Skirbi pa: Jacqueline
E IMPACTO SOCIAL DI QREDITS
& E ROL DI AGRI FUND PA ELEVA AGRICULTURA COMO
INDUSTRIA SOSTENIBEL
Cu inicio di e di dos kwartaal di 2023, negoshi- y empresarionan ainda ta nabegando den e desafio y oportunidadnan di e mundo despues di pandemia. Qredits Aruba, e organisacion non-profit di microfinanza, a traha pa sostene empresarionan local y fortalece economia di nos isla mediante nan varios programa- y servicionan.
Den nos seccion di FLORIN, Branch Manager di Qredits Aruba, Nathaly Harms ta amplia riba iniciativanan recien y nan plannan pa futuro.
QREDITS SU IMPACTO SOCIAL NA ARUBA
Desde cu Qredits Aruba a cuminsa su operashonnan na Aruba na 2017 y a financia 382 negoshi local, loke ta representa un inversion di Afl. 13.4 miyon den e economia di Aruba. Tambe nan a yuda mas cu 1700 persona cu ta aspira pa bira of ta un empresario local, cu entrenamento personalisa y detaya riba cada plan di negoshi obteni. E factor ainda mas motivante di e presencia di Qredits den e panorama economico di Aruba ta cu 89% di Aruba su empresarionan cu a ricibi un prestamo 3 aña atras, awe ainda ta activo cu nan negoshi. Esaki ta un indicacion cla di e consistencia, balor y impacto di Qredits pa entrepreneur nan den nos comunidad.
AGRI FUND Y SU ORIGEN
Qredits Aruba a introduci un programa nobo pa yuda empresarionan den e sector di agricultura. E programa, conoci como "Agri Fund", ta soluciona e necesidad pa acceso na financiamento y guia pa (futuro) empresario nan den e sector di agricultura. E meta di e programa ta pa stimula, desaroya, y eleva e sector di agricultura como un industria y asina diversifica e economia di Aruba. E programa lo facilita e producto financiero "Agriloan" na un interes rebaha pa (futuro) empresario nan den e sector di agricultura y ta ofrece entrenamento cu ta guia (futuro) empresario nan pa traha nan plan di negoshi y plan financiero.
PRODUCTONAN FINANCIERO Y PREPARACION PA AGRI FUND
Qredits Aruba ta ofrece diferente productonan financiero na un tarifa di interes rebaha, den colaboracion cu Gobierno di Aruba.
“E producto financiero “Investment Loan” ta na un interes rebaha di 5.75% anual. E producto aki ta pa yuda comerciantenan existente cu ainda ta sinti e impacto negativo di e pandemia, y cu awor por inverti den nan compania. E Agriloan ta un financiamento na un interes reduci di 2% anual pa empresarionan den e sector di agricultura. E suma maximo di e prestamo ta Afl. 200,000.-, pa un termino di 5 aña.
DOELGROEP DI AGRI FUND & CON PA APLICA
E grupo di meta pa e producto Agriloan ta empresarionan nobo y existente den e sector di agricultura. Pa aplica, por yena e formulario di aplicacion cu ta obtenibel riba e website di Qredits Aruba. E documentonan mas importante pa companianan existente den e sector aki ta e estado financiero di e añanan operacional y pa companianan nobo ta un plan di negoshi y plan financiero.
AGRI BUSINESS ACADEMY Y SU IMPACTO
Na Januari 2023, Qredits Aruba y Ministerio di Asuntonan Economico a introduci e prome AGRI Business Academy na Aruba pa fortalece entrepreneurship den e sector di Agricultura. E programa educacional aki ta pa fortalece “Entrepreneurship” den e sector di Agricultura na Aruba por medio di ofrece empresario nan cu kier cuminsa cu nan propio negoshi of cu tin nan negoshi caba den e sector di Agricultura. Por medio di e programa aki ta ofrece e participante nan e oportunidad pa expande nan conocemento y experiencia den e area di “Business Management”, specificamente relata na e industria aki.
AGRI Business Academy
AGRI Business Academy
AGRI Business Academy
AGRI Business Academy
AGRI Business Academy
AGRI Business Academy
AGRI Business Academy tin un duracion di 12 siman y ta encera en otro les nan teoretico y practico guia door di expertonan local y internacional y ta inclui diferente bishita na agricultornan comercial na Aruba. Durante e programa tur participante ta haya e hermentnan esencial pa crea nan propio plan di negoshi. Na final, e participantenan ta presenta nan idea dilanti un panelista y nan ta ricibi nan certificado como cu nan completa e programa AGRI Business Academy.
E prome AGRI business Academy a finalisa exitosamente cu 20 participante y na Mei 2023, un segundo grupo di AGRI Business Academy lo cuminsa cu e programa aki.
CONCLUSION
Qredits Aruba ta mira hopi oportunidad y potencial den e sector di agricultura y lo sigi brinda e estimulo na e sector di aki por medio di e AGRI business Academy pa e agricultornan empresarial ta bon prepara y exitoso.
Pronto Qredits lo publica e resultadonan di e
“Social Impact Study 2022”
cu ta haci tur aña.
Built with Shorthand