Prome cu palabra “influencer” tabata existi, Aruba tabatin su Ronchi de Cuba. Un mescla di moda, drama, elegancia y confesion. Un figura cu ta inspira pero tambe cu por crea ‘shock’ na mesun momento.
E mesun persona cu ta duna un conseho un dia y ta crea un fashion show e otro. Un personahe cu ta move entre fe y flair sin permiso di ningun hende. Tabata parse pa un tempo e tabata riba un ‘pausa’ y awor diripiente, e ta manera tur caminda. Di TikTok pa Instagram, un video kinan, un potret eynan; Ronchi Reacts, Ronchi Links, Ronchi Unfiltered…Ronchi ta bek of mihor bisa, was he ever gone?
Nos a invita Ronchi, e amigo, diseñador, showman y storyteller pa un shoot sin filtro na Secrets Aruba. Pakico? Pa nos papia, di TikTok, amor, moda, poder, politico… nada tabata prohibi.
Ronchi, nos ta mira bo riba TikTok mas cu nunca, kico a motiva bo pa bira asina visibel atrobe?
Uhm! Mi nunca a sali di spotlight… hahaha… mi ta simplemente haci’e mas awor. TikTok ta fun, y mi kier pasa bon mientras mi ta inspira otro pa stima nan mes mas. Tambe papia poco riba ‘dating’...wauw, esey ta algo asina complica awor!
Bo ta sinti cu social media a dunabo un voz nobo, of simplemente un ‘stage’ diferente pa e mesun Ronchi cu nos semper a conoci?
Un stage nobo, mesun Ronchi. Cariñoso, directo, un tiki crazy, demanding, y hopi yena di amor.
Tin hende ta pensa cu TikTok ta pa e hobennan, bo no ta pensa algun biaha “mi ta demasiado bieu p’esaki,” of bo ta sinti cu edad no tin nada di haber cu creatividad?
Oh please! Mi tin un “twinkle” sin tempo… hahahahaha… mi no ta bieu pa nada. Mi ta brota di energia y mi ta hopi ‘vivaz’!
Con bo ta scoge cua banda di bo mes bo ta mustra online, e ‘entertainer’, e diseñador, of e provocateur?
Ta depende di mi humor, di e dia… si mi ta inspira. Mi no ta planifica, simplemente ta pasa. Mi nunca a mira mi mes como un provocateur! Bo ta mira mi asina? (si)
Con e reaccionnan ta; mas amor, mas odio, of un tiki di tur dos?
Definitivamente mas amor. Odio ta pa “losers” y “wannabe’s.” Mi no ta duna ningun atencion na esaki of na nan.
Riba TikTok, bo ta comparti conseho, opinion y actitud, pero bo ta sigui realmente e mes consehonan cu bo ta duna na otro hende?
Hahahahaha… depende. Mayoria di e tempo si. Pero ora bo gusta un persona, of bo ta namora, cosnan por bira un tiki loco. Specialmente ora ami mes ta namora.
Con e reaccion nan ta online; mas admiracion, curiosidad of controversia?
Mi ta kere e ta mas pa hende haya sa mas di mi mes. Conoce mas di mi sentimento- y mi pensamentonan. No solamente di djis mi trabou, pero mas di mi mes.
TikTok por ta un lugar bastante salvahe y sin filtro. Bisa nos berdad, bo a ricibi algun proposicion indecente den bo DM?
No riba TikTok. Riba Insta y Whatsapp si, pero esey ta un otro storia. Mi no ta gusta proposicion nan indecente. Mi ta gusta ora un persona tin e corahe y ta bin papia cara a cara cu mi.
Bo ta sinti cu bo ta mal comprendi riba social media, of bo ta disfruta di e chaos cu ta bin cu ta Ronchi?
Mi ta bisa cos manera cu mi ta sinti. Pensamento di mi mente ta bay directo pa palabra. Mi no ta kere cu mi ta mal comprendi. Mi no ta gusta chaos ni mi ta pone atencion na esaki tampoco. “Block” ta djis un click leu!
Bo ta habri pa amor awor of bo curason ta hopi enfoca ainda riba arte y bo mes?
Mi ta habri pa amor. Amor autentico. Amor honesto. Pero mi ta tambe super enfoca riba mi arte y mi brand.
Si un persona kier tin un cita cu bo, kico ta e 1 regla cu e mester compronde prome pa e ta cu Ronchi de Cuba?
