Mi mama ta Mariana Oduber. Un muhe cu semper a para firme den su identidad, e ta “De Hele Echte.” Creciendo, mi ruman muhe y ami semper tabata sa claramente ken nos ta, cu orguyo y confiansa den nos mes. Den un epoca unda independencia emocional no tabata comun, mi mama a cria nos c’un mindset diferente: sin limite, sin duda y cu hopi amor. Nos a bira muher nan fuerte, gradua cu master degree, reina nan cu corona propio.
Mariana Oduber
Mariana Oduber
E enseñansa di mi mama a bira ainda mas poderoso den Oktober, ora mi a haya un diagnosis di cancer di pecho. Su fortaleza mental y positivismo a impacta manera mi mes a encara e proceso, sin miedo, sin duda. Awe, mientras cu mi ta lanta mi yiu homber, mi ta realisa mas y mas con profundo su manera di ta mama a forma ken mi ta. E ta mi mama, y e ta mi fundeshi di forsa.
Mariana Oduber
Mariana Oduber
Aki bou, un dialogo entre dos generacion di poder: un mama y un yiu, dos muher, dos visiones, un solo laso.
Gilliany na Mariana: Mami, ora mami a bira Mama pa prome biaha, kico tabata Mami su expectativa nan?
Mariana: "Semper mi tabatin den mi cabes, cu mi dos yiunan ta bay ta exitoso. Mi deseo tabata pa nan tin bon estudio, cu nan por logra ta profesionalnan c’un carera stabil y por ta independiente para den nan sapato. Y awe mi por bisa m’a logra."
Mariana na Gilliany: Semper nos a biba dushi, y mi kier a sigura esey como Mama. Kico abo por bisa di bo bida?
Gilliany: "Mi a lanta den un cas rico di amor c’un abundancia di trankilidad, unda cu tradicion ta tin enormemente balor, celebra “tur cos” ta lema na cas y tambe cultura ta bida. Sea ta carnaval, baile, arte, crea y tambe sin duda musica cu Papi. Francamente, mi a lanta cu tur cos y mas. Sin falta humor loke semper a sana nos curason."
Gilliany na Mariana: Con Mami lo describi Mami su “parenting” o guia como mayor?
Mariana: "Mi sa cu mi tabata un mama streng. Mi no tabata kier boso desvia di boso meta. Mi semper kier a sigura cu boso ta keda riba e ruta corecto. Bo oma tabata hopi streng cu mi tambe, locual a haci cu mi mester a busca un balans entre kico mi ta permiti y kico no, pero semper sumamente pendiente di ambos di boso pa sigura cu boso ta bon."
Mariana na Gilliany: Kico abo lo bisa ta e 1 les cu bo kier hiba o aplica di mi parenting como bo Mama, pa bo yiu Brayden?
Gilliany: "Cu e opinion mas importante ta esun di bo mes y cu bo mente ta sumamente poderoso. Semper Mami a bisa nos cu nos mes ta dicidi nos exito den bida y mi kier pa Brayden sa esey semper, pa e poder cu e ta carga den su mente y p’e sa e por logra tur cos den bida."
Gilliany na Mariana: Con Mami a logra lanta nos cu un pensamento cu nos no tin limite, hopi prome cu esaki tabata “in”? Di unda Mami a haya esaki?
Mariana: "Confiansa ta algo cu bo ta pase di generacion pa generacion. Bo oma semper tabata demonstra di ta un persona hopi sigur di su mes y masha orguyoso. Y ami como su yiu kier a lanta mi yiunan mescos. Ambos di boso lo tin un legado na mundo, y e simia ey a wordo planta di boso prome dia. Mi semper a papia hopi mes cu bo y Gossy. Nunca mi lo cansa di papia. Semper lo mi keda Mama, no importa ki edad boso tin."
Mariana na Gilliany: Awor bo mes ta lantando un yiu homber cu e mesun energia cu mi a pone den bo. Con e ta sinti pa pasa Brayden e ternura ey siendo un mucha homber den e mundo di awe?
Gilliany: "Identidad ta keda forma na cas, dun’e su lugar y sigura di pas’e pa bo yiu. Sigura cu bo ta activamente parti di e formacion di identidad cu bo yiu, prome cu mundo purba defini esaki p’abo. Pa Brayden, ambos su mayornan ta sigura di dun’e e hermentnan necesario pa yega leu den bida."
Gilliany na Mariana: Mami, semper bo a yama bo mes “de hele echte”, dicon?
Mariana: "Si, di jong, semper mi a bisa tur hende cu mi ta ‘de hele echte’. Mi ta referi na ‘de hele echte reina’. Semper orguyoso di mi mes y con mas orguyoso ora m’a haya dos yiu muhe. Y mi yiunan no por a bin otro! Mesora mi ta traha espacio pa pasa e corona over pa nan. Nunca tabata e intencion di ta ‘na mando’ como e reina. E ta pa por educa mi yiunan carga nan mesun corona tambe."
Mariana na Gilliany: Awor bo ta pasando den momento nan mas dificil, kico ta algo cu bo kier sigura cu pa Brayden como bo yiu lo keda corda semper?
