Esaki ta un entrevista di un storia cu hopi hende ta pensa di conoce tur detaye caba di dje. Melony Paesch ta esposa di ex-minister di Aruba, Paul Croes, awe cumpliendo un condena di prison pa e.o. corupcion. Mientras cu e caso aki berdad tabata uno publico debi na e posicion di e mandatario, Melony tambe a bira un figura principal dado momento, como sospechoso aunke despues a keda libera di tur cargo. Sinembargo, su storia ta bay mas leu cu e caso mes. Su storia ta trata di e cambio cu a cuminsa 7 aña pasa, e momento cu e esposa, mama di dos yiu chikito y negoshante mester a bira lanta para bek y bira e ‘breadwinner’ di su famia, entre dolor y esfuerzo constante pa protege su famia emocionalmente y financieramente.
Awe, el a scoge pa transforma su dolor den forsa y mas importante p’e, t’ey pa yuda su yiunan den henter e proceso aki. Di cay pa lanta bek, uno, dos, tres of hasta diez biaha mas, awe Melony ta cla pa conta di su vision y speransanan hinca den un plan nobo.
“Esaki ta algo cu mi a hereda di mi Oma Mama Oncha, mi mama Lienchie y tantanan cu ta conoci pa ta muhernan balente y fuerte den comunidad. Tur hende cu conoce mi storia, sa cu mi no a bin di un infancia facil. Pero, si no ta pa tur loke mi a pasa aden na chikito, keremi cu mi nunca lo a sobrevivi tur e trauma aki! P’esey awe, e Melony despues di caso IBIS a bira un hende cu no ta cay den panico pa nada! Si algo no ta bay, ta sigui pa otro. Unico cos cu tin balor real awor aki p’ami ta DIOS, mi famia y mi paz mental.”
7 AÑA DI TURBULENCIA: MI MESTER A BIRA CREATIVO
“Mi tabata lanta drumi y pensa henter dia con mi t’ey make it! Nos tabata biba tur dia riba e cash di dia sin sa kico ta spera nos mañan. Pero nunca a desconfia di mi potencial. Mi ta un hende cu facilmente ta bin riba un idea, mi ta kere den dje, y mi ta make it happen no matter what. Mi survival mode ta kick in di biaha. Y semper mi ta logra cu sosten di hende cu semper ta cumpra for di mi. P’esey mi ta kere den bida ta hopi importante pa yuda otro. Ora bo yuda un hende, nan no ta lubida, ora bo mester, nan lo t’ey bek para ey nan pa dunabo sosten. Esey ta algo cu mi a sinti den tur mi negoshinan. Cada un tabatin nan proposito den mi bida y tur a siña mi algo.”
E BERDAD NA MI YIUNAN
“Ora nos a haya nos mes den e situacion aki, nos dos yiunan tabata hopi chikito, 6 y 4, pa splica y papia habri cu nan, manera mi lo a desea. Nos cas tabata un cas feliz y hopi harimento, joke y alegria. Di un dia pa otro, el a bira un cas cu hopi dolor. Mama y tata keto cu no ta ni durf papia den nan mesun cas. Dus claramente, apesar di nan edad, nan tabata sinti cu algo no tabata bon! Nan a wak tur hende drenta den nos cas ora nan ta drumi dos biaha. Nan a wak cacho y scopet na cantidad, sin cu nan tabatin mag di lanta y sali for di e camber. Asina mes, hunto cu mi casa, nos a purba di keda haci nan contento, pero e no tabata facil.
MELONY PAESCH
MELONY PAESCH
Nos no a contanan ni tampoco gaña nan. Nos a purba tapa e realidad basta aña pa warda nan bira un tiki mas grandi. Mi tabata yora scondi pa nan no wak mi, djis pa no haci nan mas dolor. Ora nan tabatin 10 y 8, nos mester a pone nan sinta, y conta nan kico tur a pasa e ultimo añanan. Nos a duna nan tur chens di haci tur pregunta y a contesta tur cos. P’ami vooral, e tabata hopi importante pa no tin secreto mas cu mi yiunan. Mi tabata kier ta liber atrobe, den mi mesun cas. Nos a bira na e momento ey, un famia bek y nos tres, tabata sosten mas grandi pa mi casa. Nan dos tabata duna mi casa extra amor y atencion. Nos a bisa nan tambe kico lo por ta ‘next’. Y ora e momento a yega, nos tur tabata “cla” pero na mes momento, e tabata hopi doloroso pa nos tur. Pa nan e dia ey tabata horibel.
Mi casa ta un tata cu ta duna su 100% na nan, dus mi tin un sapato hopi grandi pa yena awor. Mi a priminti mi mes y un regla cu sigur mi ta volg ta cu mi yiunan lo no ta e dupe mas pa cu e situacion. Mi a percura pa duna nan extra amor y pa nan no falta ningun sport y nan social life keda normal. Mi ta prik algo tur mainta algo positivo den nan cabes, cu ta dicho di nan tata tur mainta prome cu e tabata bahanan na scol: "Si bo cay na caminda, lanta para cu bo cachete na laira y sigui bay padilanti.”
