comienzo di bo edificacion”. Palabranan di mi defunto welo e dia cu mi a gradua. Palabranan cu ta fungi como e compas di cada paso y decision cu mi ta tuma.

Carlos Velasquez

Carlos Velasquez

Skirbi pa: Jacqueline Wernet

E curashi y respet mutuo pa laga cada persona den nan espacio den un forma natural sin excepcion, condicion of limitacion algun pa cada persona por crece den tur su dimensionnan, facetanan y segun e tempo cu e ser completo ta alinea na dje. Lagando tur hende liber den nan espacio, e oportunidad ta surgi pa lidernan, comunidadnan y futuronan nobo por emergi. For di e punto di salida aki Team EduCampus ta pasa den su proceso di innovacion y transformacion. Nos ta respeta y aprecia e curva innovativo di otro. Diferencia di opinion y punto di bista ta un punto di salida. E suma di e diferencianan ta hasi nos Design Knowledge amplio y nos ta empodera otro den e diferencianan aki. Na comienzo y final di tur cos hunto nos ta hiba e lucha na bienestar di nos muchanan, nos causa.

E realidadnan cu mi ta co-existi aden ta p'ami un canvas di inspiracion pa co-crea realidadnan nobo cu ta aporta na crecimiento di tur persona cu mi ta conoce den mi bida. Mi ta kere firmemente den e forza di universo pa alinea humanidad pa sirbi e proposito di engrandece capital humano. Na e momento exacto cu e causa yega den contacto cu cada individuo, e causa a scohe e individuo pa sirbi e proposito di su mandato. Cu e vision aki mi ta acepta di ta instrumento humano pa aporta na e bidanan cu mi tin honor di conoce.

INSPIRACION

Mi Life partner Ninoushka y ami ta comparti e mesun pasion pa educacion. Enfocando riba e trayecto di nos yiunan, e inspiracion y urgencia a bin pa crea un modelo di educacion nobo pafor di e sistema cu nos mes conoce.

E diseño di e experiencia educativo di e studiante ta un di e areanan mas importante den e modelo EduCampus. E experiencia ta stimula y motiva e studiante pa sigui busca informacion y conocimento, ta critico cu tur loke ta traspasa na dje, reconoce y desaroya su talentonan den forma continuo y sostenible.  Pa esaki por a tuma lugar cada stakeholder mester a bira equal shareholders den e continuum di traspaso di informacion y conocimento. Esaki a haci cu e rolnan tradicional den un scol, no por a existi mas den e modelo EduCampus. Desconstruct mental models cu ta mantene e sistema tradicional, ta e reto di mas grandi.

CON ABO TA INSPIRA

Cada dia ta un oportunidad mas. Esaki ta inspirami y ta garantisami cu cambio ta inevitabel y necesario. Mi ta vulnerabel pa e proceso di innovacion y transformacion y ta acepta y balora e proceso aki den cada persona en special hende muher. E hende muher ta pasa door di hopi faceta den su bida cu ta wordo marca pa cambio. E cambionan aki ta carga den nan gran experiencia cu ta genera posibilidad y idea pa bin cu solucion. Esaki ta inspirami y hacimi orguyoso di tur loke nos por y ta logra colectivamente. Mi ta keda busca e potencial den cada persona. Mi ta comparti mi pensamento di tur e posibilidadnan cu mi ta mira den cada un y stimulanan pa keda aim mas leu di loke nan conoce. Mi ta kere cu e energia aki mi ta inspira e hendenan rond di mi.

Nos hende muhernan ta e balans den nos comunidad.

KICO TA HACI ABO, UN MUHER CU TA INSPIRA?

Mi meta ta aporta na e crecemiento colectivo. Di e momentonan cu situacionnan scogemi, mi ta para habri pa scucha, absorbe y siña. Loke mi no tin conocemento di dje, mi ta busca pa studia. Mi no ta huzga y ta kere cu e curso di bida lo balansa tur energia. Esaki ta haci cu mi tin un forgiving nature. Den mi vivencia cada situacion a prepara mi pa un realidad cercano. Mi ta transparente den mi intencionnan y sostenibilidad. Mi ta consciente cu mi ta planta simianan di cual cosecha mi no lo mira. E realidad aki ta haci mi humilde y habri pa chaos, orden, construccion y disruption. Sa cu colectivamente den comunidad cu otro nos ta co-creando e mundo aki, ta yenami cu energia y felicidad. Energia y felicidad cu mi no por yuda di traspasa na e personanan cu mi ta topa.

