“Aruba a yega den mi bida como un sorpresa, sin cu mi a busca esaki”. E tabata casi manera un impulso bunita y loco na mes momento, pero a bira e lugar unda Romina a forma su identidad adulto. El a yega sin conoce hende, cu poco placa y sin papia e idioma. Sinembargo, paso a paso, el a lanta un nomber, un proposito y un comunidad. El a bira entrenandora di hopi hende, homber y muher, traha cu varios marca relata na entrenamento fisico na Aruba y asina a mustra su forsa y conocemento. “Mi ta stima Aruba, pasobra e no ta un luga den mi storia, e ta parti di mi bida”.

Hopi muhernan a yega serca Romina buscando pa cambia nan curpa y, sin ripara, e ta bisa cu el a termina na cura su alma hunto cu di su clientenan. "Nan a confia mi procesonan personal y mi a siña cu ora un muhe ta sinti su mes compaña, e por logra cosnan increibel. Den e intercambio ey, no solamente nan a crece; mi tambe a crece, mi a fortalece y mi a confirma cu mi proposito ta cana na banda di otro muhernan mientras nan ta descubri nan forsa propio".

“Aruba a siña mi cu mi por sostene mi mes, cu mi por crea mi propio caminda y cu, cu trabou y constancia, soñonan ta wordo construi. Den e momento ey mi tabata buscando un oportunidad… y sin sa, mi a haya e muher cu mi ta awe .”

Biba na e isla a cambia mi relacion cu mi curpa y cu disciplina. Mi a siña tende dje, respet’e y move for di disfrute, no presion. Disciplina a nace di constancia y cu e tempo a bira confianza den mi mes y den mi proceso. Y awo cu mi ta biba afo, mi ta sigui bolbe pasobra Aruba ta parti di mi. E isla ta conecta mi cu hende, recuerdo y cu e version di mi cu a crece y a siña ta fuerte.

Romina ta un persona cu semper a kere den amor y na e momento menos spera y sin busca, el a topa c’un persona cu a pone enamora profundamente. “Mi a haya un amor cu no ta competi cu mi soñonan sino cu ta compañami den nan. Mi por tabata mi mes, sin mester duna splicacion.” Awe, e ta bisa cu su esposo Derek Shanton a dun’e, banda di su amor, un sosten, respet y un forma di stima cu Romina ta describi como special, calmo y di crecemento.

Na inicio di e relacion Romina a keda biaha entre Aruba y Merca. Derek tabata haci e mesun biahenan na Aruba pa bishit’e pero dado momento, Romina a realisa, cu tabata su momento pa apoya su pareha y haci Merca su hogar permanente. Pero asina mes e ta bisa : "Aruba, mi dushi isla, no es algo de lo que pueda despegarme: vive en mi y siempre va conmigo.”

Bida na un pais nobo ta sigur un cuminsamento otro, pero pa Romina ta djis continuacion di su soñonan. Di Argentna pa Aruba y awor Merca, e soñonan di e mucha chikito ta continua. Asina e idea pa crea su mesun aplicacion di fitness a nace. E meta ta simpel, yega na muhernan tur rond mundo y compañanan na descubri nan mesun forsa, mescos cu a pasa cune.

Desde cu Romina a laga Aruba, e ta sinti cu el a crece, principalmente den su confiansa y su poder personal. Aruba a siñ’e, cu e por logra tur loke e propone su mes: El a yega un muher hoben yena di soñonan y a comberti den un muher poderoso, cu fortalesa, caracter y un confiansa profundo den su mes. For di esaki a nace e deseo pa yega mas leu cu entrenamento fisico so den un gym. Compartiendo contenido, video y pronto cu su propio podcast, Romina kier compaña muhernan den loke no semper ta bisto: e proceso interno, e duda, e constancia y e amor propio. Su mensahe awe ta simpel pero poderoso: “un muher no mester bandona su mes pa logra algo. E cambio di berdad ta cuminsa ora bo scoge, tende y trata bo mes cu amor y perseverancia.”

Romina ta sinti cu el a transforma den e muher cu e ta awe: su confiansa, su paz y e libertad pa scoge sin culpa. Tur paso a tuma esfuerso, consistencia y hopi biaha cuminsa di nobo, pero el a gana su voz, su independencia y su mesun caminda, cu gratitud y orguyo, awe, banda di su apoyo di mas grandi cu ta su esposo.