Maibelys Hernandez, un persona amigabel y sociabel cu hopi fe den Dios, a cuminsa su caminda cu Crown na 2012 como un bendedor. Su abilidad pa compronde cliente y su compromiso pa duna un servicio excelente ta loke a habri e porta pa su crecemento. “Mi ta un persona cu hopi pasenshi y mi gusta traha den team pa nos por tin e mihor comunicacion,” e ta splica. Y e estilo di traha aki no a bin sin keda nota pa gerencia. Apenas dos aña despues di a cuminsa traha eynan, Maibelys a bira supervisor di tienda, y awe e ta responsabel pa lidera un team di 17 empleado na Crown Boulevard. Su regla pa su mes ta simpel; “Mi ta competi cu mi mes pa wak semper con mi por ta mihor cada dia,” e agrega.
Pa logra e meta nan di Crown, Maibelys y su team ta cuminsa tur dia c’un pre-shift, evaluando meta di dia y luna. Con un persona cu ta kere den tin tur informacion cla, e no ta cansa di enfatisa e importancia di claridad y comunicacion: “Comunicacin ta hopi importante den un team; asina nos tur sa unda nos tin cu yega, hunto.”
Maibelys ta bisa di ta hopi gradicido na su team, enfatizando c’un lider sin un team fuerte no ta nada. “Ta danki na mi team di trabou, nos ta sali dilanti hunto pa logra exito.”
Un di e parti mas gratificante di su trabou ta soluciona problema y sera un bon relacion cu cliente. “Bo ta sinti ora e cliente ta habri su mes cu bo y ta comparti nan bida personal. Esey ta algo hopi leuk. E ta fortalece confiansa y lealtad,” e ta bisa.
Como mama di dos yiu chikito, Maibelys ta enfrenta e desafio di balansa bida personal y trabou. “Mi no ta hiba stress di trabou na cas ni tampoco trabou por hiba e situacion di cas. E no ta facil sigur.” Pa yuda su mes mas ainda, Maibelys ta constantemente lesa bukinan cu ta dune guia y entrenamento pa yuda su mes relaha pa e por semper maneha su trabou y su mes. Apesar di cualkier obstaculo cu por presenta, Maibelys ta mantene semper un mentalidad positivo. “Aunke tin biaha bo ta casi colapsa, nos ta humano. Pero mi ta papia cu mi mes pa wak luz den tur dos parti y pa por maneha tur dos rol bon.”
Maibelys ta un ehempel pa otro muhernan cu tin meta grandi. Su mensahe “Nunca give up. Tin ups and downs, pero esaki ta lesnan grandi pa sigui p’adilanti.”
E ta agrega cu ta importante pa mantene seguridad di bo mes y perseverancia. “Semper ta bo mes, nunca stop di soña, y confia cu bo por logra tur loke bo propone.”
Built with Shorthand