Su vision di wowo por ta apenas 10 porciento, pero su vision pa su futuro ta na 100 porciento. Esaki ta e forma con nos por describi Shenély Tromp (21). Naci c’un condicion di glaucoma cu a haci cu legalmente e ta considera como un persona ciego, Shenély ta demostrando su mes, famia, amigonan y un comunidad completo, cu si bo pone bo esfuerso maximo den tur bo metanan, tur cos ta posibel. Awe, gradua y trahando den e sector di cushina, Shenély su storia ta pa inspira y ahusta nos propio vision riba loke di berdad ta importante, kere den bo mes.

“Desde cu mi por corda, mi a biba mi bida den forma normal. Mi sa cu kizas hopi hende cu tin un tipo di limitacion ta keda sera den cas y ta keda limita na biba un bida normal. Den mi caso, mi mayornan a lantami liber y a purba dunami un bida normal apesar di e condicion di glaucoma cu mi a nace cune,” Shenély ta cuminsa splika. E condicion aki cu el a nace cune ta haci cu likido ta keda acumula den su wowo, causando un preshon y daño na su nervionan, afectando su bista. Desde cu e tabata baby caba, el a haci un operacion pavia di e condicion aki.

“Dokternan a bisa mi mayornan e tempo aki, cu mi bista lo keda bay atras pero cu e operacion, e proceso lo bay hopi mas lento y cu e chens pa mi bira completamente ciego lo bira menos, aunke no tin garantia.” Tur dia Shenély mester pone medicamento den su wowo pa controla preshon y mantene su wowo cu humedad. Desde mucha caba e ta cliente di FAVI cu ta e fundacion cu ta atende cu persona nan cu limitacion di bista, pues Shenély a lanta consciente, di e condicion di su wowo.

Su infancia tabata uno similar na hopi otro mucha ta hunga y siña cosnan nobo tur dia. Su recuerdonan den su prome añanan di scol ta varios, un di nan ta e nomber di ‘wowo di pisca’ cu muchanan tabata tent’e cune. “Mi wowonan tabata mas grandi y rondo tempo mi ta mas chikito. Mi ta corda cu ora mi tabata keda tenta, mi tabata gaña malo pa mi no bay scol.” Segun el a crece,e tentamentonan aki a bira menos, pasobra dado momento, Shenély mes por a defende su mes.

Shenély a lanta cu duda ki direccion e tin sigui cu su estudio. El a sigui MAVO cu no tabata facil pero asina mes, el a logra pasa tur 4 aña, sin perde ningun aña di scol. El a keda ofreci pa haci su ultimo aña den dos, pero el a opta pa hacie manera tur otro mucha den 1 aña.

E travesia di Shenély no a bay sin retonan. Den algun les, e tabatin asistencia di un persona dedica banda di dje, pa sigura cu e por a participa den tur aspecto di su educacion. Danki na FAVI, e tabata conta cu e asistente aki cu tabata sinta cu ne den klas den su ultimo aña na MAVO pa yude ora e no por a wak loke tabata skirbi na borchi. Tur e retonan aki a unicamente haci Shenély mas fuerte y a siñe e nificacion y importancia di perseverancia.

Despues di MAVO, Shenély tabata contempla EPI sector di cushina, pero a keda desconseha debi na su condicion. El a dicidi pa sector economico pero 6 luna despues, el a transfer toch pa cushina y awe ta feliz cu e decision aki cu el a tuma. “Mi a haya e sosten di mi mayornan y un amigo na scol, kende a bira mi pareha. Mi a ‘try it out’ y mi tabata sa cu esey tabata algo p’ami. “E prome dia mi a corta mi dede ora mi mester a corta un selder pero, mi a sigui. Durante su educacion culinario, Shenély su determinacion y pasion a briya. El a resalta den su estudio, dominando e a abilidadnan rekeri pa por traha den un cushina. Sea ta corta, cushina, e tabata por tur cos, prueba cu determinacion no tin limite. Awendia mi ta corta berdura cu mi ‘wowo sera’, Shenély ta bisa.

E aña ki na 2023, Shenély a gradua na EPI den Culinary Arts. “Mi a propone pa caba mi scol y mi a logra. Mi bista su capacidad ta na 10% pero esaki no a strobami den mi metanan. Mi ta trahando den cushina na e mesun restaurant unda mi tabata pasa mi tempo di practica ora mi tabata studiando na scol.

Mi ta encarga cu desayuno, salada, lunch, pues tur cos. Mi ta preparando pa casa tambe e aña ‘ki cu mi pareha. Mi ta hopi orguyoso di mi mes y ta gradicido di por a haci tur loke mi a propone. Mi ta corda cu tempo di scol, tabatin hende cu a mustra duda den mi ora mi tabata studiando.

Hasta cierto momento mi ta sinti cu tin hende a purba kibrami pensando cu mi no ta bay logra, pero esey a djis haci mi mas fuerte. Ami no ta sinti cu mi ta un persona cu limitacion. Mi ta un persona independiente den hopi forma. Unico cos ta cu mi no por core auto paso lo mi no por haya rijbewijs pero esey no ta stroba mi di biba,” Shenély ta bisa.

Sigui pusha, aunke tin vez bo por sinti cu e ta duro, no give up, tur logro despues na final, lo ta di bo.”

ENGLISH
TopBuilt with Shorthand