Un hoben Arubiano, un studiante di ley, un voz inespera. Den un momento caminda kizas mayoria ta scoge pa keda keto, Max NG a scoge pa papia. E caso tragico di Ayden CJ Lannoy a habri un herida nobo den comunidad Arubiano, un hoben di 19 aña, sin arma, sin droga, sin defensa, a perde su bida den mannan di autoridad.
Mientras hopi a keda den shock, Max a move. Su meta ta uno; husticia. Den e siguiente articulo, nos ta introduci bo na Max Ng di 22 aña. E hoben cu hamber pa husticia…
Mi a lanta na diferente parti di Aruba, entre otro Village, Noord Cura Cabay y Sta Cruz. Mi a bay scol na Sta Cruz na Colegio San Hose. Mi memoria favorito di mi crecemento ta ora cu nos a gana prome luga di Mente Inteligente pa mi scol na 2015. Mi mama y tata semper tabata streng cu mi, pero mi no ta arepenti di esey (mas). Awo na grandi mi ta wak e balor di cana recto y lanta cu disciplina. Balornan asina no ta cambia cu tempo. Husticia no por nace di nada. E ta un sentimento humano. Mi perspectiva di Husticia definitivamente a ser influencia di mi ambiente.
Ora mi a caba VWO na 2021, mi a dicidi di bay traha. Den e aña ey mi a enfrenta hopi reto financiero y laboral. Mi ultimo trabou na hotel tabata e ultimo druppel den e baki di awa ora cu nan a bisami cu mi tin cu djis sera mi boca y haci mi trabou. E dia ey mi a aplica pa studia ley pa mi por hiba esnan cu a abusa di mi derechonan, corte. Na final, mi ambicion pa husticia a cambia abase di e amor cu mi a descubri pa ley.
Mi omo cu ta Sr augustin Vrolijk, cu ta gobernador interino ta hurista y bon studia den ley, e semper apoya e decision pa persigui mi carera den ley, mescos cu mi mama cu ta un abogado di belasting, semper mi a haya sosten di mi famia. Nan no a influencia mi decision el a bin puramente di e retonan cu mi a enfrenta den mercado laboral.
Basicamente, husticia na mi pespectiva ta un sentimento humano cu ora tin inhusticia, bo ta haya e gana pa bringa pa algo, tin hende ta ignora of pone esaki un banda kizas pa miedo, pero ta yega un punto unda mi a mira mes. Mi tabata studiando ley y ora mi a wak cu loke ta pasando ta malo, berdad mi por a dicidi pa para pa algo cu ta corecto of para banda di inhusticia. Basa riba un calling moral y spiritual, mi a tuma mi decision pa sali dilanti. Mi no a planea esaki, mi a djis actua. E tabata mas manera un destino. Spiritualmente mi a keda movi y pusha pa haci esey, mi no a pensa, mi a djis actua. Sigur durante e proceso mi a haya miedo, pero mi a dicidi pa bringa.
E mainta ey cu mi a lesa e articulo di e caso di Ayden, mi a keda den shock. Mi a haya un rabia y un hamber pa husticia. E tabata dia 9 di februari 2025, ora mi a dicidi pa cuminsa actua.
Ayden CJ Lannoy, un hoben di 19 aña, a keda tira cu 20 bala dia 9 di februari mainta, mas o menos 5:30 am. Di loke ta publicamente disponibel, polis a persigui Ayden paso un luz di su auto tabata kima, mientras central ya a manda un melding pa para e persecucion. Punto ta: Ayden no tabata un criminal. E no tabata tin droga, ni arma. E tabata un hoben, y incluso un tata. Esaki p’ami ta simplemente hopi peculiar y ta tene un tint macabro.
Awor mi ta den mi di tres aña di bachelor den Arubaanse Recht.
Sin mi estudio, lo mi no ta den e capacidad cu mi tin awor. Tur hende por wak algo inhusto, pero bo mester tin un mente huridico pa por proba di con, a base di e leynan existente, un situacion ta realmente inhusto. Husticia no ta simplemente un palabra abstracto, e tin su definicion den ley. E meta di ley ta pa logra husticia. Studio ta e base: e ta manera un bril cu ta lagabo wak e situacion den un forma analitico y huridico. Cu conocemento di husticia, bo no ta keda solamente cu e hamber pa husticia, pero bo por transforma esaki den un cambio structural tambe.
Mi famia y amigonan ta orguyoso di mi, pero ta di compronde tambe cu hopi hende den comunidad tin miedo. Pasobra nos ta bay contra un sistema grandi. Hopi hende tin miedo di voz, miedo di represalia. Tin hende cu a bisa mi cu mi tin talento, pero cu mi ta pone hopi cos na riesgo. Mi ta haya sosten, pero tambe preocupacion.
Mayoria, e reaccion ta positivo. Claro, tin critica y cosnan negativo, pero esey ta basa riba odio y inmadurez. E lucha aki no ta anti-polis, sino pro-husticia. Hasta polis y miembro di Ministerio Publico a bisa cu esaki ta na beneficio di e comunidad.
Mi a haya menasa pero si mi ta papia di esaki abiertamente, mi ta duna nan mas poder. Mientras mi sa cu mi ta haci loke ta husto, lo mi sigui cu e lucha, semper cu precaucion.
Interesantemente, mi no ta wak mi mes manera un activista, mi ta djis MAX. E persona cu stima ley. Si esey ta yuda otro, mi ta contento, pero mi concentracion no ta riba e titulo. Mi ta contento si hende haya speransa den esaki, pero mi ta keda Max.
Si, claro mi a sinti duda. Tin momentonan cu e lucha tabata sinti demasiado grandi. Pero mi no ta laga e sentimento ey controla mi; mi ta control’e.
Mi ta sinti nan dolor, pero mi no por carga e mesun dolor paso no t’ami a perde e familiar. Mi por solamente mustra compasion y duna mi voz. E dolor di famia ta un recordatorio cu hopi hende nunca ta haya husticia. Mi kier uza mi studio y inteligencia pa un causa noble.
Miedo lo t’ey semper. Pero si un persona sali afor y actua, otro lo sigui. Asina ta nace un movecion. Si bo kier cambia sistema, bo mester papia.
Mi ta keda MAX. Si mi ta inspira un otro, mi ta contento. Pero mi meta ta pa keda un bon ehempel. Mi ta spera cu por kibra e limite cu e sistema ta pone y logra mas cu loke nos mes ta pensa cu ta posibel.
Mi tabata kier a profila mi mes un dia como Ministro di Husticia, pero mi sa cu pa logra cambio, bo mester tin un team. Mi lo sigui den activismo den un forma of otro.
Mi kier logra pa husticia ta mas accesibel, y trece cambio structural den e organisacion nan relaciona cu husticia. Esaki ta e impacto positivo cu mi ta busca, mi lo kier haci esaki mi trabou unda mi por yuda hende.
Miedo semper lo bay t’ey, pero esey ta un sentimento, na final di dia bo tin cu dicidi si esey ta controla ‘bo of abo ta control’e. Miedo cu duda ta bay hunto, na final di dia, bo tin cu wak e situacion den un forma obhetivo cu tambe ta inclui determinacion y e hamber pa husticia. Di eynan bo tin cu pensa, cua approach bo por tuma unda bo miedo y determinacion por ta ok hunto.
"Husticia no ta un privilegio, e ta un derecho humano." E ta un derecho universal cu tur hende mester tin acceso na dje. Mi role model ta Hesus. Su amor y sacrificio ta inspirami pa busca husticia, pa tur hende, den tur forma.
Built with Shorthand