Christen Goeloe
Christen Goeloe
Naci na Purmerend (Hulanda) y cria na Playa/Madiki (hopi biaha den San Nicolas), Christen (34) a crece den un circulo di amigonan super uni, forma for di scol basico. E famia grandi, di banda di mama y tata, a siñ’é norma y balor: respet y bondad. Deporte tabata semper central p’e: tennis (inspira pa su omo Yubi Toppenberg), paintball competitivo, y BMX (“bus halte tabata e pista di nos mes”).
Christen a caba Associate Degree den Hospitality Management & Marketing, pero ora el a cuminsa traha, el a compronde cu esey no tabata su pasion. Den mes tempo el a namora di fitness. “ For di eynan mi a compronde cu tambe mi tin un gran pasion y alegria pa traha cu mucha.” Danki na su primo Sean Toppenberg, el a test e estudio Movecion y Salud (IPA): “Mi a stop cu mi trabou y a bay full bek den student mode. E resto… ta historia.. Awe e ta fungi como maestro di movecion y salud na Scol Preparatorio Nos Paraiso."
E parti mas dushi ta ora un mucha ta cuminsa siña algo nobo; E “no por” cu ta bira “mi por”: Ora un mucha finalmente logra un koprol of un movimiento cu e tabatin miedo pa haci, e sonrisa riba nan cara “ta mi regalo mas grandi”. Christen ta gusta tambe duna lesnan di salud: curason, organonan y funcion di curpa. E momentonan cu e ta mira con e ta logra prikel e interes di e mucha, ta dun’e un energia inmenso.
Un reto grandi: screen time y falta di hunga pafo. “Nan screen time ta hopi halto. Mi no ta bisa cu tablet ta malo, pero e ta keda un obstaculo pa nan por move, explora y crea amistad. Mi mes tin un les special cu mi ta bisa: “Tablet ta dushi, tablet ta bon, pero nada di mas ta bon pa e curason.”
Na cuminsamento di aña, Christen ta bisa cu su lesnan ta poco mas estricto, pa tene control; ora e klas ta ya stabil, e ta habri y bira mas creativo. “Mi ta uza hopi material den mi gymzaal y tambe den lesnan di salud. Mi estilo overall: estricto den cumplimento, pero despues hopi leuk y interactivo.”
- Bewegingsonderwijs: gymnastics cu coordinacion, werpen & vangen; reconoce y controla nan curpa pa ora nan kier bay haci un deporte.
- Gezondheid Social Emotional Learning (SEL): tin empatia, comparti y tambe yuda otro; inculca norma y balor pa forma persona di bon curason y util pa comunidad.
Den Scol Preparatorio Nos Paraiso, hunto cu interne begeleider Juffrouw Lenny y coleganan, nan ta traha man den man. “Nos semper tin un meta: e miho pa e studiante,” y p’esey nos ta purba semper traha cu e mayornan na beneficio di nan yiu.”
“Den tur aña como maestro, mi tin hopi studiante cu a laga marca riba mi.” Un di su momentonan mas memorabel ta bin di su team di voetbal di meisjes. Durante un partido, un studiante a haya un golpi fuerte. “E tabata den dolor, cu lagrima riba cara, pero a bisa mi: ‘No Meester, mi kier bay bek.’ El a drenta bek y a hunga c’un determinacion cu a inspira tur e team. Den e momento ey nan a keda lucha te cu nan a gana. E partido ey no tabata solamente un victoria deportivo. P’ami, e tabata un les di caracter: den dolor y dificultad, un studiante a scoge pa sigui lucha pa su team. E momento ey a laga un marca profundo riba mi como maestro.”
Christen no ta limita su mes den gymzaal. E ta uza tecnologia pa haci lesnan interactivo. “E muchanan ta para den hoepel, click riba e board pa tira dice, y despues nan tin cu cana e cantidad di stap cu a sali. Ora nan yega riba e ficha, un video of un instrucion ta aparace c’un ehempel di ehercicio cu nan mester haci. Den e manera aki, nos ta combina movimiento cu spel.” Den Gezondheid, e ta uza iPads pa coloring activities di organonan, cu voz-over y videos explicativo riba kico e organo ta haci. “Locual bo mester ta creatividad; e tools ta basta.”
Como un maestro homber, Christen Goeloe ta consciente cu su rol ta exigi un nivel extra di responsabilidad. “Ta importante pa semper tene boundaries cla,” e ta bisa. P’e, guia un studiante ta nifica orientanan den un manera sigur, respetuoso y profesional, sin crea interpretacion robes of incomodidad. Mantene distancia fisico adecua y trata tur studiante cu mesun respet, ta norma cu e ta sigui tur dia den klas y gymzaal.
“Como maestro mi ta proteha mi mes y mi studiante door di stabilisa reglanan di klas y gymzaal, tene boundaries sano y trata nan cu respet. Asina nos ta crea un ambiente sigur den clas caminda tur hende por siña, crece y sinti nan mes balora.” E ta pone cla cu figura masculino den educacion tin un rol crucial.
“Honestamente, hopi hende no ta mira tur loke nos ta haci. Educacion ta nos trabou principal, pero den realidad nos ta haci hopi mas cu solamente educa. Nos ta guia, nos ta motiva, nos ta cuida, y nos ta forma parti di e bida di e mucha na un nivel hopi halto. Hopi lihe un maestro ta yega na su top di salaris. Y esaki no ta hopi y ta pone cu e no ta atractivo pa hopi docente.”
Segun Christen Goeloe, motiva mas hende, specialmente hombernan, pa drenta educacion no ta un tarea facil. “Mayoria di hende cu ta bira maestro ta haci esey pasobra ya nan tin e pasion pa educa,” e ta bisa. Pero e ta kere cu e manera con nos ta presenta un maestro den sociedad mester cambia. “Un idea ta pa crea campaña nan special pa mustra maestro (hende homber) den diferente area di educacion. Esaki por yuda crea mas conscientisacion y mustra cu maestro nan tambe tin un rol importante den forma e proximo generacion."
“Un maestro homber por ta un rol model fuerte, specialmente pa mucha homber. Ora nos pone mas visibilidad riba e impacto aki, nos por inspira mas hende homber pa wak enseñansa no solamente como un trabou, sino como un carera cu tin nificacion, contenido y respet.”
“Mi ta mira mi mes trahando cu muchanan, pero posiblemente den un otro area di educacion. Mi kier sigui desaroya mi mes tanto den enseñansa como den coaching, pa mi por combina e dos pasionnan: guia studiante den su formacion y inspira hende den deporte y salud."
“Un maestro den sociedad ta un hende cu por cambia un generacion: ta motiva pa nan kere den nan mes, pa nan persigui nan soño y pa nan siña balornan manera respet, disciplina y empatia. “
Built with Shorthand