Na mas c’un ocacion, nos a comparti e pasonan di e trayecto di Patrick vd Linde como ciruhano plastico. Den cada entrevista, semper Patrick su deseo tabata di bolbe bek Aruba, un dia, unda el a lanta y tin su famia y su fundeshi, cu ta su mama Irene vd Linde di Laboratorio Familiar. Despues di 17 aña leu for di cas, Patrick vd Linde awor ta bek na Aruba, y e no a bolbe man bashi. E experiencia y conocemento cu el a acumula durante su aña nan afor ta incomparabel y Aruba ta prepara pa ricibi tur e beneficio nan aki.
E trayecto di Patrick pa bira un ciruhano plastico no tabata uno simpel. E a cuminsa su formacion na Merca unda el a haci 2 aña di Pre-Med. E siguiente parada tabata Costa Rica, unda el a dedica 7 aña di su bida studiando medicina. E deseo pa specialisa su mes ainda mas a conduci’e pa Bogota, Colombia. Esaki no tabata un tarea facil, considerando e competencia fuerte pa e poco lugarnan disponibel pa e specialisacion. “Mi a gradua cu e cifra di mas halto y asina mi a bira e prome extranhero cu a drenta na e Universidad de Rosario. Eynan mi a keda 4 aña. Tabata net e epoca di FARC unda como medico, nos tabata bay den campo of traha na hospitalnan temporal trahando cu hendenan den estado di trauma extremo sea pa motibo di explosion nan di bomb of otro agresion nan severo.
Pues nos tabata den un campo militar. No ta solamente su formacion academico a distingui’ Patrick, pero tambe su abilidad pa adapta na situacionnan dificil. Su reputacion a crece, y no a tarda pa Brazil reconoce su talento, invitando’e pa haci un specialisacion adicional den cirugia plastico na Universidad di Sao Paulo, un di e mihornan den mundo. “Nan mes a puntrami pa aplica pa haci un specialisacion adicional den Cirugia Plastico Reconstructiva y Microcirugia di Reconstruccion. Mi ultimo aña na Colombia, mi a siña Portugues y asina mi a logra cualifica pa haci residencia na e Universidad di Sao Paulo (di 6 top na mundo) unda mi a studia y traha pa 5 aña mas.
Awor cu e ta bek na Aruba y despues di a traha pa hopi tempo na varios hospitalnan top na otro paisnan, Patrick ta mira e diferencia c’un hospital manera Aruba. Den comparacion cu hospitalnan grandi, Aruba su hospital chikito ta brinda un ambiente di confiansa unda tur hende ta conoce otro. E similaridad c’un hospital rural na Costa Rica ta resaltante, unda e preshon ta menos y e equipo ta mas compacto. Pero di otro banda, hospitalnan mas grandi den exterior ta presenta otro retonan: nan ta concentra riba investigacion, adaptacion di tecnologia nobo, y un enfoque academico riguroso constantemente. E diferencia mas notabel ta na Costa Rica, unda e sistema di enseñansa medico no ta limita studiantenan na simpel observacion. “Na Merca, studiante nan ta djis observa mientras na Costa Rica, bo ta haya oportunidad pa cuminsa traha cu pashent hopi mas prome y ta siña hopi liher.”
Despues di un trayectoria briyante den exterior, Patrick a sinti e yamada di su tera natal: Aruba. El a acumula sabiduria y a conoce tecnologianan avanza den mundo medico, particularmente den area di estetica. Desde paisnan inovativo manera Brazil, unda desaroyo medico ta na un nivel halto, Patrick a adkiri conocemento di instrumentonan avanza. Por ehempel, e uso di CO2 laser pa tratamento di wrinkles y 'rejuvenation', of e aplicacion di ultrasound pa acelera proceso di cirugia.
Den su coleccion, tin mashinnan cu ta revoluciona e industria: un aparato pa liposuction cu ta incorpora vibrashon pa desintegra vet y otro di tipo Vaser-lipo laser cu ta facilita e proceso di remove vet. Tambe tin e impresionante mashin di Renuvion di plasma, cu ta crea un conexion entre piel y musculo, perfecto pa esnan cu piel flacido. Pa e cuidado facial, e mashin Morpheus8 ta combina radiofrecuencia cu micro-needling, creando un efecto rehuvenecedor.
Pero e no ta djis e technologia cu ta haci e diferencia. Ta Patrick su dedicashon y pasion pa su profesion cu ta marca e diferencia real. Y awor, c’un clinica arma cu e ultimo innovashonnan, Aruba por spera un servicio di nivel mundial den campo di cirugia estetico. Nos isla chikito tin e privilegio di tin un profesional cu tal nivel di expertisio bek na cas, dispuesto pa sirbi su comunidad.
Aruba Plastic Surgery and Aesthetics Clinic
Nieuwstraat 48, Oranjestad
Info@arubaplasticsurgery.com
582-2249
Built with Shorthand