BALANS

Honestamente mantene e balans por ta un reto, mi no ta bay romantisa esaki.  Loke ta keda semper sagrado ta momentonan diario di calidad halto caminda cu nos como famia ta experiencia otro sin reserva. Esaki ta e momento cu mi ta detach completamente di devices, buki y mi pensamentonan.  Mi dia profesional ta consisti di diferente sorto di actividad relata na research, diseño y maneho. Tin cu ta rekeri mas concentracion y espacio creativo cu otro. Mi ta planea e sorto di actividad na momentonan di dia caminda mi concentracion y creatividad por saca e maximo pa mi tempo por wordo uza di un forma mas efectivo y eficiente. Mi ta scucha mi curpa primordialmente y ta cumpli su necesidad di descanso y recreación.

MOTIVA UN OTRO
Cada acontecimento y situacion den bo bida, sea e experiencia ta haci bo feliz of dolor, ta prepara bo pa un mayan cu ainda bo no ta conoce. Sea consciente di esaki den bo presente. Pordona bo mes semper. No tin nada mas liberante cu laga bo mesun prehuicionan bay y realisa cu cada rosea bo ta haya un oportunidad pa existi den e mundo cu bo mes tin e forza y creatividad pa crea pa bo mes y bo alrededor.  Stima cada parti di bo ser, di sumpiña te e flor. Na final e totalidad di tur e partinan ta loke ta haci bo unico y lo ta bo forza pa sigui crece den bida.

Inspiracion ta intangibel. Sin embargo e tin un forza inmenso pa empodera e ser humano y cataliza su imaginacion y forza interno. For di nos prome contacto cu educacion na e momento cu nos nace y wordo nutri, mayoria di nos ta experiencia educacion biniendo di un hende muher. E prome contacto y tur cu ta sigui despues ta crea un algoritmo den nos cu nos ta categoriza como nos experiencia di educacion. Di e experiencia aki nos motivacion pa sigui siña pa bida largo ta wordo stimula. Nos conocimento ta consisti pa 70% di siñamento informal. Cu e conocimento aki primordialmente nos ta crea nos realidad y yuda construi comunidad. Teniendo na cuenta e probabilidad grandi cu e ciclo infinito di educación por wordo inicia pa hende muher, e impacto di e hende muher inspirativo riba e construcción di sociedad ta uno grandi y beneficioso pa e crecemento colectivo.

Valora y acepta otro door di laga cada un di nos cu nos espacio pa ta unico. Y realisa cu e suma di nos tur como hende muhernan unico ta loke ta libera e energia pa nos mesun progreso y progreso di nos pais.

ORGUYOSO LOGRO
Como studiante mi mes a topa hopi reto relata na necesidadnan diferente na esunnan cu ta wordo normalisa. Na jong, bo no ta realisa cu e diferencianan aki ta juist loke ta haci bo unico. Mi ta satisfecho cu mi a yega na e concientisacion aki. For di e concientisacion aki a surgi tur oportunidad pa crea y co-crea. Algun di e oportunidadnan a haya un nomber, manera EduCampus model, mientras otronan mi a entreganan na otro causa. Mi ta orguyoso di cada diseño y e impacto di cada un den e tempo cunan ta of tabata relevante.  Mi ta en especial orguyoso di EduCampus model, pa tur loke e ta representa pa e ser humano y su aporte na e paisahe di educacion y e sistema.

BARERA

E percepcion cu e espacio pa ta autentico, creativo y inspirativo ta uno cu mester wordo otorga door di otro persona. E percepcion aki en combinacion cu e peso di rolnan tradicional den comunidad ta haci cu e ser humano en general por yega na biba un bida prescribi pa e normanan y prehuicio di sociedad. No tin nada mas inhibiting pa inspiracion, cu biba un bida den cual bo creative confidence ta wordo limita.

