“Mi a cuminsa cu Cheerleading Acrobatico y Breakdancing na Venezuela. Ora mi a yega Aruba mi a topa cu algun B-boys y Acrobatas y a cuminsa train y traha pa un compania di circo na e isla; basicamente mi a cuminsa cu e intencion pa haci videonan inspira pa DevinSuperTramp y for di eynan, mi a nota cu mi tambe tabata stima fotografia.” El a bini Aruba pa bishita su mama y e ta corda ainda cu un di e prome cos nan cu el a ripara y gusta di Aruba tabata con sigur e tabata. “Mi a enamora inmediatamente.” Establece su mes na Aruba no tabata facil. “Na prome pasobra apenas mi tabatin amigo nan, pero como esaki ta e Isla felis, despues cu mi a sera algun amistad, mi gusto pa e isla a aumenta mas y mas, te cu awe.”
Prome cu Petit a cuminsa haci fotografia comercial, el a pasa algun aña como un fotografo hoben. E transicion a sinti natural p’e, pasobra e ta splica cu realmente, e no tabatin pura. Pero ya pa e tempo cu el a cuminsa haci fotografia comercial, el a logra experimenta bastante caba. “Ami semper tabata artistico, pues p’ami, e cambio tabata mas den mentalidad di negoshi cu e tabata artisticamente pasobra mi tabata en buskeda caba pa ‘uniqueness in art’ den e banda di arte ‘ki. E prome biaha cu mi a tene un camara tabata berdaderamente un cambio p’ami pero sinceramente mi pasion a crece mas segun mas mi a siña. Inicialmente mi tabata kier ta un fotografo di ‘fine arts’ pero despues mi a haya e oportunidad, pa casualidad, pa asisti na un shooting di Vogue na Aruba. Desde e momento ey mi a realisa cu mi destino tabata pa mi ta un fotografo.
Bayendo bek, Petit ta corda e retonan cu el a topa cune pa cuminsa cu su negoshi di fotografia y por para riba su mesun pianan, facil e no tabata. “E prome dianan tabata dificil, specialmente pasobra mi tin un estilo scur den fotografia; y e tempo ey colornan suave y fotonan briyante tabata na moda. Mi ta corda cu hende tabata tuma contacto cu mi y bisa cu nan kier haci algun foto pero nan kier esaki ta ‘mas cla cu bo estilo normal’. P’ami, esaki tabata un problema grandi pasobra hende no tabata resonando cu mi estilo, pa mi a supera e problema aki mi a cuminsa manda clientenan mi website di portafolio p’asina mi por a splica cu mi por haci e fotonan cu nan kier, pero den e estilo cu nan por a mira riba mi website callmepetit.”
“Si mi mester a comparti un fotografia cu a resona profundamente cu mi, facilmente por ta e shooting di e Milky Way cu mi a haci na Turquia, e shoot ey a nifica asina tanto y e viahe tabata uno hopi desafiante.
E potretnan di mas grandioso ta wordo haci den pre-produccion. E unico manera pa adapta ta pa haci bo huiswerk, prepara pa e shoot y saca e potretnan cu intencion. Unabes cu bo sa kico bo ta bay haci, e ta facil pa cambia den estilonan diferente.
“Mi a inverti den hopi workshop, curso y naturalmente ekipo di camara manera un loco; prome hende tabata pensa cu mi tabata loco pa haci esaki te ora cu esaki a cuminsa duna resultado. Cu fotografia mi a siña cu inverti den bo mes mester ta e mihor ROI (retorno riba inversion) cu tin.
“Conoce bo balor y pone belasting riba dje”
Mi no ta considera mi mes un role model, pero mi ta consciente di e inspiracion cu mi trabou a crea rond di mi; mi ta haya mi mes cu hopi hende cu ta bin papia cumi riba con nan ta sinti inspira cu cosnan cu mi a haci y esaki ta mi mihor inspiracion pa mi mes.”.
“Yega na nivelnan cu ni mi mes ainda no sa di dje!
Built with Shorthand