Maestro Economie Jeandré Hessen

Enseñansa, musica y empatia: esaki ta e ritmo cu Jeandré Hessen (32) ta trece tur dia na su klas di Economie. Na Mon Plaisir College, e ta mustra c’un maestro homber tambe por sembra disciplina, pasion y speransa pa un generacion nobo.

Jeandré a lanta entre Pavia y Dakota, caminda futbol, brassband y hunga den bario a duna color na su infancia. “Ambos bario a formami y dunami un infancia inolvidabel,” e ta conta. Na cas, enseñansa tabata presente: su tata, John Hessen, tabata docente di Nederlands, director y despues inspecteur generaal di enseñansa. “Mi tata a inspirami pa e manera cu e semper a trata tur mucha den un manera igual, specialmente esnan cu no tabata haya luga facil den un scol. E semper a purba yuda nan. Te dia di awe, ex-alumnonan ta contami ki impacto e tabatin den nan bida.”

Ora e ta recorda su mesun docente, Jeandré ta bisa cu hopi a laga un marca den su caminda: “ Mi tabatin un juffrouw faborito cu tabata Juffrouw Jeannette, despues tempo di Mavo tabata Juffrouw Rayma Thomas, na Havo tabatin un meneer cu a ponemi gusta Wiskunde pa su forma di duna les cu ta meneer Kurt Thomas. Pero si tin un docente cu a ponemi stima e materia cu mi ta dunando awo ta Juffrouw Shahaira Rodulfo di EPI.”

Jeandré ta un maestro relativamente hoben y esaki sigur ta yud’e conecta hopi facil cu su studiantenan. “Mi ta kere den tur trabou tin desafio y ora mi encontra nan, mi studiantenan ta corda mi tur dia pakico mi a scoge pa e trabou aki.” E ta considera su mes un docente trankil, empatico pero si hopi recto ora mester ta. “Mi ta duna nan respet y mi confiansa. Tempo di scol mi tabata e studiante “mala mucha”, dus mi sa precies con pa bay om cu studiantenan cu ta considera “dificil”. Serca mi tur cos ta draai rond di confiansa, respet y empatia.

Como docente di Economie, su pasion ta mas grandi cu solamente dunando teoria. Na Mon Plaisir el a implementa e proyecto di Qredits “Be Your Own Boss”, caminda studiante nan ta siña e herment basico pa lanta un negoshi propio. “Esaki mester bira un materia riba su mes, for di voortgezet onderwijs."

Un di e momentonan mas marca pa Jeandré tabata c’un studiante di su prome mentorklas, cu el a guia pa dos aña, y a haya un scholarship pa hunga futbol na Merca. Despues di caba Mavo y Edu Campus, e mayornan a puntr’é pa scirbi un motivational letter p’e, un peticion cu el a cumpli sin duda. Ora e studiante a subi avion pa cuminsa su aventura nobo, su mama a manda un mensahe emotivo, bisando cu Jeandré no sa ki gran impacto e tabatin den e bida di su yiu. Esey a duna’e un flashback poderoso, un recordatorio cu mientras aña ta pasa y studiantenan ta bin y bay, e impacto di un maestro por keda pa semper den nan bida.

Jeandré ta consciente di e cambionan di generacion. “Hobennan a keda mescos, pero circumstancianan a cambia. Mayornan ta traha dos trabou, hopi hoben ta traha pa zakgeld, y tecnologia ta domina nan bida.” P’e, innovacion y digitalisacion ta clave. “Na nos scol nos ta uza Google Classroom, Noordhoff, y otro plataforma digital. Nan ta amplia nos lesnan y haci nan mas atractivo.” Pero tambe cu advertencia: “AI no por keda elimina. Mester siña e hoben con pa uza AI como un tool, sin perde nan mesun capacidad di pensa.”

Docentenan, segun Jeandré, no ta solamente duna les. “Nos ta deal cu problema social, salud mental, y hopi trabou administrativo. Un counselor full-time den cada scol lo baha hopi di e werkdruk.” Y pago? “E salario a keda igual hopi aña. Un reforma salarial ta necesario pa haci e profesion mas atractivo.”

Den futuro, e ta mira su mes den un posicion di liderazgo. “Pa haci cambio di berdad, bo mester ta den un rol caminda bo por implementa e cambio.”

E responsabilidad ta mescos pa mucha muher y mucha homber. Tur dos mester wordo trata cu respet. Nan mester trata otro cu respet tambe. Mester tene cuenta un e privacidad di cada alumno. Una bes un alumno sea ta homber of muhe haya confiansa cu bo, bo mester ta cla tambe pa nan ‘open up’ cubo di tur tema, como adulto bo mester sa bo limite di te na unda bo ta hiba e conversacion, mantene e enfoke semper riba duna consehonan husto na bienestar di e studiante y si bo ripara cu e studiante mester ayudo externo of cu mester aserca su mayornan, ami semper ta avisa e studiante prome p’asina mi no kibra e confiansa cune, pasobra tin biaha, maske e ta un secreto, mester convence e studiante pa toch conta su mayornan of un hende externo, pero nunca haci esaki tras di e studiante su lomba.”

Bon personalidad y un caracter firme ta fundamental pa un docente. E mester tin pasenshi, mustra respet pa haya respet, y domina habilidadnan comunicativo cu studiantenan, mayornan y coleganan. Como docente bo ta deal cu alumnonan cu diferente caracter y background. “Respet y empatia ta base pa crea confianza den klas.”

Comunicacion frecuente cu mayornan ta hopi importante pa nan ta bon na altura di e desaroyo di nan yiu. Un maestro tambe mester ta empatico y flexibel, pasobra muchanan ta pasa den situacionan cu nan no por maneha so, y un docente tin cu tene cuenta cu esaki. Maestronan ta forma muchanan y hobennan pa na bira adultonan cu por contribui positivamente na desaroyo di nan pais y comunidad. Den esaki, un maestro tin un rol ehemplar.

Pa Jeandré, e satisfaccion mas grandi no ta solamente ora un studiante gradua, pero ora e mira cu e ta parti di nan personalidad, nan manera di pensa y nan escogencianan den bida.

Share on WhatsApp

Image captions