Moises y su famia a yega Aruba ora cu e tabata tin apenas 6 aña. Un mundo nobo, cu promesa di un futuro miho cu nan tabata conoce na nan pais di origen, Republica Dominicana. “Tabata ami, mi ruman muhe, mi mama y mi tata. E soño di mi mayornan semper tabata pa nos tin un miho futuro, pa nos bay mihor scolnan y siña mas idioma. No tabata solamente un adaptacion na un cultura y idioma nobo, pero tambe na un estilo di bida cu ta diferente di unda e ta bin. Creciendo na Aruba, Moises a desaroya un pasion pa e mundo culinario.

“For di chikito nos a custuma di ta den cushina y yuda nos mayornan. Mi mama mes tabata un banquet chef dus por bisa cu e ta un cultura den nos cas. Semper mi a gusta ta den cushina, yuda mi mama corta berdura y poco poco cushina tambe. Asina el a cuminsa crece den mi mas y mas cu a yega un tempo den mi infancia unda cu mi mayornan a separa y mi mester a bira mas independiente y cuminsa cushina pa mi mes. Mi a realisa cu mi echt gusta ta den cushina.” Asina, un soño a nace: e deseo di bira un chef reconoci.

E tabata un caminda un poco mas largo y duro, compara cu hopi di su amigonan cu el a wak subi avion pa sigui cu nan estudio. Aunke no tabata un leuk feeling di wak con bo amigonan y compañeronan ta bay afo y sigui cu nan estudio pero esey no a stop mi di sigui traha y avansa. E tempo ey mi no tabatin paspoort Hulandes pa por bay studia afo pero asina mes mi a logra caba scol na Aruba, incluyendo EPI.” Sin e oportunidad di studia arte culinario den exterior, Moises a enfoca riba lo cu e tabatin na man: experiencia di trabou.

Cu 16 aña, Moises a cuminsa traha den cushina Italiano na Solemare, siñando c’un autentico chef Italiano. El a traha na varios restaurant manera Gianni’s y Daniel’s Steak House prome cu el a bay busca mas experiencia cu otro chefs profesional na Aruba, incluyendo na Hyatt, Riu, y Renaissance. Cada chef a dun’e mas conocemento y abilidadnan. Chef Gerald, un experto Frances, a siña Moises no solamente tocante cushina, pero tambe con pa trata clientenan y nan expectativanan. Danki na Gerald, Moises a gana experiencia den French Cuisine. Awendia, e tin experiencia den varios estilo di cushina, incluyendo Italiano, Frances, Hapones y Mericano, y e ta disfruta di e fusión cu el a crea. Mi a echt enjoy cada momento di tur caminda cu mi a siña y a yuda crea e tipo di fusion cuisine cu mi a crea awor.”

“Pais Aruba a yudami masha hopi mes na bira e chef y co-owner cu mi ta awendia. ‘Kinan mi a crece, studia, siña y desaroya tur loke mi sa. Mi ta hopi contento di a crece kinan. Danki Dios, nos isla ta un isla multicultural y cu nos hendenan semper ta ricibi tur esnan cu kier bay dilanti y siña cu brasa habri. Desde dia cu mi a yega Aruba nunca mi a sinti mi discrimina den ningun sentido.

Kico e palabra stranhero ta nifica p’abo?


P’ami e palabra stranhero no ta nifica nada, pasobra p’ami tur hende ta mesun cos y nos tur tin derecho di busca un miho futuro pa por ofrece lo mihor pa nan mes y nan famia, sea na nan pais di nacemento of den exterior. Bo no por huzga un persona djis pa nan nacionalidad. Bo no sa den ki situacion e persona lo ta cu el a dicidi di sali for di su pais y laga su famia y amistad atras pa bay na un otro pais desconoci y purba crea un miho bida. Mayoria “stranhero” ta e personanan di mas trahador cu tin tanto na Aruba como na cualkier otro caminda.”

E CREACION DI
CATCH ARUBA

“Catch a cuminsa como un proyecto entre ami y mi dos socionan Hakeem y Jeff. Hunto cu Jeff, nos ta socio y amigonan di basta aña caba. Covid a dal y mi a cuminsa cu mi private chef services Chef Life Aruba mientras cu Jeff ta traha cu water sports y e ta recomenda guests y viceversa. Entre un di e clientenan cu el a recomendami, mi a conoce Hakeem. E ta un meneer Mericano cu mi a cushina p’e y ta un persona cu ‘high end taste in cuisine’. El a gusta mi cuminda hopi mes, te cu cada biaha cu e ta na Aruba, mi tabata cushina p’e. Nos a crea un amistad y den un di nos charlanan, nos a papia di futuro proyectonan. A resulta cu tanto e, Jeff y ami tin e mesun ideanan y asina nos a dicidi di forma un sociedad y di e forma aki, despues di 1 aña di esfuerzo y dedicacion, Catch a bira realidad.”

Mi ta duna danki na Dios na prome luga paso sin Dios nos dilanti, e soño aki no lo por a bira un realidad. Mi por bisa cu cada sacrificio, cada momento tabata ‘worth it’. Awendia mi ta e persona cu mi ta, danki na siña di tur e lesnan di pasado.”

Item 1 of 4

“Kizas bo ta sinti cansa y cu bo no lo yega na wak e lus na final di e tunnel, pero keremi bo lo make it. Cada dia ta un logro cu cada stap no importa con chikito of grandi. Tur persona exitoso a pasa den duro. Tuma cada ‘loss as a lesson’. Tur loke bo ta pasa aden ta un les pa un miho version di bo mes.”

“Mi ta spera cu mi storia y e exito di Catch por inspira na nos upcoming business persons y upcoming chefs pa no tin miedo di retonan nan dilanti. Keda pusha pa bo soñonan, y bo negoshi no ta depende di e lugar, sino di e servicio cu bo ta ofrece bo clientenan, semper traha cu amor y pasion pa bo negoshi y lo tin ‘good and bad days’ pero ‘those bad days’ no ta pa semper.”

ENGLISH
TopBuilt with Shorthand