FCCA ta mas c’un organisacion di vivienda. FCCA ta un organisacion cu ta contribui na seguridad, stabilidad, y un comunidad fuerte pa e hendenan cu a dedica nan bida na nos pais. Pa hopi adulto mayor, haya un luga sigur pa biba ta un desafio, pero danki na FCCA, hopi hende grandi awe ta sinta den sala di nan hogar den un ambiente sigur y trankil. Un di nan ta Marianne Anthony di 76 aña, cu na 2017 tabata den un situacion unda el a mester busca un cas urgentemente. Eventualmente el a logra haña un hogar den e bario di Santa Filomena, Paradera. Un proyecto pa aldultonan mayor, crea pa FCCA. Su storia ta refleha con FCCA ta crea continuacion digno pa nos hendenan grandi.
Prome cu señora Marianne a muda pa Santa Filomena, su bida tabata completamente diferente. Durante 25 aña, el a biba den un cas na Venezuela Straat na Oranjestad, un lugar cu hopi hende tabata pensa tabata su propiedad, pero cu realmente e tabata huur. “Mi tabata wak asina bon pa e cas cu hendenan rond tabata pensa cu tabata mi propio cas." Sinembargo despues di 25 aña, e propietarionan a dicidi pa bende esaki. Esaki logicamente a nifica cu 67 aña, Marianne tabata para dilanti un reto nobo. Diripiente, el a keda sin un hogar sigur y a cuminsa busca un otro cas. “E buskeda no tabata facil, mi tabata haya casnan pero sea nan tabata hopi costoso of e bario no tabata conoci p’ami.” Den un momento cu e tabata poco desespera, un hende a dun’e un tip: FCCA tabatin un proyecto special pa adultonan mayornan na Santa Filomena. Sin duda, el a tuma un chens y a aplica, sperando cu el por haya un cas pa stabilisa su bida bek cu su edad.
Segun Marianne, e ta corda cu e tabata un poco nervioso durante e proceso. “Na prome instante durante e proceso, mi a keda puntra si mi ta bay por paga e cas. Pero mi tabata determina y mi a yena y entrega tur formulario.” Un luna despues, Marianne a haya e bon noticia cu su curason tabata anhela—un hogar sigur y stabil. “Mi a reza hopi." Esaki tabata na 2017 y e tempo ey, Marianne tabata por a hasta scoge e cas cu e tabata desea, paso tabatin algun casnan disponibel ainda na e momento ey. “Mi a scoge mi cas cu dos camber y un baño. Si tabata di un camber so, mi lo acepta tambe.”
Pa Marianne, biba den Santa Filomena ta algo cu e ta disfruta tur dia. “Mi no tin ningun problema cu ningun hende. Nos ta trata un cu otro bon, tur cos ta trankil.” Cu mas di 25 vivienda den e proyecto, e ta kere cu ta importante pa tin lugar manera esaki pa adultonan mayornan.
“Nos ta biba manera un comunidad pero cada persona tin su independencia. FCCA ta organisa fiestanan den temporada di fin di aña, y ta trece nos hunto.” Aparte di esey, FCCA ta mantene e lugar cu bon mantenimento. “Nos hardin ta keda haci limpi un biaha pa siman, y si tin algun problema cu e infrastructura, FCCA ta bin mira e mesun dia.”
Mi no por ta mas gradicido cu FCCA. Si no tabata pa nan, mi no sa unda mi lo tabata bibando awor. Na mi edad, e cos mas importante ta pa por tin un lugar sigur. FCCA a duna mi e stabilidad ey.”
Marianne ta bisa cu hopi hende grandi no ta haya un oportunidad manera el a haya, y p’esey, e ta spera cu FCCA por sigui traha riba mas proyecto pa nos hendenan grandi. Segun Sra. Marianne, hopi hende rond di su edad mester un lugar manera Santa Filomena. “No tur hende por paga huur halto. FCCA ta duna nos e stabilidad y e oportunidad pa biba sin preocupacion,” e ta bisa. E ta spera cu mas proyectonan manera esaki por bira realidad.
Built with Shorthand