Bo nunca sa kico bo ta bay haya. Ta un “rollercoaster”! Pero un regla ta cla manera piedra: mi no ta gusta un hende gañador ni “players”!
Bo semper tabatin un reputacion pa pusha e limite di moda na Aruba, kico “estilo-moda” ta nifica pa Ronchi?
Autenticidad. Den e era aki unda tur hende kier copia un otro cu nan ta mira online, estilo ta sin duda ta bo mes, den bo forma di mas autentico.
Moda na Aruba a evoluciona, bo ta sinti orguyoso, of frustra, cu loke bo ta mira awendia?
Orguyoso. El a evoluciona hopi. Pero tin un gran division. For di ‘fashionable’ te cu simplemente ordinario. Esaki mester ta frustrante pa algun hende, pero mi no ta pone atencion na e ordinario. Mi kier magia!
Kico ta un cos cu hende ainda no ta compronde di moda como un forma di arte?
Cu moda ta e portada di e buki. Abo mes ta e buki, percura pa e portada por bende e contenido.
Bo ta hopi serca di e mundo politico, bistiendo figuranan importante. Con e experiencia ey tabata realmente ‘behind the scenes’?
Mesun manera cu cualkier otro cliente. E unico diferencia ta cu politiconan, bo mester tuma den consideracion e percepcion publico y e imagen nacional.
Bo ta kere cu imagen por haci of kibra un politico?
Si, e ta posibel. El a wordo proba hopi biaha rond di mundo. Incluso na Aruba.
Si un lider politico awe pidi bo yud’e pa reinventa su imagen, lo bo lo haci’e?
Hmm… depende ken ta e figura politico.
Con poder ta mustra via e wowo di un diseñador?
Poder por ta glamoroso pero tambe por ta hopi ‘scary’. Poder ta un herment peligroso. E por keda uza pa bon cos, pero tambe pa destrui. Tur ta depende ken tin e poder ey.
Bo a mira e politiconan di serca; kico ta un cos di nan cu e publico kizas no sa?
Cu nan ta hende normal, manera nos tur.
Bo a y ta bisti politiconan, celebridadnan y personanan den wowo publico. Ken tabata bo persona faborito pa bisti y ken a desafia bo mas?
Den politica, mi persona faborito pa bisti tabata ex-prome minister Evelyn Wever-Croes, y e mes tabata esun cu a desafia mi mas na cuminsamento. Wendrick Cicilia, Ursell Arends y Rocco Tjong ta tambe entre mi faboritonan. Mi gusta bisti Jeon, Buddy, Miguel Genser, Rocco y Edjean. Mi ta stima bisti artistanan.
Bisa berdad, bo ta kere cu mayoria di políticonan na Aruba no sa con pa bisti bon?
Si, hopi di nan no tin absolutamente niun idea con ta bisti apropiadamente pa nan funcion.
Hende ta descri bo como ‘wild’, liber, sin miedo, kico di esaki ta berdad?
Liber y sin miedo ta definitivamente berdad awendia, mi ta kere incluso na un nivel mas halto cu prome. Wild? Mi nunca a considera mi mes ‘wild’… shocking talvez, pero ‘wild’ no!
Hende ta papia di e “Ronchi di antes” provocativo, fuerte, ‘unpredictable'. Kico bo ta bisa na e hende nan cu ta kere cu bo a cambia?
Mi no a cambia. Mi ta simplemente controla’e mihor awor.
Nos lo mira bo un dia man den man c’un persona special? Of Ronchi ta casa solamente cu su arte?
Mi ta habri pa esaki! Na e momento aki mi no tin nada special pa reporta.
Kico ta un cos cu bo ta lamenta... y un cos cu bo nunca lo pidi sorry p’e?
Mi ta lamenta di no tabata “mi mes’ mas hopi. Durante e ultimo 15 aña, mi filtra mi mes y tabata mas diplomatico, no mas! Ami nunca lo pidi sorry pa mi fe, ni pa e amor cu mi ta duna.
Kico ta e cos mas ‘bold’ cu bo a haci, riba stage, den amor, of den bida?
Asina hopi! Riba stage, masha hopi. Den bida, ta simplemente ta mi mes desde e momento cu mi a drenta den spotlight, esey mes ta un acto ‘bold’. Amor…ora mi ta stima, mi ta stima profundo, sin condicion, completamente. Esaki ta ‘bold’.