UN OTRO MUHER CU TA INSPIRA BO

Mi life partner, den con e ta eherce su rol como mama pa nos yiunan en combinashon cu su carera profesional paden y pafor di e sistema sigur ta inspirami den con pa crea balance entre tur bo facetanan como muher, mama y professional. Neri Oxman, un persona humilde y sincero den su diseñonan den cual nos ta wordo recorda cu nos ta riba e mundo aki pa co-existi cu naturalesa. Su creacionnan ta rearrange mental models, haciendo e espectador di su creacionnan consciente cu e no a bin pa desgasta y destrui naturalesa. Sino mas bien ta riba e mundo aki pa un tempo cortico, den cual ta su deber pa crea un sinergia entra humanidad y naturalesa. E legado di nos cada ta en realidad e mundo cu nos ta laga atras pa generacionnan despues di nos.

CONSEHO

Bo imaginacion ta bo canvas, bo actonan na raiz di e imagen aki ta bo penceel. Sin embargo ta bo consistencia lo crea e obra di arte. No ta tur hende lo aprecia bo arte di e mesun forma, pero no laga esaki ta obstaculo pa bo sino mas bien e forza cu lo guia bo pa sigui desaroya bo creacion. Aunke bo ta e progenitor di bo obra, universo ta e facilitador hunto cu bo perseverancia. Sinti bo empodera den bo esfuerzo y mi ta sigur cu absolutamente nada ta imposibel pa bo.

UN MOMENTO INOLVIDABEL DI INSPIRACION
E pregunta aki aunke ta uno sumamente personal, mi ta scoge pa conteste cu tur reserva. Den bida bo ta topa situacionnan cu tin e mandato pa bo yuda y yuda’bo simultaneamente. E situacionnan mas serca di mi curason ta di casonan caminda mi por a reconoce talento den pleno adversidad di e bida di e persona y brinda un palette di tools pa e persona por a desaroya su talento y uza e forsa aki pa saca su mes di adversidad. Den cierto caso ta trata di hende cu a perde tur cos cu nan tabata valora den bida y mester a crea un realidad nobo cu tur loke nan tabata pensa cu nan no tabatin. Mira nan logra nan metanan, ta humbling y ta inspira ami hopi mas cu kizas ami a inspiranan. Sin mas nan causa a scogemi y mi a cumpli cu mi deber.

INSPIRA NOS MUCHANAN
E limite di e adulto, ta e limite di e mucha ora cu e traspaso di conocemento y informacion ta pasa den un forma hierarchico y e mucha no ta wordo stimula pa ta critico. Brinda tools pa un mucha sa con pa substancia su opinion y duna balor na su opinion lo laga e mucha ta comodo pa uza su mesun stem. Y esaki na su lugar ta crea e oportunidad pa e mucha por comunica su ideanan sin miedo algun. For di su ideanan, imaginacion, creatividad y diligencia e mucha por bin cu solucionnan den su realidad. E proceso aki ta uno cu ta stimula zelfredzaamheid y ta brinda e mucha e espacio pa desaroya den su plenitud. Experiencia di desaroyo sin limite ta uno inspirativo y transcendental. 

MUHERNAN NA ARUBA

Mi ta desea di wak un desaroyo mas acelera y un reparticion mas balancea di rolnan profesional. E cambionan den e bida di un hende muher te ainda ta wordo translada den vulnerabilidad innecesario. No obstante esaki, awendia tin mas hende muher den leadership positions en comparación cu dos década pasa. Mi ta pensa cu esaki ta e resultado di un autonomía cu den generacionnan anterior no tabata acceptabel pa sociedad. E efecto di esaki ta cu hende muhernan ta mas entrepreneurial, tin e curashi pa ocupa nan espacio plenamente, ta reconoce oportunidad y ta crea nan mesun streams of income. Door di esaki tin hopi iniciativa ta wordo tuma pa crea plataformanan pa empodera otro. E impacto di e curashi y independencia di e hende muher di awe sigur lo tin efecto ariba e aceleracion di e desaroyo di e posición di e hende muher den e añanan venidero. 

TopBuilt with Shorthand