Gilliany: "Wel, mi no kier pa e pensa cu e mester haci su mes chikito pa ta comodo, no importa e circumstancianan cu e ta aden. Y definitivamente no pa cancer. Bo ta crece ora bo ta incomodo. Mi ta recorda mi mes cu mi no mester pidi permiso pa briya y saca cara pa mi mes, hasta awor cu mi ta mustra completamente diferente."
Gilliany na Mariana: Ora mi a bisa Mami di mi diagnosis, con Mami como mi Mama a tum’e?
Mariana: "Positivismo ta un decision. Prome instante m’a hinca den mi cabes cu bo resultado lo ta negativo, una bez cu el a wordo confirma, nos tin cu acepta y mesora ‘shift mindset’ pa ok, mi yiu ta bay sali mas victorioso di esaki. Semper bo tabata un yiu positivo, sigur di bo mes, y den e mentalidad corecto. Mi no duda ningun momento, Gill."
Mariana na Gilliany: Y con abo a sinti pa bisa bo Mama cu bo tin cancer di pecho? Y bo yiu?
Gilliany: "Pa mi bisa Mami hopi honesto, den henter e proceso, e parti mas dificil pa mi tabata pa a bisa Mami cu mi a keda diagnostica cu cancer. Bisando un hende cu stima bo asina hopi cu bo tin e malesa aki no ta facil. Pero, Mami no a laga mi mente bay den niun direccion scur. Mami a bisami mi lo bay briya mas cu nunca y corda mi cu esaki ta simplemente algo pa supera."
"Pa a splica Brayden tabata tiki mas complica pa e compronde. Pero sigur un combersacion hopi honesto y directo pa e compronde y prepara su mes pa e cambio fisico. Record’e mesora tambe cu e mente, curason y ambiente ta keda mescos."
Gilliany na Mariana: Kico ta un momento cu ta laga Mami sinti orguyoso di mi den e proceso aki?
Mariana: "E no ta un momento, e ta continuamente cu mi ta haya bo hopi fuerte Gill. Y bo fortalesa mes ta yuda nos tambe como bo mayornan den e proceso aki."
Mariana na Gilliany: Kico pa bo te awor tawata e parti mas dificil den e proceso?
Gilliany: "Bo por ta fuerte y Mami conoce mi, semper mi a haci mi cosnan independiente, pero den esaki mi mester acepta ayudo, paso e ta un tereno cu mi no conoce y mi sa cu e lo bin cu momentonan dificil. Mi a guia ekipo nan, a para como president di organisacion, lantando un dushi yiu homber, pero naturalmente e proceso aki ta hopi diferente. Di ora mi a ricibi mi diagnosis, mi a siña conoce un otro tipo di forsa. Laga hende t’ey pa bo den e proceso, tambe ta parti di sanacion."
Gilliany na Mariana: Con Mami por a keda asina positivo den momentonan cu ta sinti duro of inhusto?
Mariana: "Nunca mi ta permiti mi mente desvia di locual ta e plan. Semper tene e enfoke solido. Nos tempo riba mundo aki ta hopi cortico y mester sigura di probecha di biba bida. Goza y sigura un espacio bunita den bo mente y den bo bida diario y enfoca riba metanan den bida."
Mariana na Gilliany: Kico di mi como bo Mama ta e un cos cu bo kier sigura pa bo yiu?
Gilliany: "Pa celebra bo yiunan pa exactamente ken nan ta. Permiti nan ta ken nan ta. Ami a wordo celebra desde hopi chikito pa ken mi ta. Bon gordita semper pero barica afo, mescos mi ruman. Y mi lo kier haci esey mescos pa Brayden. Hopi “loudly” celebrando su cosnan bon y tiki tiki, traha riba locual mester traha riba dje. Den tur sentido, como mama dune apoye masal sea ta den scol, deporte y sigur na cas."
Gilliany na Mariana: Con Mami su rol como Mama a cambia despues di a lanta dos yiu muhe, pa awor ta wela di Brayden y Vincent cu ta dos mucha homber?
Mariana: "E titulo di wela ta uno extraordinario. Mi kier tur cos bon so pa mi nietonan. Mi ta hopi orguyoso di nan. Mi ta desea pa mi ta salud pa mi por ta cu nan pa un tempo largo pa mi por yuda guia nan pa keda den e caminda recto, lanta nan cu disciplina, bon caracter, cu respet y cu cariño. Y no ta paso nan ta mucha homber kiermen cu nan no mester e guia necesario. Cu e mesun boluntad cu mi a fungi como mama, awo ta ora mi haci’e como wela."
Hunto: Pa cualkier persona lesando nos combersacion, kico ta locual nos kier pa nan sa?
Mariana: "Mi a lanta muhenan fuerte para den nan sapato, pero den e mesun rosea mi a lanta muhenan cu sa cu tin cu yuda ora mester yuda. Nos no ta nos so riba e mundo aki. Mi ta yama mi mes “de hele echte” no pa ningun hende honra mi, pero pa bo keda papia poderoso di bo mes, pa bo yega leu, i pa bo pasa e luz pa bo yiunan."
Gilliany: "Mami, bo no a solamente lanta dos reina—bo a lanta dos palo di muhe cu por enfrenta tur cos. Mi ta riba e caminda di sanacion y mi tin cu mi Mami su palabra, Mami su sonrisa, Mami su cuido, Mami su cariño y amor y Mami su legado."
Built with Shorthand