Den e entrevista unico aki, nos ta explora e bida fascinante di Pastor Jairo, un figura prominente den comunidad di Aruba, kende a logra balansa su carera espiritual cu su pasion pa musica. Conoci pa su perspectiva autentico y directo, esaki ta Pastor Jairo y su storia riba su entrada sorprendente den e mundo di musica di carnaval.
Mi ta kere cu na edad di 15 aña ya caba e pensamento ey a bini na mi mente y Pader Bouman O.P. a yudami haya mas claridad riba e asunto aki. Tambe Mgr Ellis a yuda habri portanan p’ami por a cuminsa studia, cuminsando na Corsou, despues na Venezuela. E dicon bira pastor ta pasobra mi ta kere cu esaki Dios kier cu mi y mi ta sintimi asina util pa tur hende y pa conecta nan cu Dios.
Den e 19 aña cu mi ta pastor, mi mester bisa cu hopi gratitud na Dios cu te ainda mi ta sinti mesun emocion y alegria, apesar cu sa tin dianan complica. Dia di mi ordenashon tabata 31 di July 2004, mesun dia cu mi a haci 33 aña di edad, y mi por bisa cu Dios a regalami sacerdocio, cual p’ami ta e regalo mas grandi cu Dios a dunami. E dia ey, mi tabata hopi nervioso y emociona, pero tog mi tabata hopi sereno tambe y mi a percura pa biba e ceremonia di ordenacion y mi a celebra mi prome misa dia 1 di Augustus 2004 na misa di Dakota, cu asistencia di Pader Jan Bouman O.P.
Cada hende tin su personalidad na momento cu e ta keda ordena Sacerdote, esaki no ta caduca. Dios a yamami manera mi ta y e no kier pa mi kita nada, pero si, pa mi keda semper den su presencia den bida di oracion y tambe den cercania cu hende, sin tanto protocol, sin crea distancia. Mi ta kere e ta algo manera Papa Francisco ta awor aki. Mi ta sintimi cu mi mester ta den pueblo y atento pa tur cosnan cu ta tuma lugar den bida di hende.
Ora tin algo cu segun mi opinion no ta bon, mi no por keda trankil! Mi no ta gusta inhusticia y mi no tin temor di expresa loke mi ta pensa den berdad!
E manera cu ami ta comprende Evangelio kizas ta haci mi forma di ta un poco skerpi riba algun asunto. Mi no ta sintimi intimida pa ningun hende sea cual sea su posicion den comunidad, ora e no ta hacie bon, ami como Sacerdote tin un mision di yama atencion riba e asunto. Hesus a haci mescos. Semper den caridad, pero tin biaha, awa sa pasa hariña.
Hende por bisa berdad cu mi por ta rebelde, algun ta yamami “The Devil Himself” Hesus nan a acuse cu e ta haci milager cu forza di “Belzebu”, pero mi ta un hende profundamente spiritual, mi ta reza hopi y mi forsa mi ta haya den celebrasion Eucaristico (Misa) y den Dios su palabra.
Den transcurso di 19 aña como pastor, mi tabatin diferente escenario di trabou pastoral y mi por a maneha tur y den tur mi a topa diferente abilidadnan. Prome cu mi a bin bek Aruba, pa 5 aña mi tawata ‘military chaplain’ na Caracas, tambe den formacion di e futuro ‘military chaplains’, pues mi tabatin un bida di hopi disciplina militar trahando pa soldadnan y den mes tempo mi mester a participa den loke ta nan bida. Esey a yudami hopi di mira un poco mas leu di ta un Sacerdote solamente. Ora mi a bin bek Aruba, tabata un reto pa cuminsa un parokia di poco recurso y tog a logra haya tur hende na mi banda cu mi entusiasmo y alegria y nos a forma ekipo pa traha den parokia te cu nos a restaura e misa totalmente. Esey tabata parokia Cristo Rey na Brasil. Un dushi parokia. E abilidadnan ta perseverancia, tuma iniciativa semper y hopi alegria y cercania cu hende! Mi ta gusta traha den “Team”. Awor na parokia na Santa Cruz, esey no ta un excepcion, mi tin un dushi ekipo di trabou aki tambe!
