Si tin un deseo cu Risa Danies Berg tabatin latente desde cu e tabata hopi hoben ta bira un mama un dia. Awe cu su 38 aña, e ta corda con hopi e tabata gusta traha cu mucha y e gana grandi ey cu el a lanta cune pa haya su mesun yiu, un dia. “Pero cu mi 16 aña, mi a keda diagnostica cu PCOS. Aki mi tabata sa caba cu e caminda pa bira mama, lo no ta uno facil.” Asina su storia di lucha pa un deseo grandi pa bira mama, a cuminsa.
Risa Danies Berg
Risa Danies Berg
Ora el a casa y a gradua pa bira docente, e deseo pa bira mama a bolbe crece. E speransa pa logra esaki a hiba Risa y su esposo na clinicanan di fertilidad na Venezuela, Colombia, y eventualmente na clinica renombra yama INSER na Bogota. Pero prome cu IVF por tuma luga, Risa a confronta un obstaculo nobo: dos kiester grandi den su curpa cu a pone su salud na riesgo. “Mi ginecologo na Aruba no a kere cu tabata nesesario pa saca nan, pero mi a sigui mi instinto,” e ta conta. E operacion na Colombia a mustra cu un di e kiester ya tabata afectand’e haciendo e posibilidad pa un embarazo natural, casi imposibel. “Mi a bisa: mi no kier a rindi.” Un IVF na e clinica INSER na Bogota c’un costo di mas cu 20 mil florin, Sin conta ticket y estadia, tabata su unico chens. Risa y su esposo a lansa un fundraising creativo den forma di un ‘puzzle’ pa cubri e gasto halto di IVF. Nan a bende pida di un puzzle pa 50 florin, inicialmente entre famia y amigonan.
Pero e idea a crece riba su mes y a bira viral internacionalmente, cu hasta hende cu nan no conoce mes, a yuda. Asina nan a yega na e fondo necesario. Hendenan di Aruba y henter mundo a yuda nos.
Na 2022, e prome tratamento di IVF a duna resultado: Risa a sali na estado. Pero lamentabelmente, no mucho despues, el a haya un miskraam. “E momento ey a kibra mi. Mentamente y fisicamente, mi tabata abou.” Casi dos luna despues, a sigui un di dos intento y su tras, un otro perdida. “Mi ansiedad y depresion tabata real. Mi a sigui cu psicologo, y a busca yudansa extra na Aruba. Pero mi no kier a rindi.”
Un tercer intento no a pega tampoco. “Mi a kibra. Pero mi esposo tabata mi sosten solido. E tabata bisa mi: si bo kier, nos ta sigui. Si no, nos ta stop. Pero mi tabata sa cu mi tabatin 2 chens mas den mi pakete. E ultimo try... mi a purba.”
Risa a logra di saca 24 ‘webitos’. “E tratamiento a wordo ahusta pa mi no bira malo. Cuido, fe y perseverancia a domina.” Di tur esakinan, nan a fertilisa 4. E di cuater intento, ultimo speransa, a pega. “Porfin, nos a yega na mi milagernan. Twin baby’s.
E embarazo no tabata facil. Mi a keda manda na Bucaramanga na di 26 siman, Cu su 35 siman, su rainbow babynan, un mucha muher y un mucha homber, a nace. Mi ta gradici pa cuido ey. Mi yiu muhe tabata den couveuse 2 siman, mi otro yiu tabata na hotel cu mi. Mi a pasa tur tipo di dolor, pero ora nos a bin bek Aruba cu nan na 5 siman, mi tabata sa: nos a logra.”
Risa ta un prueba bibo cu e caminda pa bira un mama no ta igual pa tur hende. Pero cu fe, amor, y sosten, hasta di un comunidad, milagernan por bira realidad. “Si bo ta den un proceso hopi dificil, mi kier pa bo sa: e dolor ta real, pero e speransa tambe por renase.”
Semper mi tabata habri acerca di nos lucha cu infertilidad y e proceso di IVF, vooral riba Instagram, y asina mi a cuminsa yuda hopi hende muher di Aruba (cu mi no ni conoce) atraves di Instagram. El a bira algo cu mi stima: yuda otronan pa por yega na nan soño di bira mama tambe.
Ah, y e puzzel cu tur hende cu a yuda pa yega na fondo, cada pieza cu e nombernan di esnan cu a yuda, ta colga den un bunita frame den camber di Risa su babynan. “E ta mi recuerdo eterno cu amor ta posibel den comunidad.”
Built with Shorthand