For di chikito, Mikayla Ruiz tabata hopi activo den turismo, formando parti di Kids & Youth in Action. Por medio di esaki, el a experiencia loke ta hospitalidad, presenta show, y ta hostess den hotel, barco, y evento nan cultural y turistico. E ta corda cu su amor pa comparti y tene combersacion cu turistanan. "Desde chikito mi tabata disfruta di conta turistanan di Aruba, y mi tabata sigur cu mi lo sigui mi estudio den e area di turismo."
Mikayla Ruiz
Mikayla Ruiz
Na Colegio Arubano, e tabata sigur cu su proximo paso tabata un educacion den e mundo di hospitalidad. Esaki a hib’e na Coastal Carolina University, unda el a haya su Bachelors den Hospitality and Tourism Management, c’un minor den New Media & Digital Culture.
Mikayla Ruiz
Mikayla Ruiz
Durante su estudio, Mikayla a haci tres internship, loke a dun’e experiencia y conexion profesional. Su carera den hoteleria di luho a cuminsa na 2017 cu su prome stage den The Ritz-Carlton, Aruba den Retail. Na 2018, el a haya un oportunidad den Aruba Tourism Authority den e Branding Team, unda el a siña con Aruba ta sobresali den turismo global. Su ultimo stage na 2019 tabata di nobo na The Ritz-Carlton, Aruba den Sales & Marketing. Ni un siman despues di su graduacion na December 2019, Mikayla a bolbe Aruba y a haya su prome trabou den The Ritz-Carlton, Aruba den Meetings & Special Events. Durante 5 aña, el a planea y ehecuta weddings y evento pa grupo local e internacional. Durante e periodo aki, su pasion pa creatividad y crea experiencia unico a crece. “E departamento di Meetings & Special Events a marca e cuminsamento di mi carera profesional.”
Na October 2024, Mikayla a bira Marketing & Communications Manager pa The St. Regis Aruba Resort. E hotel iconico di luho tabata na su fase di apertura y e desafio tabata enormemente emocionante.
Mikayla ta realisa cu e no tabata solamente traha riba un hotel, sino tabata parti di e creacion di un experiencia inolvidabel pa futuro "luminaries" con nos ta yama e huespednan na The St. Regis.
E balor mas grandi cu el a ricibi di su experiencia na St. Regis ta gratitud. E ta aprecia tur oportunidad di crecemento cu el a haya te awor.
Mikayla no por stop di pensa riba con nan a traha hunto como un team pa e gran apertura di The St. Regis Aruba. "E union tabata algo increibel," Mikayla ta bisa. "Nos tabata enfrenta obstaculo, pero manera un famia, nos a sostene otro y a traha cu pasion y determinacion pa logra algo magico. E preparacion tabata un proceso di esfuerso y dedicacion, unda tur detaye tabata crucial. Nos tabata traha dia y ora nan largo, percura cu tur angulo di e hotel tabata cla pa ricibi su prome huespednan. E apertura tabata mas cu simplemente habri un hotel—tabata un celebracion di union, trabou duro y excelencia."
“Mi ta sigura cu e branding di St. Regis Aruba ta incorpora elementonan di Aruba den manera sofistica y elegante. Nos ta uza inspiracion di e cultura, arte y naturalesa di Aruba pa crea un experiencia di luho cu un toke di nos isla autentico. Por mira esaki refleha den diferente di nos menu di restaurant, spa y experiencia nan unico.”
The St. Regis Aruba Resort ta trece un experiencia di hospitalidad di nivel mundial na nos isla, elevando servicio personalisa y meticuloso pa cada detaye. Un di e aspecto mas exclusivo cu St. Regis ta introduci na Aruba ta su Butler Service, un servicio unico caminda huespednan ta ricibi atencion personalisa di un butler dedica cu ta anticipa nan deseo y ta asisti nan den cada detaye, for di empaketa y desempaketa di maleta te na reservacion di actividadnan exclusivo.