E unico instrument cu mi a studia bou di Maestro Oscar Steba y George Viguer tabata Trompet. Cu esey so mi por lesa musica riba partitura. Loke ta piano, clarinette of saxofone, tur esey ta for di di cabez mi ta toca scuchando e musica y toca. Pero mi tin un meta pa 2024, esey ta studia piano sea c’un maestro of riba mi mes cu youtube!
Carnaval no ta algo nobo p’ami. Di un of otro manera mi tabata participa. Como hoben mi a participa den Academy Brass, y despues semper mi a bay wak carnaval, bay jouve morning y algun biaha last lap. Awor mi ta participa cantando un power soca! Nunca mi a pensa cu esey un dia lo tuma lugar. Mi amigo Ofo di Nfuzion band pa masha aña tabata mi tras pa canta un
calypso y semper mi tabata bir’e, semper mi ta busca excusa pa no participa, pasobra e idioma ingles, mi no ta fuerte aden.
Pero e biaha ‘ki mi a bisa “SI” pa carnaval 70! Mi a bise mi kier bay c’un “Power Soca” cu hopi ritmo y pikete! Mi no a tende nada mas, te cu Danny Koolman a aparece na mi pastorie pa nos papia e asunto y di e forma ey, ya no tabatin awa pa laba! The Priest ta aden!
Na principio tin hende no kier a kere! Tin hende cu no a gusta e idea, pero mayoria a sostenemi te cu awor di e mihor forma!
Mi Mama a bisami “Bo cuenta”, pero semper e ta apoyami den tur cos.
Pastor Jairo mester a pidi permiso na su superior/obispado pa esaki?
Cu mi mester a pidi permiso, esey mi no sa, tampoco mi lo no a hacie! Obispo no a bisami nada directamente. Pero den mi concepto, no tin nada malo aden, pasobra ta musica. E cantica ta papia di “Fiesta”, no tin nada bulgar den letranan cu por scandalisa.
Experiencia te cu awor?
Dushi mes mes!!!! Mi a sinti mi pueblo cu mi! E dia na The Venue ora mi tabata canta casi mi no tabata scucha mi mes di e desordo cu e hendenan tabata haci, tur hende tabata ariba pia, mi mester a concentra hopi pa canta e soca manera mester ta y tur hende a goza. Ora mi yega na The Venue, hendenan tabata mira mi manera ta kico Pastor Jairo a bin haci aki? Pasobra no tabata conoci cu mi ta bay canta y menos un power soca. Musica y canto ta un expresion Magico. Bo ta yega serca tur hende. Di un of otro manera mi mester a conecta cu mi mes un Pueblo. Hopi hende a bira mas cercano cu mi y esey ta yudami hopi den mi trabou pastoral, pasobra nada no a cambia mi a keda e mes un Sacerdote cu ta sirbi Dios cu alegria.
Esaki ta un storia hopi interesante! Ofo a pidi Danny Koolman y Dolfi Richarson pa hinca algo den otro. Danny ta conta mi cu e mester a haci oracion prome y bisa Dios cu si esaki ta bon, dun’e inspiracion, sino laga cos para! Dios a scucha Danny su oracion!!! Melodia a drenta su cabes ora e tabata baña y Dolfi a pone letranan! Cu hopi cautela nan a acercami pa mi por a
aproba esaki! Mi a haye bon!, pero Nigel Hoek a bin aden y a buta un “House” aden y esaki tabata e cherry riba e bolo! E cantica yama D,Fiesta y ta papia di nos celebracion di Carnaval 70 cual ta un celebracion pa henter nos nacion y cu mi presencia aden, e congregacion tambe ta keda integra aden. E pueblo di Dios semper ta participa cu tur cos! Ta hendenan cu ta bay misa tambe ta celebra y bay wak carnaval.
