Si bo tin un soño y bo tin pasion, tur cos ta posibel.
Lo tin semper momentonan ups and downs pero esakinan tambe ta haci bo mas fuerte y siña bo pa aprecia bo logronan mas.

Carlos Velasquez

Carlos Velasquez

Skirbi pa: Jacqueline Wernet

Biba bida na su maximo! Ta amabel y cu comprencion cu otro hende, sea generoso cu bo tempo.
Stima y cuida bo medio ambiente y bestianan. Sea feliz y sea e miho version di bo mes, ta consciente cu semper por siña mas.
No preocupa bo pa e detayenan chikito. 

Mi semper a desea di bula, mi a cuminsa na edad jong cu e pensamento di kier a bira un astronauta pero mi a realisa cu no tin hopi astronauta cu realmente ta bay espacio. Mi a termina na kier bira un piloto di aerolinea pero mi no a cuminsa cu e carera aki te despues den bida, ora mi yiunan tabata mas grandi.
Un tripulashon completamente di hende muher di KLM tabata loke a inspira mi pa finalmente bay p’e!

Mi ta pensa cu ta imperativo pa no laga ningun hende bisa bo "bo no por", "bo no mester", "esaki ta un ambiente pa homber, con bo lo trata cune?", "no, esaki ta trabou di un homber"... Si tin pasion pa un trabou specifico, tur cos ta posibel. Esaki tambe ta conta pa homber, pa e forma aki. Ningun hende mester bisa un homber cu e no por of no mester scoge un carera pasobra normalmente e ta diseña pa muher. Nos tur mester por haci loke nos kier! Scoge e carera cu nos ta desea, sin importa loke ningun hende bisa.

Biaha tambe ta duna un otro perspectiva riba bida y mi tabata hopi bendishona pa a mira hopi cultura en mi trabou.

Tin un cas trankil c'un partner y famia ta excelente pa comparti momentonan special cu nan.

Mi sa cu pa drenta den e mundo di trabou cu mayoria biaha ta hende homber ta eherce tabata algu cu no tabata pasa hopi na Aruba. Mi gusta pensa cu den un forma of otro mi a inspira algun mucha y dama tambe pa bay p’e. No solamente pa bula, pero tambe pa otro profesionnan. Y tambe cu ta definitivamente posibel pa cambia carera na un edad mas avansa. Ta tuma algo di riesgo, pero sin riesgo tampoco no lo sinti bon pa logra bo metanan.

BARERA

E barera mas grandi ta pensa cu cierto trabou no ta destina pa hende muher y otronan no ta destina pa hende homber. Esaki mester cambia pa tin un balans husto pa tur.
Muher por haci tur loke homber por, y vice versa, pero si nos no educa nos yiunan pa kere esaki, y na realidad blokia nan pa kere esaki, nos nunca por crece como sociedad.

“Si bo tin un soño y bo tin pasion, tur cos ta posibel”

BALANS

Mi ta sinti cu muher, en general, ta mira cosnan diferente compara cu hende homber. Mi ta sinti cu hende muher ta mas cauteloso, kizas tin di haber cu nos instinto maternal. Pa tin tanto muher como homber den posicionnan cu ta haci cambio, ta importante pasobra esaki ta duna e balans perfecto.

UN OTRO MUHER CU TA INSPIRA BO

Tin diferente. Mi mama pa cuminsa. Como mama soltero, el a logra pone nos na scol, practicamente duna nos tur cos cu nos mester, a siña nos bon manera, respet, aprecio y humildad, amor pa medio ambiente y bestia, y awendia como dama di edad, e ta sigui traha, sigui ehercita y biaha. Tambe, mi rumannan muher, kendenan tin nan negoshi exitoso. Despues e amiganan femenino incontabel cu a logra tanto. Mi ta orguyoso di ta rondona y sosteni pa nan tur. E ta duna mi un alegria pa mira nan tur prospera.

CONSEHO
No give up nunca. Accepta cu un cos semper ta hiba bo na e siguiente. No pensa nunca cu bo a fracasa si bo no a yega e meta cu bo a pone pa yega na dje. Durante e caminda, bo a siña tanto cos, y topa tanto hende. Bo por hasta cambia of ahusta e meta inicial.
Ta habri pa cambio.

MUHERNAN NA ARUBA

Mi ta pensa cu nos ta haciendo gran progreso pero e stigma ainda ta tene nos atras. Tin hopi hende muher den posishonnan halto awendia. Esaki si ta algo grandi, pero realmente no mester ta asina pasobra nos, manera muher, POR haci tur loke homber por y vice versa. 

TopBuilt with Shorthand