Arkitectura ta mas cu solamente un mapa di planificacionnan of edificionan, e ta un demostracion di creatividad, perseverancia, traha y bay tras di un soño. Esaki ta refleha e trayecto remarcabel di Anny Karol y Maggi, 2 arkitecto cu a laga nan pais natal, Venezuela atras, pa crece y briya riba e isla chikito bisiña yama Aruba.
Cu nan pashon comparti pa diseño y excelencia, nan no solamente a supera desafionan, sino tambe awe, ta demostrando ken nan ta cu nan trabou bou di e nomber di nan compania Kairos.
E trayecto den arkitectura di Anny Karol a cuminsa durante su añanan di adolescencia ora cu mester a scoge su caminda profesional na scol. E tempo aki caba el a sinti atraccion pa ingenieria civil di construccion. "E trabou cu mi a experencia den klasnan tecnico, manual, y hermentnan cu nos tabata uza pa crea y diseña espacionan, a motivami." Segun el a avanza den su estudio, tabata logico cu arkitectura tabata e combinacion perfecto p’e.
Bayendo bek na su añanan mas hoben, no tin duda cu su yamado pa arkitectura a surgi durante e biahenan di famia na Venezuela. E tabata semper haya su mes ta sketch e paisahe, casnan y lugarnan cu su imaginacvion unico. "Mi tabata mira mundo via mi sketch nan.” E transicion di por a traduci e dibuhonan awe den su futuro ta algo unico.
Nan encuentro tabata na scol durante nan estudio di arkitectura. Aki nan a descubri un amor comparti, no solamente pa diseño, sino tambe pa otro. For di e momento ey, nan a cuminsa cu nan trayecto como compañero nan den bida y negoshi. "Nos partnership den bida y trabou ta nos forsa mas grandi," Maggi ta bisa. Nan relashon a bira fuente di inspirashon pa nan cliente-, coleganan y ,cualkier persona cu ta lucha pa mantene un balansa efectivo entre bida personal y profesional.
Anny cu Maggy a yega Aruba na 2018, pa un proyecto cu lo mester a dura 3 pa 6 luna pero poco poco, nan a cuminsa habri nan mesun caminda pa proyectonan nobo. “Ya pa e tempo aki, Aruba a cautiva nos cu su trankilidad y paisahenan unico. Aserca na esaki, e hendenan di Aruba a cuminsa trata nos manera famia. Nos a dicidi cu nos por a haci esaki nos cas y comparti nos experticio cu Aruba.” Sinembargo na 2020, pandemia a yega Aruba tambe y esaki a haci cu Anny y Maggy mester a ahusta hopi di nan plannan. Despues di hopi consideracion, hasta di bolbe Venezuela bek, nan a haya oportunidad pa sigui traha for di cas, diseñando proyectonan den 2D y 3D pa diferente clientenan.
“Definitivamente, tabata e reto durante pandemia a siña nos pa saca e positivo di e temporada aki y asina nos negoshi KAIROS a nace. (Kairos; palabra Griego -“e momento adecua, oportuno cu algo importante ta tuma lugar) “Apesar di tur e negativo cu tabata tumando lugar, esaki tabata nos oportunidad y nos a tuma e determinacion y firmeza pa logra nos metanan.”
Cu e mundo di construccion ta domina pa hende homber no ta nada nobo. Sinembargo, pa Anny y Maggy, e experiencia di traha como arkitecto den e ramo aki ta mustra cu e dominio aki ta cambiando cada vez mas. Aunke na Aruba e ramo aki tambe ta lidera pa homber, nan a topa cu aliadao den nan trabou cu ta duna respet na nan experticio sin limitacion di prehuicio.
Den nan specialisacion cu ta diseño den 2D y 3D, nan ta mira hende muhernan ta sobresali mas unda clientenan ta aprecia e toke femenino den cada diseño. Conclusion si ta cu e innovacion y creatividad cu nan ta pone den nan trabou, ta surpasa cualkier retonan di genero cu por ta existi unda nan trabou ta papia pa su mes.
Maggi
Maggi
E uzo di software pa diseña den estilo 3D a mustra di ta un herment crucial den mustra cu detaye y precision e resultado final di un proyecto. “Hopi vez, clientenan ta yega cerca nos c’un proyecto diseña den 2D y nos ta bolbe diseña esaki den formato 3D p’asina por dunanan un bista mas real di con e proyecto ya termina lo mustra di berdad. Esaki ta duna un idea mas cla riba color, dimension, e ‘fachada’ y mas. Pa nos, e ta un punto fuerte cu nos por ofrece e imagen di un producto cla, prome cu cuminsa cu e construccion mes. Asina nos por prepara cada detaye cu mester keda haci pa e keda mescos.
Anny
Anny
Den e mundo di arkitectura, un rekisito importante pa haci e trabou den forma optimal ta prepara pa traha oranan largo e dos damanan ta splika. "Nos no por nenga cu nos trabaou ta exigi oranan largo sinta tras di computer y cu atencion meticuloso na detaye na momento di crea diseñonan den 3D. Aserca ta bin otro obstaculonan cu por topa na momento di cuminsa construi manera retonan na un tereno. Tur esaki por haci e caminda uno exigente.”
“Nos ta sinti nos mes afortuna pa cada proyecto cu a yega na nos, no importa e tamaño. Cada un tabata unico y special pa nos y a enrikese nos conocemento como tambe nos abilidadnan pa nan ehecucion. Un proyecto chikito nos ta defini como uno cu ta dura entre 3 pa 4 luna. Un ehempel di un proyecto cu nos a haci ta e coffee bar den e lobby di Holiday Inn Hotel, cual nos a desaroya c’un colega, Barbra Zavala, kende ta un experto den Interior Design Arch. Tambe nos a haci algun proyectonan ta renobacion di casnan paden y pafor, construccion di apartamentonan pa Airbnb-condominium, proyectonan di cas, localnan comercial, Gazebos y hasta diseño di hardin. Te cu awor, e proyecto mas grandi cu nos a haci sin mira e tamaño ta di un residential na Paradera, Reina Sophia Residence, riba un tereno di mas o menos 18 mil m2 unda e plan ta pa construi 37 unit di vivienda. E hecho di por crea un diseño multi funcional, agradabel pensando riba e diferente famianan cu lo bay haci e espacio aki, nan hogar, tabata un experiencia inolvidabel pa nos.”
Nos kier bisa tur muhernan pa no para ni stop di traha pa yega na nan metanan. Semper lo tin e momento oportuno pa bo sobresali. Lo bay tin cada bez, mas muhernan apoyando y liderando mas proyecto innovador. E mihor cos di profesion maner arkitectura y ingenieria ta cu ta existi hopi otro areanan den e mesun ramo cu muhernan por destaca.
Built with Shorthand