Musica ta yudami hopi! E ta un regalo di Dios p’ami y pa mi por comparti cu otro. E ta un forma cu mi ta expresa mi mes na otronan y na Dios. Den momento dificil, den musica mi ta haya descanso, sea mi ta toca trompet, canta of toca piano. Mi no ta unico pastor cu ta musico of ta canta, ta hopi tin. Musica ta yudami conecta cu mi congregacion, hopi biaha durante predicashi mi ta canta algo y pone otro canta mee.
Mi ta opta pa keda cu tur loke ta positivo!!! Aki na Aruba bo no por complace tur hende. Simplemente hopi hende ta apoyami. Ta awor mi a canta Soca, mi a yega di canta den festival di mariachi y mas tanto mi ta canta cancionan religioso. Mi a yega di graba cu Mariachi Lirios del Campo, Robert Maduro su banda un cantica di pasco, mi a graba un cantica cu Jeon a yega di compone pa pasco, cu Koor Luz y amor na Corsou y Koor Santa Famia di Corsou tambe, cual porcierto Koor Santa Famia kier pa nos haci algo cu e soca! Si mi papia di reaccionan negativo, ya kico mi por bisa!
Algun artistanan grandi a cuminsa den misa! T’e ainda tin musiconan cu ta toca den banda ta toca den misa tambe. Dios ta esun cu ta duna nos talento pa nos por sirbi’e y deleita otronan tambe.
P’awor no tin nada den mente, pero si yega un oportunidad pa graba algo, semper mi lo ta dispuesto di pone mi stem y musico nan pone e melodia! Mientras tanto mi ta sigui toca den Kerki Protestant na Playa cu Trompet y si mester canta solista den un koor cual mi a haci algun biaha lo mi sigui hacie.
A haya reaccion for di obispado na su participacion na carnaval?
Absolutamente nada!
Pa canta un Soca cu letranan cu ta sano y ta papia di un celebracion, no tin problema. Si e tabata bulgar of ta promove violencia, odio, inmoralidad, anto e ora ey si, mihor mi no participa mes! Tempo mi tabata studia den seminario, mi ta corda un Obispo, esta Monsenor Roberto Luckert de Leon, Arzobispo Emerito di Coro, semper e tabata gusta pa mi canta un Gaita “Amparito” mi ta corda cu mi mes tabatin un pensamento un poco eroneo riba cantamento di otro cosnan cu no ta canto religioso y mi a descubri durante mi añanan di estudio cu nos mester yega na pueblo di Dios hasta participando un tiki di loke nan ta haci ora e ta bon! Tambe mi mester a siña canta “Caballo Viejo” di Simon Diaz. Nos formacion como Sacerdote, den mi caso anto, a hinca nos di cabes den cultura musical. Nos a studia retorica e arte di papia bon, y “canto gregoriano” cantonan liturgico, pero den momento di cualkier celebracion den seminario nos tabata canta cantonan popular.
Down to earth tur momento! Cercano cu hende, sea ken sea e ta! Cu hopi seriedad, na mes tempo cu alegria y humor. Mi Sacerdocio no a cambiami, mas bien a enrikece mi personalidad. Dios ta bon tur momento, p’ami esaki ta un responsabilidad hopi grandi y mi ta pidi Dios pa semper mi por ta un bon Sacerdote! Mi ta hende si! Mi ta hopi consciente di esey, mi tambe tin luchanan, pero mi kier presenta e cara di Dios na e mihor manera. Mi ta stima di ta Sacerdote, den dje mi ta haya hopi forza y tambe tog contratemponan! Mi mester hiba Dios den un mundo moderno cu mi predicashi carga cu berdad y mi oracionnan y laga hende comprende cu Dios tey pa nos tur!
Si Pastor Jairo por a scoge un artista famoso, pa haci un dueto, kende lo e ta y pakico?
Pa Canto Lirico: Andrea Bocelli!Pasobra mi ta stima e forma di cantamento lirico ey, p’esey e “Figorrofi Figorofa” den e soca!
Pa Canto Soca: Lord Boxoe! Pa Soca, semper mi a gusta Lord Boxoe, mi ta gusta e musica ey y tambe tur loke el a ofrece pa hopi aña na nos carnaval!
Built with Shorthand