Danki Dios mi tin hopi mentors cu kier mi bon. Tur ta kere cu mi tin hopi potencial y cu awor cu e caso ta tras di lomba, ta ora pa habri mi halanan y durf na haci loke mi ta kere aden y bay p’e. Awo mi a dicidi cu mi ta bay haci e trabou cu tur hende cu conoce mi sa cu mi tin aña ta haci pa tur hende serca di mi ‘for free’, cu ta relata na ‘Interior Designing’ Asina CASA DOLCE a nace.
CASA DOLCE ta un concepto cu mi ta cana cune basta tempo caba den mi cabes. Mi a yega di haci varios proyecto, restaurant y casnan. Casa Dolce lo ta un compania cu lo brinda varios servicio manera e.o.;
-Nos lo haci Interior/ exterior design services. Trahando cu budget y gusto di cada persona. Di un camber te na un proyecto grandi.
-Tambe nos ta busca propiedad pa nos clientenan na un prijs hopi abou y flip esaki den un forma creativo y economico. Tambe si e cliente tin e propiedad, nos mes lo yuda den e parti di flip.
-Pa cliente nan cu mester di conseho y of kier bay den e business di vacation home (airbnb), nos ta set-up Vacation homes pa e cliente te na yabi, y prepara esaki completamente pa e cliente mes host of pa entrega na e compania cu lo host esaki p’e.
-Nos ta controla proyecto tur dia pa e doño ora e no por ta fisicamente presente of envolvi den su renobacion/construcciondi su proyecto. Asina nos ta controla e contratista cu ta haciendo cualkier trabou pa e doño. Nos lo ta proyect manager di esaki.
-Y e servicio mas popular y nobo ta e parti unda nos ta bira e wowo/ representante/ controller di e doño di e propiedad cu e Host/Agent y zorg pa bo cas keda un 5-star. Pa un fee hopi atractivo, nos lo traha un monthly report, unda ta informa e doño ki parti of parti nan di e cas mester atenshon of inversion pa por crea mas trafico y ganashi, door di tin e propiedad up to date.
Bo a identifica control di calidad pa Airbnb properties manera un niche den cual bo ta kere cu bo por sobresali. Con bo ta diferencia bo mes for di otro companianan y kico ta e valor unico cu bo ta trece pa bo clientenan?
Na Aruba no tin niun compania ainda cu ta dunando e servicio ey pa haci e control pa e doño, dus ta e persona intermediario entre e doño y e compania cu ta Host p’e. Mi lo ta e prome. Mi mes a host mi cas pa varios aña dus mi sa precisamente, unda e problema nan ta. Haciendo esaki, e Host/agent su trabou lo ta mas facil pa huur e cas aki y na un prijs mas halto. Pa e doño, su propiedad ta keda semper riba un nivel, mirando cu e cas nan aki ta bira un sorto di drive-thru cu hopi hende ta drenta sali y cu asina hopi uzo bo cas/meubels nan ta bay atras.
Mi lo zorg pa tur luna, wanta tur cos den bon estado, sin cu bo mester haya shock ora bo wak bo cas despues di 6 luna, sino e ora bo inversion e ora lo mester ta di golpi pa por remodela tur cos atrobe. Cu mi servicio tur luna, ta inverti gradualmente y nada ta bay atras. Mi ta premira cu mi idea ta bay transforma den proyecto nan grandi. Cu mas hende mi papia, mas mi ta polish e idea y keda hacie miho. Mi ta desea pa un boca bisa e otro y e ‘news go viral’.
Pa negoshi mi ta bay inverti tur mi tempo den e ‘new venture’ aki pa e crece y establece su mes. Pa mi bida personal, mi ta warda mi casa sali paso hunto nos tin hopi plan y soño nan grandi cu a keda ‘on hold’ pa basta tempo y awo nos ta bay realisanan hunto y sigui crece hunto, man den man, manera semper. Mi sa haya mi dia nan di yora, pero despues mi ta limpia mi awa di wowo, accepta cu mi mag sinti tristo paso mi ta un humano, pero mi ta lanta para y corda cu mi tin e regalo mas bunita cu papa Dios a mandami cu ta mi yiunan.
E les mas valioso sigur ta trata tur hende bon. Bo nunca no sa kiko bida tin p’abo. E hende nan cu menos bo ta spera ta para duro bandi bo den momento nan menos bon y ta bira un sosten grandi p’abo. Sigur mi ta na paz cumi mes. Mi a haci loke un muher y mama mester a haci. Bisti cualkier petchi y maneha cualkier cos cu bin den su caminda. Nada no ta pa semper! Ni bon, ni malo. Solo ta sali un dia pa nos tur, just bo mester keda kere den bo mes y pusha tur dia pa bay dilanti y pa ta un mihor vershon di bo mes. Ami semper a keda kere cu mi ta bay ta 10 biaha mihor den tur sentido cu ora mi a haya mi mes den e proceso aki 7 aña pasa y keremi, asina mes e ta bay ta! Y mi a cuminsa sinti e vibe ey caba.
Built with Shorthand