Paul wong - Evolucion di un artista local

E tabata apenas den kleuter school na Rayo di Solo ora cu el a pinta su prome creacion; un “UltraMan”. Poco e mucha chikito ey por a pensa cu e arte aki lo bira un parti central di su bida. Ta ken no conoce Paul Wong awendia? E ta un artista cu ta keda proba su mes cu su talento innova constantemente.

“Semper mi a gusta pinta cartoons y mi a kere cu mi lo bay den animation, pero tur cos a cambia. For di tempo di scol caba mi a lanta mi compania Isla design’ y asina mi a cuminsa diseña creacionnan pa keda poni riba t-shirts pa bende cu turistanan.” Paul a sigui cu su estudio y arte y diseña pa companianan local, creando diseñonan unico dirigi tambe na localnan. Dado memento, bou inciativa di su tata, el a keda introduci na ‘customization’ di auto y brommer y crea su arte riba nan. Fast Forward na awe, e ta spuit auto ainda pero awor a expande su arte riba muraya, canvas y hasta cu sketches den bukinan pa mucha. E evolucion di Paul Wong ta uno natural yena di color y creatividad. “Mi ta gusta e cos ‘ki, mi t’ey pa hopi tempo caba den e mundo aki. I just go with the flow y mi ta gusta cu otronan ta aprecia mi arte”. Awe, Paul ta repasa cu nos su evolucion haciendo loke e ta stima ainda cu mesun pasion di decadanan atras.

Hopi hoben artista ta lucha cu e dificultad pa haya nan estilo unico. Kico a yudabo descubri bo enfoke propio pa arte, specialmente den e area di spuit y personalisacion di autonan?

Mi semper tabata interesa den arte, prome cu mi a cuminsa spuit auto y brommer, mi tabata diseña y skirbi mi mesun t-shirt nan, asina cu ora cu mi a cuminsa spuit autonan, mi sa cu mi mester a agrega e sabor artistico ey na nan.

Con e integracion di hermentnan digital a influencia bo den e proceso artistico, y ki conseho lo bo ofrece na hobennan artista cu ta navega den e era digital aki?

Hermentnan digital semper ta bon, pasobra e temponan ta cambia. Era digital ta haci bida hopi mas facil.

Bo ta conoci como un artista dinamico cu no ta tene miedo pa explora medio y estilonan nobo. Bo por comparti algun conseho tocante con artistanan por acepta cambio y sigui evoluciona den nan ramo?

Bo mester sali for di bo zona di comfort. Mi a cuminsa pinta murayanan uzando paintbrushes combina cu airbrushing y tin biaha asta paint cans.

Riba bo Instagram, bo a menciona bo amor pa BMX freestyle y mini-trucks. Con e interesnan personalnan aki ta cruza cu bo arte, y nan ta inspira algun proyectonan of tema specifico den bo trabou?

Lante den aña 80, mi tabata sigui e tendencianan di moda. Esaki tabata e miho temponan di mi bida como hoben. BMX freestyle tabata colorido, cu arte y diseñonan impresionante. Y encuanto na e mini-trucks, nan tabata impresionante tambe cu nan grafico nan y colornan. Y te awe ainda mi ta practica BMX freestyle y tin un mini-truck, lol!

Bo a participa den ferianan di arte y a ilustra bukinan pa mucha. Kico ta e desafionan y recompensanan cu bo a experiencia den e diferente empeñonan creativo aki, y con nan ta forma bo biahe artistico?

E desafio cu e ferianan di arte ta cu bo mester expone bo obra na publico, bo kier pa otro aprecia bo arte, y despues e recompensa nan ta bin. Y bo por conoce hopi artista cu ta comparti e mesun pasion cu bo. Esaki a duna mi hopi confiansa den mi mes como artista. Pa traha e bukinan di mucha tabata un logro grandi den mi carera artistico. Mi tabata masha honra pa e oportunidad aki.

Aruba ta conoci pa su beyesa natural, pero ta bira mas consciente di importancia pa pusha arte como un expresion di identidad di e isla. Con bo ta mira e papel di arte ta evoluciona na Aruba?

Aruba definitivamente ta un isla alegre di arte! Arte a bira mas prominente den e ultimo añanan, ta bunita. Aruba tin hopi talento, y e ta sigui crece, unda cu bo mira, tin arte.

Durante e añanan, e perspectiva di arte riba muraya, manera grafiti, a transforma. Con bo ta mira e evolucion aki, y con bo lo bisa cu arte riba muraya ta contribui na exprecion cultural y resistensia, specialmente den movementonan reciente contra desaroyonan manera hotelnan?

Cual ta un creacion cu bo a traha cu ta hopi special pa bo te awe?

Mi no sa, tur nan ta diferente, posibelmente e muraya mas grandi cu mi a pinta pa e feria di arte "Mi Forsa," cu tabata nos escudo nacional a la Paul Wong, lol.

Bo por comparti algun di bo meta y proyectonan artistico futuro cu bo ta entusiasma pa realisa?

Mi ta sinti mi mes bendiciona pa a yega asina leu, y si tin mas, laga bin! Cada proyecto of obra di arte ta un desafio pa mi, y esaki ta e parti emocionante, lol.