Desde un edad hopi hoben, Reanne Marie Ras a desaroya su pasion pa musica y carnaval. Cu 16 aña, e tin un talento emergente c’un lista impresionante di participacion den festivalnan grandi di Aruba. Den e mesun manera cu e ritmo di carnaval ta core den su sangre, e energia di e podium ta su inspiracion.
REANNE RAS
REANNE RAS
Reanne a cuminsa su biahe musical desde su 4 aña caba, cantando den grupo nan manera Muchanan Sabi. Di eynan, el a sigui subi riba escenario, participando den festivalnan manera Festival di Pasco di Tante Julie, Festival di Roadmarch y Calypso, Festival di Himno y Bandera, y Festival di Tumba. Cu cada presentacion, su talento a bira mas conoci y aprecia.
REANNE RAS
REANNE RAS
Den 2015, el a gana e titulo di Rookie of the Year y Premio Amistad, un prueba di su dedicacion y pasion pa e arte di canto. Dos aña despues, el a gana Roadmarch Queen Pre-Infantil (2017) y despues di e prome victoria, e no a stop. Na 2019, el a logra e titulo di Roadmarch Queen Infantil. “Na 2023 mi a participa na festival Ranchera, unda mi a sali di dos lugar y trahe China." Aña tras aña, Reanne a duna un presentacion di altura, y e aña 2023 a marca un momento significativo p’e, ora cu SMAC a reconoce su 10 aña di participacion den Festival di Roadmarch, un sorpresa emocionante pa e talentoso hoben.
Pa Reanne, e magia di carnaval ta mas cu solamente un competencia. E ta sinti carnaval den su curason. “Mi mama tabata canta den de Trupialen y mi omo grandi tambe ta canta. Mi famia gusta musica si y nos ta gusta karaoke. Locual si mi famia ta, ta carnavalista. Na un edad hopi jong ya mi tabata den seccion di carnaval y e pasion ey nunca a bay p’esey mes mi tin e pasion pa canta durante carnaval y baila den carnaval pa show."
E aña mas special pa Reanne tabata na 2017. “No solamente pasobra cu mi a gana Roadmarch pre-infantil, pero door cu e aña ey un bon amiga di mi a bay pa reina infantil y nos a sali mesun aña. Y e carnaval ey 100% mi a pasa hopi leuk. E toke mas special den e festivalnan di Carnaval pa Reane ta simpel; “ E ta cu bo no ta solamente participa 1 biaha. Despues di e festival ainda bo ta bay den parada, bo ta pasa leuk y den e temporada di carnaval tin hopi promocion ta bay rond y bo ta sera conoci cu e otro participantenan.”
“Mi famia ta mi sosten di mas grandi durante carnaval y tur otro festivalnan, specialmente Roadmarch y Tumba. Hopi di mi dancersnan ta mi famia, y mi mama y mi tata ta e motor cu ta pusha mi p’adilanti. Mi mama ta core rond cu mi tur ora, mientras mi tanta y omo ta yuda cu tur cos cu nan por, manera busca dancers y steenchi.
Esaki ta realmente un esfuerzo di famia, pasobra mi otro tia ta pega steenchi cu mi mama riba mi pañanan, mi wela y welo ta traha borchi di apoyo, y mi otro tanta ta traha pechi. Mi ta sa cu hopi otro mucha tin e gana di canta pero sin e push di nan famia of otro circumstancia, nan no por logra. P’esey, mi ta hopi agradecido pa e support y amor cu mi famia ta duna mi den tur esaki.”
"Hende sa puntrami si mi no ta cansa di tur e festivalnan aki," Reanne ta conta. "Claro cu tin momento cu e ta hopi, pero mi ta haci esaki paso mi ta gusta. E clave ta balansa entre scol y mi amor pa musica." Ademas di canto, Reanne a desaroya un amor pa choreografia y cu su dancers, el a forma un union cu ta mas cu simplemente un grupo di baile. "E tempo cu mi ta train cu mi dancersnan prome cu e festival ta sinti manera un hangout cu mi amigonan," e ta bisa.
Reanne no ta wak su exito solamente como un logronan personal, sino tambe como un inspiracion pa otro hobenan Arubiano. E experiencia di subi riba escenario, baila y canta ta algo magico. Su mensahe ta cla: "Mi kier motiva tur hobenan pa participa na festivalnan asina, pasobra e ta engrandece nos cultura di Aruba."
C’un futuro prometedor den mundo di musica y entretenimento, Reanne ta baily sigui desaroya su talento. Den 2023, el a forma parti di e celebracion di 65 aña di Cas di Cultura y a keda briya den musical di Grease den e hoofdrol di Sandy.
P’e, esaki ta solamente e cuminsamento. Su deseo ta pa sigui crece, representa Aruba den plataforma mas grandi, y sigui comparti su talento cu e mundo. Sin duda, Reanne ta un di e cara nobo di carnaval y musica Arubiano.
Built with Shorthand