No menos cu 23 aña pasa, Nadya van Putten a subi avion cu e pensamento cu e ta bay studia na Hulanda y manera e termina su estudio, e lo ta bek na su cas. Sinembargo oportunidad y varios paisnan despues, a cambia esaki.
“Nunca mi a pensa lo mi a keda hopi tempo for di mi isla Aruba, pero bida di berdad ta dunabo sorpresa. Ultimo, despues di 8 aña bibando y trahando na Sint Maarten como directora di Fondo di Pension APS, mi tabata cla pa e reto nobo cu a presenta. Na momento cu mi a keda aserca pa Nagico pa e posicion di Directora, mi a sinti cu ami y Nagico lo ta un bon match.” Y asina, e caminata pa bolbe bek cas a keda crea y 2024 a habri Nadya, c’un trabou nobo pero bek na su isla natal. Su regreso simbolisando no solamente un cambio den carera profesional, pero tambe un reafirmacion di su lazonan cultural y familiar cu Aruba.
Durante su añanan leu di Aruba, Nadya a logra construi un caminda profesional impresionante, desde liderazgo te na politica. "Nunca mi a limita mi mes. Mi gusta evoluciona y educa mi mes." Trahando na Hulanda bo ta siña traha cu structura pero den Caribe bo ta siña cu flexibilidad ta un caractertistica hopi importante.
Mi por combina e dos abilidad nan aki hopi bon. Mi estilo di liderazgo ta uno cu structura pero cu curason. Na Hulanda, te cu na 2013, Nadya tabata forma parti di e escena politico y e partido Groenlinks na Hulanda. “Si mi wak atras ta un periodo di mas di dies aña cu mi a dedica na politica cu hopi amor. Partido GroenLinks (y casi tur otro partido politico na Hulanda) ta hopi bon organisa. Mi a uni na e partido na inicio como studiante y mi tabata yuda den diferente faceta di e partido entre otro parti flyer, forma parti di werkgroep, te yuda skirbi programa di partido.
Mi a haci mi stage na GroenLinks, Mi a participa den eleccion na Rotterdam y bira un burgerraadslid (part-time raadslid) representando mi partido Groenlinks na Rotterdam pa 4 aña. Mi a participa den elecion di tweede kamer y parlamento Europeo. Mi a conoce e partido, politica Hulandes y asina mi a siña e arte di negosha y crea relashon cu asociado nan. Esaki ta un experencia cu ni un buki por siñabo.
“Mi integridad ta algo sumamenta importante p’ami. Mi a confronta cierto reto nan cu a presenta pero mi nunca a desvia for di e norma y balornan cu mi mayornan a lantami cune.”
Como directora di Nagico, cua ta bo metanan y vision principal?
Mi meta pa e siguiente añanan na Nagico ta pa pone e empleadonan central. 2024 mi enfoke principal lo ta pa sigui amplia y mehora riba e tereno di comunicacion.
"Crecemento economico tabatin un impacto positivo riba industria di seguro, treciendo un demanda riba diferente tipo di producto.” Nagico lo sigui evoluciona y innova den su servicionan di seguro, continuamente desaroyando pa un miho experiencia pa nos cliente. Nos meta ta pa provee un experiencia mas personalisa, ofreciendo solucionnan cu lo sobrepasa e expectativa di nos cliente, fomentando asina un relacion riba termino largo a base di confiansa y seguridad.
Curashi y determinacion; “Invita bo mes sali di bo zona di comfort, no laga miedo wanta bo atras. No bay tras di comentario nan manera “Bo ta mucho jong” “No purba mes” Esey ta algo pa hende homber” Si mi a bay tras di e comentario nan aki nunca mi lo a experencia tur e oportunidad nan cu a presenta durante mi carera profesional. No tur ora cos nan ta bay manera cu nos kier, e ta admiti, reconociendo cu retonan y obstaculonan ta parte integrante di crecemento personal y profesional.
Awor, como directora di Nagico, Nadya ta enfoca riba fortalece e area di comunicacion y pone e empleadonan den un lugar central. "Nagico lo sigui evoluciona y innova," e ta afirma, enfatisando su compromiso pa ofrece e mihor servicio posibel na cliente.
Nadya ta resalta e sentimentonan profundo ancra cu su regreso na Aruba: "No tin nada pa iguala, ni remplasa e pida baranca unda mi a nace y wordo cria, cual ta keda nos dushi isla Aruba. E sentimento di ta na cas, den calor di mi famia ta incomparabel."
Built with Shorthand