Maestro movecion & salud Kevin Regales

Desde chikito, Kevin Mitchell Regales (32) no tabata por a para keto. Si no tabata hungando baseball of futbol, e tabata den atletismo, hungando den mondi, of drenta cunucu pa planta y cuida mata. “Pa resumi, mi tabata un mucha cu no tabatin paracion,” e mes ta conta. Kevin a lana na Santa Cruz, den un cas yen di union y amor, hunto cu su mama, tata y dos ruman muher. Mirando cu tanto su mama como tata tabata docente; enseñansa tabata core den su ader. Awendia, el a sigui cu e talento y legado familiar aki como un maestro na Cacique Aterima y Sint Jan Kleuterschool dunando les di movecion y salud na mucha nan di 3.5 te 6 aña.

Si puntr’e cua tabata e maestronan cu e ta sinti cu a influenci’e, e ta corda nan tur;

Mi mama Juf. Lucita cu tabata mi fundeshi a siñami diferente manera pa siña vooral cu mi tabata un mucha hyperactief.
Juf. Crispina Fatima College cu a yudami cu structura.
Juf. Pourier San Antonio College Mavo cu a yudami enfoca riba importancia di estudio.
Juf. Mirscha Winterdal IPA cu a yudami cu aspecto pedagogico y didactico di mi e estudio, con pa trece e les dilanti na un manera atractivo p’e studiantenan.

**Kevin Mitchell Regales**

**Kevin Mitchell Regales**

Kevin no tabata mira su mes como docente te ora su amor pa deporte a habri e porta. “Mi tata semper a hinca nos den deporte pa disciplina y confiansa.” Durante e prome aña di estudio mi a wak ki impacto un maestro por tin riba nos muchanan. Pa medio di movecion como e instrumento pedagogico. Por ehempel durante les nan di movecion bo por traha na e confiansa di e studiantenan y na mesun momento traha riba e abilidadnan fisico. Esaki ta un ehempel chikito di tur loke bo por logra den les di movecion.

Kevin ta bisa cu e ta stima duna les di movecion, cu ta siña nan regla di hunga, desaroyo fisico y teamwork. Tambe, den lesnan di salud, e ta gusta enfoca riba temanan como reconoce y regula emocion, hasta cu ehercisionan chikito di halamento di rosea. “Eherce mi profesion no ta sinti como un trabou, mi ta disfruta e dunamento di les. E desafio mas grandi cu mi ta topa cune ta, laga e metanan cu mi ta ofrece den les di salud yega y keda bibo na cas. Por ehempel comemento saludabel, importancia di bebe awa y higiena general.”

Con bo ta logra incorpora e mayornan den e educacion di nan yiunan?

Tin comunicacion y ta open pa feedback di mayornan. 

Bo por comparti un anecdota inspirador di un studiante cu a marca bo?

Cu e proyecto cooltobefit mi a experencia muchanan motiva pa trece cambio pa hiba un bida mas saludabel.

Kevin ta wak hopi cambio den perfil di studiante comparando cu 10-15 aña pasa. “Nan concentracion ta mas limita. E velocidad di wega digital y gadgets ta influenciando e mente di e mucha.” Su respuesta: mantene balans. “Nos mester prepara nan digitalmente, pero tur cos mester ta na midi.”

“Tur mucha tin derecho riba educacion. No matter e capacidad y limitacion di e mucha si e sistemanan aki por brindanan educacion, tremendo.”

“E maestro su salario ta yega su plafond na 38 aña… despues por traha casi 30 aña cu e mesun salario. Esaki ta demotivante.” Si por propone un cambio: “Ahustacion salarial lo ta e prome paso.”

Como un docente homber, Kevin ta consciente cu e rol ta exigi un nivel extra di responsabilidad y vigilancia pa evita malinterpretacion of situacion incomodo. P’e, claridad ta esencial: reglanan y structura mester keda cla for di principio pa proteha tanto e mucha como e maestro mes. Den su klas, norma, balornan y regla ta keda consecuente, pasobra e ta kere cu consistencia ta loke ta crea un ambiente sigur. Asina e ta guia su studiantenan pa trata cu respet y pa comprende e importancia di mantene limitacionnan sano.