E programa educativo aki a wordo haci posibel dor di e partnership entre Qredits Aruba y Aruba Bank N.V. Na inicio di e aña escolar 2022 – 2023 e partnership aki a ser formaliza por medio di un Carta di Intencion unda cu Aruba Bank N.V. a bira patrocinador di e proyecto aki.

E programa educativo di “BeYourOwnBoss” a introduci “Entrepreneurship” na un grupo di casi 600 studiante (14-16 aña) y a ekipa nan cu tur e habilidadnan empresarial necesario pa nan futuro. Ta importante pa e futuro generacion di profesionalnan wordo informa cu “Entrepreneurship” tambe ta un opcion di carera y mas importante ainda, habilidadnan empresarial ta wordo exigi no solamente ora un persona ta un entrepreneur, pero tambe ora cu ta traha den cualkier organisacion. Locual cu e studiantenan a siña durante e programa di “BeYourOwnBoss” nan lo por aplica den cualkier tipo di trabou cu keda escogi den futuro.

Durante e aña escolar studiantenan a sera conoci cu diferente comerciante local unda nan a comparti nan experiencia y conocemento di nan propio mercado. Por medio di tareanan practico studiantenan tambe a siña con pa haci un sondeo di e mercado local. Na final tur studiante a haya e oportunidad pa presenta nan propio idea di un producto of servicio durante e “Pitch Event” cu a tuma lugar na cada scol. Pa finaliza e proyecto, cada scol a scoge un grupo di studiante pa representa nan scol durante e “Final Pitch Event” cu a tuma lugar na Piso Tres.