Bo ta mira bo mes re-inventa bo marca di moda, of bo ta mas enfoca riba media y creacion di contenido awor?
For di un perspectiva profesional, mi marca ta ‘lo mas importante’. E ta inclui moda, media, contenido y produccion. Mi marca ta loke mi kier pa e ta. Pues SI, mi ta constantemente refrescando, re-inventando y ‘rebranding’.
Kico bo kier pa e proximo generacion na Aruba siña for di bo storia, tanto e exitonan como e chaos?
Cu bo mester pasa dor di e tormenta pa por yega na e solo briyante. Cu no ta importa kico hende ta bisa of ta haci, keda enfoca y sigui p’adilanti. Uza nan “maldad” como gasolin pa briya mas, pa logra mas!
Kico ta un cos cu bo kier haci ainda cu lo por shock hende?
Mi no ta pensa riba esey. Mi no ta shock hende pa proposito. Talvez e mi autentico, esey ta un tiki shocking, pero e ta natural. Pa esnan cu ta warda… tene pasenshi, mi ta priminti mas!
Con bo kier pa hende recorda Ronchi de Cuba, e diseñador, e showman, of e sobreviviente?
E ser humano. E persona multifacetico. E diseñador, e showman, e sobreviviente. Mi kier cu nan recorda tur loke mi ta.
Si bo por diseña identidad di Aruba manera si tabata un marca, con e lo ta parse?
Mi no lo cambia hopi cos. Mi ta stima mi isla. Talvez e lo ta un tiki mas limpi, mas saludabel, y yena di un abundancia di alegria na luga di envidia y descontento.
E generacion nobo ta obsesiona cu “fast fashion”, barata, trendy y ‘disposable’. Kico bo ta pensa di e movimento aki? Ta creatividad, deroche of un crisis?
Fast fashion ta un crisis barata y di mal gusto. E ta dañino pa nos medio ambiente. No ta autentico. Ta barata y mahos. Mi tin cu bisa mas?
Na Francia nan a cuminsa regula fast fashion pa su impacto ambiental. Bo ta kere cu Aruba mester sigui un ehempel aki, of libertad di moda ta algo demasiado personal pa controla?
Libertad di moda no por keda controla. Fast fashion NO ta moda. Mi ta kere cu Aruba mester tuma paso pa proteha e bienestar di e negoshinan y creadornan local cu ta estableci aki y ta paga impuesto aki. Ta logico pensa, pero kiko e resto no ta pensa asina?
Marcanan ainda ta importante awendia? Of estilo a bira mas riba individualidad cu label?
Marcanan ta bin y bay. Diseñadornan ta importa. Mente creador ta e diferencia. Individualidad ta super importante, pero diseñadornan ta duna hende e opcion pa expresa nan mes den formanan unico.
Pa e hende hoben cu ta cuminsa forma su mesun estilo personal, kico ta e 3 piezanan esencial cu cada mucha homber y mucha muhe mester tin den nan closet, sin importa e moda di e momento?
Tur ta depende di nan estilo personal. Di kico nan kier logra den bida. Manera e frase ta bisa: “Dress for what you want to become.” (Bisti manera loke bo kier bira.)
Kico bo opinion riba e moda nobo di “low-rise jeans,” y “gender-fluid”? Bo ta mira esaki como confiansa of simplemente un otro momento di locura di moda?
Moda ta cambio den movimiento. Ta evoluciona constantemente, creando algo nobo of renovando algo di pasado. No ta locura ni confiansa. Ta simplemente e manera cu moda ta biba.
Si bida tabata un fashion show, kico Ronchi de Cuba lo bisti pa e final, y e lo sali su so of man teni c’un otro hende?
Mi lo bisti un ‘coat’ grandi, preto, dramatico, cu ‘combat boots’. Mi por cana mi so of tene man c’un hende. E parti ey, no ta defini mi… pero mi lo gusta tene man c’un hende si.
Pakico bo a accepta pa haci e entrevista y e fotoshoot ‘ki? Kico bo kier cu hende saca for di wak bo ‘bek den spotlight’?
Bo ta sigui bisa “bek den spotlight”… honey, mi nunca a sali di dje. Talvez mi a keda mas na distancia y mas silencio. Mi kier pa hende sa cu mescos cu mi a eligi pa ta mas ausente e ultimo 10 aña, awor ta MI tempo. Mi ta crea e ola cu mi ta subi riba dje. Abo ta cla pa e tormenta?
Built with Shorthand