TRANSFORMACION DI UN RUINA PA UN MUSEO CULTURAL BIBO

Rancho #14, antes un cas sera y bandona, ta den su proceso awor pa bira  un hoya restaura y ta bira tambe, e escenario perfecto pa e coleccion di arte priva aki. Entre e obranan cu lo keda ilustra, tin obranan pinta pa nos tata di cultura, Padu del Caribe, cual a keda concedi pa su yiu muher Vivian Lampe pa e exposicion aki. Adhunto tambe tin e expresion artistico di su sobrino Gustave Noël cu tambe lo cubri e murayanan di Rancho # 14, creando un exposicion di nificacion hopi special. Algun di e obranan aki nunca antes a keda exponi. Den nan forma, cada un ta yuda conta nos, e historia di ARUBA DI ANTAYERA.

ARUBA DI ANTAYERA – KICO E TA?

E idea tras di e exposicion special aki na Rancho # 14 - ARUBA DI ANTAYERA ta pa cuminsa duna un anticipo na e proyecto di mas recien di Susan La Bella, creador di Aruba Experience, kende a bin ta mustra su amor y compromiso pa mantene e historia y cultura di Aruba bibo y activo. Cu e amor aki, el a crea caba Aruba Experience, un coffee shop den un cas di mas cu 100 aña cu a keda restaura dunando realse na historia di Aruba unda local y turistanan ta reuni pa bebe un koffie of come algo, rondona pa historia y originalidad di Aruba.

Rancho #14-ARUBA DI ANTAYERA lo bira un ‘museo bibo’ unda aparte di aprecia obranan di nos artistanan local, lo por bay experiencia con nos antepasadonan tabata biba y comparti cu otro. E Proyecto aki ta den pleno desaroyo, unda e prome trabou di restauracion a cuminsa caba desde mediano di 2023. Idea ta pa e proyecto aki keda finalisa y keda completamente acaba pronto.

Pakico Rancho?
“Wel, Pakico no?” 

Pa Susan, e hecho di ta den pleno Rancho ta duna e proyecto aki mas balor ainda paso ta den un bario cu famianan ta biba y cu merece di haya atencion bunita y keda engrandece. Rancho #14- ARUBA DI ANTAYERA lo keda restaura den tur su grandesa, cu su vloernan original y su murayanan pela pa piedranan cu ta conta e historia di ARUBA DI ANTAYERA. E cas aki ta cubri un espacio amplio cu su cura cu ta core di un banda di caya pa e otro y lo bira un punto di encuentro y experiencia nobo, tanto pa nos localnan como nos turistanan.

ARUBA TA INVITA
E exposicion priva di Padu del Caribe y Gustave Noël lo habri oficialmente dia 25 di Januari 2024, coincidiendo cu dia di Betico.

"Nos ta invita cada ciudadano y turista pa experimenta e historia y beyeza captura na Rancho #14
un espacio di arte, cultura, y historia di
ARUBA DI ANTAYERA.