Na e skina di Paseo Herencia Mall na Noord, bo no por pasa sin ripara un trailer masha unico di apariencia retro. E ta un airstream blanco y blauw, transforma den un bar di frozen yogurt cu dushi toppings, ta crea cu decorashon artistico cu dichonan referente na mythonan Griego, lama, figuranan inconico di e periodo Griego, cu tin e nomber: MYTHOS. Y probabelmente, si bo a para pa purba un di nan frozen yogurt, bo loo compronde e sentimento, e ta djis un vibe. Segun Martin Alvear (25), fundador hunto cu su ruman muher, esey mes ta parti di e experiencia cu nan kier a crea.
Martin su idea pa Mythos no a yega di un dia pa otro. El a conta cu e inspiracion a bira mas cla durante un serie di biahamento cu su ruman muhe den zona mediterraneo. “Nos tabata hopi atrai pa e estilo di bida mediterraneo; fresco, natural y saludabel. Nos a gusta e combinacion di Greek Yogurt cu sabor di un dessert y ice cream. E idea tabata: kizas nos por traha un treat cu ta dushi, pero cu toch bo por sinti bon ainda despues di come?” Esey a bira punto di salida pa un idea simpel, pero cu hopi posibilidad.
Un gran parti di loke hende no ta mira, ta e trabou inicial tras di un negoshi, den e caso aki e tabata asina. Martin a bisa cu nan a tuma mas o menos un aña pa desaroya e idea completamente, den tur detaye. “Nos a traha un plan serio. Nos a investiga productonan alternativo, sigui cursonan, y consulta cu expertonan cu por a yuda. Nos no tabata kier simplemente habri un bar di yogurt, nos kier a lansa un producto cu calidad real, cu sosten.” E pasonan cu a sigui tabata structural: desde e seleccion di e yogurt, importacion di topping di bon calidad, y mesun importante; crea un identidad visual y emocional cu ta combina cu e historia di ‘Greek Yogurt’.
Den e prome fase di desaroyo di Mythos, Martin ta corda un momento esencial: “Nos a pasa pa un momento literalmente tipo Eureka. Nos a realisa cu Grecia no tabata solamente un inspiracion visual, pero un elemento fundamental den nos producto.” Grecia ta, despues di tur cos, e lugar di origen di Greek Yogurt y un pilar den nan estilo di alimentacion. Pa Martin, e decision pa enfoka riba e tema Griego tabata natural y necesario. “Pa medio di storytelling y branding, nos kier pa nos clientenan compronde cu nos producto no ta solamente sabroso, pero tambe bon pa e sistema digestivo.”
No tabata facil pa habri Mythos. Un di e desafio principal tabata e mesun duda si un concepto manera esaki lo traha na Aruba. Tambe e costo di importacion, preocupacion riba calidad, y duda si e mercado Arubiano tabata cla, tur cos tabata un reto. Pero, nan a sigui. “Nos tabata na un paso pa habri e concepto na un otro luga,” Martin ta confesa. “Pero mi ta kere cu algun cosnan simplemente ta destina p’abo. Aruba a bira cas oficial di Mythos, y mirando atras, nos ta feliz cu nos a dun’e un chens.”
Segun Martin, e meta principal no ta solamente pa sirbi algo sabroso, sino pa duna clientenan e oportunidad pa crea un ‘treat’ segun nan propio smaak y gana, cu e variacion di topping y sabor cu nan ta desea, sin e peso di sinti culpa despues. “Nos kier pa hende disfruta, sinti bon, y cu nan kier bolbe,” e ta bisa. Compronde kico bo ta bende, no ta solamente basa riba un producto, pero tambe un sentimento.
Pa Martin, un mentalidad disciplina ta fundamental si bo kier cuminsa un negoshi. “Bo mester ta consistente, pero tambe rondona bo mes cu hende cu ta kere den bo,” e ta bisa. Mentor, guia y un red di sosten ta esencial den e proseso. Martin ta inspira pa esnan cu a persegui nan soño y cu kizas otra a yama nan pa ‘loco’, pero cu asina mes a mantene nan rumbo y a logra haci esaki realidad. “Esaki ta un arte propio,” e ta bisa.
Kico ta su momento preferi? “Ora un hende sali for di e Airstream, tuma un hap, y saca un sonrisa of un expresion positivo di aprobacion, esey ta e momento cu mi ta sinti mas orguyoso di dje.”
Un Mythos no tabata basta. “Nos a habri nos di dos lokaal na Palm Beach na cuminsamento di Juli,” Martin ta bisa cu orguyo. “Y nos tin plannan grandi pa 2025, incluso pafor di Aruba.”
Built with Shorthand