Pierangely Wever ta mas c’un figura publico. Como influencer, docente, y muher cu a supera desafionan personal, su storia ta un inspiracion pa nos tur. C'un enfoke fuerte riba salud mental y amor propio, ta trece un mensahe poderoso pa 2025: “Bo curpa ta bo cas; cuida bo mes y no laga otro persona dicta bo balor.”
Pierangely Wever
Pierangely Wever
Pierangely Wever
Pierangely Wever
“Mi nunca a mira mi mes como influencer, pero ora hendenan manda mensahe of bin pidi pa saca potret, mi a ripara cu mi contenido ta yega hopi leu. Mi contenido ta mescla entretenimiento y inspiracion. Mi kier pa mi siguidornan por conbibi cumi, no solamente cosnan serio, pero tambe momentonan di humor. Y loke mas mi ta gusta ta ora cu e persona ta bisami danki pa share X storia cu nan por relata nan mes cu esaki. Ora mi por inspira un hende, mi ta sinti cu mi proposito a keda cumpli.”
“Mi meta ta pa sigui crece, no solamente riba nivel profesional pero mas importante, personal. Mi kier sigui inspira e comunidad Arubano, mustrando cu nos tur por stima nos mes y pone nos bienestar na prome lugar.”
“Baile ta mi pasion. E ta mi manera pa expresa mi creatividad y mi alegria. E studio di baile ta un espacio sigur unda tur hende por siña algo nobo, sali di nan zona di comfort, y ta nan mes sin miedo. Nos Arubianonan tin talento pa creacionnan di nivel mundial, y nos mester kere den nos mes.”
“Mi transformacion fisico a cuminsa cu Pilates den Maart 2024. E deporte ta mescla forza, flexibilidad, y concentracion. Durante un depresion den September, mi bienestar mental a bini den atencion. Mi a busca ayudo, practica meditacion y pone mi mes na prome lugar. Mi ta kere cu salud mental y fisico ta core hunto, y ambos ta importante pa bo felicidad.”
“Mi a lucha cu salud mental den mi bida, pero mi tabatin miedo pa papia di dje. Awor mi ta papia pa mustra otro cu nan no ta nan so. Busca ayudo no ta un señal di debilidad, pero di forsa. Awendia, mi ta mas fuerte danki na esakinan, y mi ta stimula otro pa trece e tema di salud mental dilanti sin miedo ni berguensa.”
“Mi studio di baile ta pa tur hende, di cualkier edad. Mi kier pa tur hende sinti nan mes comodo, expresa nan mes, y disfruta. No ta solamente baile, pero un manera pa crece como persona y conecta cu otro cu ta comparti e mesun pasion.”
"E desafio mas grandi tabata realisa cu mi no por haci tur cos pa mi mes. Mi tabata lucha cu depresion y mi a kere cu mi por ‘handle’ sin ayudo. Mi tabata bayendo atras cada dia no solamente mental pero fisicamente tambe dor di no come mes y ta tira riba mi cama sin kier lanta. Duda den mi mes, mi amor propio y mi forsa pa por sali di e situacion aki. Pero mi a ripara cu sin busca ayudo profesional, mi no lo logra. Mi famia y amigonan a duna mi e sosten necesario, pero mi a siña cu stima mi mes y busca ayudo ta e paso di prome pa sali di situacion dificil. Mi ta tuma tempo pa ta mi so, cana bandi laman, den naturalesa, refleha, pasa tempo cu mi animalnan di cas cu tabata y ta un comfort p’ami. Purba un hobby nobo y cambia di scenery. Aprecia bida, aprecia cosnan chikito y sigui scucha mi podcast, medita. Declutter mi apartamento, tira cosnan bieu afo y cu no ta den uzo afor, rebiba mi mes y mi bida. Cambio no ta facil, cambio ta duro pero na final ta pa miho. Mi apartamento tin un aire awo di paz y energia puro.”
“Mi a siña cu cada situacion dificil ta trece su motibo. Dios tin un plan pa nos tur. Mi mantra ta: pone bo mes na prome lugar, busca ayudo si ta necesario, y aprecia tur momentonan, grandi of chikito. Cambio no ta facil, pero ta manda nos caminda un futuro mihor.”
“Usa bo plataforma social; bo nunca sa con leu un video por yega. Caminda cu oportunidadnan y porta nan por habri pa bo. Tambe busca guia di profesionalnan pa refina bo talento. Inverti den bo pasion pa logra un nivel mas halto y desaroya bo mes pa ta bo mihor version.”
Mi ta traha cu monthly mantras. Cada luna mi ta cambia nan y mi ta skirbi nan riba mi spiel pa mi por wak nan tur dia y recorda mi mes. E luna aki e mantra ta : ✨I move forward with confidence . Mantra’s ta manera fluister bo corahe di tur dia y laga bo wanta bo energianan halto y bo enfoke ta cla pa bo por take it day by day. Recorda bo meta, ora bo wak’e den spiel!
“Mi kier sigui educa y informa via mi plataforma social. Mi plan ta trece mas consciencia tocante salud mental, amor propio y balor personal. Nos tur ta unico y merece un bida cu sentido.”
Built with Shorthand