No lubida di biba e detaye importante, keriendo cu bida ta un pustamento pa ta mihor cu otro!
Semper busca e balans entre: PENSA, SINTI Y ACTUA.

Gassant Photography

Gassant Photography

Skirbi pa: Jacqueline Wernet

Su pasion como educador inicialmente a crea oportunidadnan unico pa el a briya riba diferente plataformanan. E mesun pasion aki e ta aplica na su trabou cu ta pa mehora mundo, pero sin kita e importancia di su mesun famia den e proceso.

Mi ta un persona analytico, curioso pa tur loke tin di haber cu desaroyo di humanidad, concentra riba mi famia, consistente y positivo

UNESCO, como agencia specialisa di Nacionan UNI, tin como area di trabou Educacion, Ciencia, Cultura, Comunicacion & Informacion. Despues di hopi aña di dedica na un carera concentra rond di e parti financiero/huridico, mi a haya importante pa explora e parti mas sociologico e internacional cu semper tambe a atraemi y los di mi trabou mi a sigui volg.

E cualidadnan mas importante, no solamente pa hende muher, pero hende en general, ta flexibilidad pa acepta y adapta na cambionan den sociedad, ta dispuesto pa colabora & coopera y tambe por maneha bo mesun ego versus empatia pa otronan.

CON ABO TA INSPIRA

Mi ta inspira mi mes cu hopi cos, entre otro: desaroyo di mi yiunan, biahenan, arte, gastronomia, cultura en general y actonan cu mi ta considera di impacto y importantancia den mi circulo directo

Semper aplica e caminda di integridad aunke ta dura largo tin biaha pa demostra dicon esaki ta importante.

KICO TA HACI ABO, UN MUHER CU TA INSPIRA?

Esey ta algo cu otronan mester indica, pero mi ta approach tur encuentro cu otro persona hopi habri y cu e meta pa stimula talento di cada persona.

BALANS

E balans cu bo ta referi aki no ta uno facil pa yega na dje. E realidad ta cu no tur periodo di bo bida por ta den e balans perfecto y segun mi no mester ambiciona esaki tampoco. E realidad ta cu- riba termino largo- mi escohencia semper tabata mas inclina pa mi famia y no mi bida profesional.

MOTIVA UN OTRO
E pregunta aki ta diferente pa cada persona, ya cu cada individuo tin su mesun manera di maneha contratiempo, pero segun mi ta yuda pa tin un actitud cu e ‘glas ta mitar yen’ y confia cu tur periodo ta temporal esunan bon y tambe esunan menos bon.

Ta great pa nos tin ‘rolemodels’, pero si esnan cu ta proyecta un bida realistico y di traha pa logra bo metanan y ambicionnan! Aunke gana lotto y tin un piel perfecto, mi tambe ta desea.

Promer parti pa por inspira ta cu bo mester tin contenido, intelectualmente y/of emocionalmente. Despues nos mester siña muchanan empatia y afinidad pa reconoce e poder di diversidad, celebra talento(nan) di otro persona, pa cuida nos medio ambiente y naturalesa y pa busca solucionan creativo y innovativo.

ORGUYOSO LOGRO
E logronan cu mi ta mas satisfecho cune ta cosnan cu mi no a wordo paga at all pa haci nan: Un ehempel di mi promer trabou serio: mi tabata duna les y banda di esaki mi a dedica 3 aña tur diabierna merdia, pa ta un faculty advisor pa Key Club na Colegio Arubano, mi studiantenan -cu tabata asina engaged caba cu issues social- a siña ami hopi mas, cu ami a siñanan algo. Ta net den actvidadnan asina lidernan ta wordo crea, no den un klas usando metodonan tradicional. Mas cu tur cos, mi ta orguyoso di e famia cu ami y mi casa a forma y ta maneha tur día, cu dianan bon y algun menos bon. Na final di dia mi ta contento ora mi sinti cu mi a duna mihor di mi mes.

BARERA

Segun mi nos tin cu wak e mas amplio y cambia e definicion di ken y pakiko ta inspira, cu e mindshift ey, tin hopi hende cu ta inspira. Mi wela di 92, a cria 10 yiu, un cantidad di nieto y bisanieto, e kadans di bida tabata su universidad. Si bo maak mee su gana di biba, su outlook positivo y su stimacion incondicionalmente, bo ta keda inspira pa simanan!. Manera e tin mas hende muher na Aruba. E inspiracion intergeneracional ta bunita, di un balor agrega grandi y un bendicion pa esnan cu tin e privilegio pa experencie.

SOLIDARIDAD

Pa ta honesto ami ta mas voor pa nos dirigi riba igualdad di genero y no asina tanto riba hende homber y muher. Hende como especie mester ta mas solidario cu otro. Mi sa cu ta mas facil pa bisa cu haci, pero mester concentra riba ta un ‘bon hende’ prome.

UN OTRO MUHER CU TA INSPIRA BO

E muhernan den mi circulo mas intimo: mi wela, mi mama, mi ruman, mi suegra, mi tantanan, mi primanan y mi amiganan stima. E motibo ta masha simpel: status, funcion of estudio no ta inspirami manera cu e gevoel di wordo stima si ta haci.  Mi yiu muhernan ta inspirami den un forma special. Mi ta wak nan desaroyo cu curiosidad, tin biaha cu miedo y mayoria bes cu perspectiva pa protehanan. Nan feedback honesto riba tur topico ta pone mi para straight cu dos pia riba tera di biaha. Mi ta spera cu bida lo dunami e oportunidad pa tin un relacion largo y rico na experiencia hunto cu nan.

CONSEHO

Recientemente mi tabatin un stagiare cu a inspirami hopi. E unico conseho cu mi a haya valido pa dune ta pa e semper aplica e caminda di integridad, ta dura largo tin biaha pa demostra dicon esaki ta importante. Pero si bo actua integro, e resto bo por adkeri na caminda, segun bo mesun proceso

MUHERNAN NA ARUBA

Hende muhernan riba ‘papel’ a desaroya tremendo na Aruba. Pregunta ta si hende muhernan ta sinti esaki tambe. Segun mi tin caminda pa cana den e aspecto cu e sociedad ainda ta dividi tradicionalmente. P'esey ta importante pa educa mucha muher y homber riba importancia di relacionan sano, igualdad den genero y respet mutuo. 

TopBuilt with Shorthand