Ademas di e servicio personalisa, The St. Regis Aruba Resort ta honra su herencia sofistica cu un serie di tradicion iconico cu ta parti di su identidad. E 4 ritual nan principal ta:
1. Champagne Sabering – ta un tradicion iconico cu a cuminsa cu e fundador di St. Regis, John Jacob Astor IV. E ta un simbolo di celebracion cu cada atardi, un butler ta habri un boter di champagne usando un sabre, cu ta un tipo di spada. E momento aki ta crea un ambiente perfecto pa brinda y disfruta durante e bahada di solo.
2. Afternoon Tea Ritual – inspira cu seleccion di te nan exclusivo y un variedad di pastries exkisito, esaki ta un momento pa relaha den un ambiente sofistica y disfruta di e arte di te.
3. Bloody Mary Ritual – cada St. Regis hotel rond di mundo a crea su version unico di Bloody Mary. The St. Regis Aruba Resort su signature Bloody Mary yama “Bon Bini Mary”, uzando ingrediente local pa duna un toke autentico pa refleha nos cultura y personalidad.
4. Midnight Supper - ta un tradicion exclusivo inspira door di e Astor Family, cu tabata conoci pa organisa cena priva di luho pa su amigonan despues di un evento special. Awe den St. Regis, e ritual aki ta bini na bida den evento priva cu ta combina gastronomia di clase halto cu un ambiente elegante y intimo.
E ritualnan y servicio nan unico aki ta forma parti di e esencia di St. Regis, creando un atmosfera di elegancia, atencion personal y tradicion cu ta separa e resort aki for di otro hotelnan na Aruba.
Mikayla ta kere firmemente cu si bo stima bo trabou, e no ta sinti manera un obligacion, sino un pasion. “Haña un trabou cu bo stima, y bo nunca lo tin cu traha un dia den bo bida”, e ta bisa. Pa mantene balansa, e ta purba dedica tempo pa su mes, bay gym y pasa rato cu su famia y dos cacho nan, Nala y Bella.
Den su rol como Marketing & Communications Manager, teamwork ta fundamental. “Nos team ta dinamico, creativo y dedicated,” Mikayla ta bisa. A pesar di ta un grupo chikito, e union ta sobresali den tur trabou cu nan ta haci. E team completo di The St. Regis Aruba Resort ta un grupo di profesional apasiona, cada un ta duna su maximo pa crea un experiencia di excelencia pa cada huesped.
Pa esnan cu soña di traha den un hotel di luho manera The St. Regis Aruba Resort, Mikayla su conseho ta kla: "You Need To Have THE PASSION." Pa sobresali den e industria, bo mester keda curioso, dispuesto pa siña, y siempre tin un mentalidad di crecemento.
Hospitalidad no ta simplemente un trabou, ta un arte, un pasion y un estilo di bida. Huespednan ta bin St. Regis pa un trato exclusivo y di excelencia, y e unico manera pa duna esaki ta cu entrega total y amor pa e ofishi. Un carera na St. Regis no ta solamente un destinacion, sino un pasashi pa excelensia y sin limitacion.
NOMBER:
Mikayla Ruiz
EDAD: 28 aña
ESTUDIO:
Major: Hospitality Resort and Tourism Management focused on Event Management
Minor: New Media and Digital Culture focused on Social Media Marketing & Design
MOTTO IN LIFE:
My purpose in life is to live it. To taste experience to the utmost. To reach out eagerly and without fear for newer and richer experiences. Celebra Bida Tur Dia.
ROLE MODEL:
Mi mama; un persona resiliente, pasiona y determina den tur loke e ta haci. Mi motivacion pa sigui traha duro y keda PUSH BO MES na bo potencial maximo y sigur semper tin FE cu semper bo lo wak e luz na final apesar di tur obstaculo cu bo topa riba bo caminda.
Built with Shorthand