Garage Cordia, e distribuidor principal di autonan Toyota na Aruba pa 58 aña, tabata un negoshi familiar grandioso, maneha pa e famia Schnog, specificamente Herbert y Hans Schnog.
Lisette Schnog, e unico nieta y yiu muher, tabata considera como e sucesor natural, siendo e di tres generacion den e famia. Sinembargo, e negoshi familiar aki, cual pa hopi aña tabata e concesionario di auto mas grandi na Aruba y cu a translada pa un edificio mas moderno na Camacuri na 2005, a enfrenta momentonan dificil, y awe, na 2023, a keda adkiri pa un otro grupo. Cu esaki, e continuacion di e legado Schnog a conoce su fin. Pa Lisette Schnog, esaki por representa e fin di e legado cu a cuminsa dos generacion nan atras, pero tambe ta simbolisa e inicio di su propio trayecto y destino.
"Realmente mi por bisa cu nunca mi no tabata sa nada diferente, mi a lanta den e ambiente di auto. E tabata djis parti di mi identidad.” Su prome auto tabata un Toyota Celica segunda mando cu el a haya pa su 18 aña “Mi ta corda e auto para dilanti cas c’un strik riba dje.” Despues di esey, e Haponesnan di Toyota kier a manda un estilo di auto nobo pa wak con el a haci den Caribe. Asina Lisette a haya e prome RAV Toyota 3-porta (color cora) na Aruba. El a bay scol na Aruba pero ora e momento a yega pa bay studia afor, e tabata un decision logico tambe cu Lisette lo bay e mesun scol di auto cu su tata tambe a atende; IVA Driebergen pa Automotive Business Management na Hulanda.
Un indicacion basta cla di su preparacion pa e continuacion di Garage Cordia/Toyota pa futuro den famia Schnog. “Mi tabata sinti e expectativa aki, pues e aspiracion no a bin precisamente pasobra cu mi tabata un fanatico di auto, mescos cu mi tata, sino mas cu esaki ta un compania di famia y ami como e unico nieta/yiu a pensa cu esaki lo ta e caminda cu automaticamente mi tin cu cana,: Lisette ta bisa. Despues di a caba VWO na Hulanda, Lisette a cuminsa studia na IVA-Utrecht, Instituut voor Autobranche en Management. Apesar di tabata e unico muher entre 30 homber na scol, Lisette tabata percura pa traha mas duro na scol pa proba su mes den un mundo domina pa hombernan e tempo aki caba. “ E disciplina ey mi a hiba cu mi tambe na final. E scol tabata un verkoorte HBO opleiding unda mi tabata haci 18 vak pa semester, di 8’or di mainta pa 4’or di atardi.” Su tata Hans tabata hopi popular ainda na scol e tempo ey. “E tabata den yen di comishon, e tabata conoci y notorio tambe,” Lisette ta bisa.
“Ora mi a bolbe Aruba cu 23 aña, mi tabatin un monton di energia. Mi tata a pone mi traha den e departamento di mercadeo y relacion cu cliente, pasobra den e ultimo, keho tabata drenta y asina mi por a siña mas liher. Mi tabata maneha papelnan cu Hapon, eficiencia di e tecniconan riba cada trabou y tambe a keda encarga cu e lansamento di Yaris cu mester a reemplasa e Tercel y Starlet cu tabata nos 'best seller'. Mi mester a haci esaki mientras mi tata mes tabata na Hapon pa trabou. Tabata 1999 y hopi hende tabata supersticioso cu e cambio di number di aña cu tabata na caminda. Mirando cu e diseño di e Yaris tabata completamente diferente cu loke tabata conoce cu e speedometer meimey p.e., nos mester a crea un ‘hype’ riba dje. Mi ta corda, hunto cu mi team creativo, nos a bin c’un concepto pa crea anticipacion cu a mira algo cu tabata bin for di espacio y lo por cay na Aruba. Nos a distribui e informacion manera 'infomercial' y sin sa, hendenan a cuminsa papia tur caminda di e fenomeno ‘straño’ aki, te ora nos a revela cu tabata trata di un Yaris, cu tabata un modelo nobo di auto cu a yega Aruba. Nos a bende tur mesora. Mi tabatin hopi deseo y idea cu esey lo ta mi futuro pero manera mi a bisa, esaki ta un negoshi 'domina pa homber' y mi tata tambe, tabatin un pensamento un tiki antiguo aki.”
Durante e tempo aki, Lisette a conoce ken lo bira su futuro esposo y tata di su tres yiu, Presley, Leah y Jean-Luc (Luca). Awor como mama, Lisette su tata a dicidi cu e cu e rol di Lisette den e negoshi lo mester cambia. “Pues, mirando cu ta un negoshi di famia, mi tata a ofrece mi esposo e tempo ey, un posicion den e negoshi pa mi por tin mas tempo cu mi yiunan na cas. Mi no tabata completamente di acuerdo cu e idea ey pero esey tabata e vision di mi tata. “Si mi lo a haya e oportunidad, mi ta kere mi lo por a haci bon tambe, mas pasobra e ta un negoshi di famia, e ta den bo sanger, y e ora ey bo ta haci e trabou cu hopi cariño pa e negoshi, no solamente pa un bon salario.”
Pensando bek, e ta cla pa Lisette cu realmente, for di un edad hopi hoben caba, e tabata kier a bira un maestro di scol. “Mi mama ta contami cu for di tempo di kleuter mi tabata pone mi pochi den un rij y mi ta hunga cu mi ta e juff, anto mi popchinan tabata e studiantenan.” Despues di bira mama, el a haye su mes mas envolvi den scol di su yiunan y a cuminsa un day care yama Little Einsteins cu el a maneha pa 4 aña.
“Esaki tabata un proyecto di amor mas c’un negoshi. Mi kier a haci algo cu mi ta gusta y crea algo riba e vision cu mi tabatin riba un bon educacion of desaroyo di muchanan cual mi tabata haya hopi dificil pa haya bek den e centronan di day care cu tabatin e tempo nan ey na Aruba. Na 2018 Lisette a cuminsa cu su opleiding di digi-PABO na Hogeschool Inholland. “Awendia, mi ta traha na EduCampus Aruba. Mi ta program lead di Elementary Unit. "Mi ta haya un satisfaccion hopi grandi di wak nos muchanan desaroya. Den un tempo asina cortico na Educampus mi ta wak nos muchanan traha segun nan capacidad y crece den loke nan ta mas fuerte aden. Si bo por touch un hende, e no mester ta persee academic e por ta gewoon cu bo por t’ey pa un studiante p’e sinti su mes safe na scol. Nos tin hopi studiante tambe cu ta haci sport y cu ta competi afo y ta hopi bunita pa wak cu nan por tin e tempo pa por haci tur dos. Nos muchanan por ta un bon studiante y bon deportista. Tambe mi ta gusta cu na scol ta pone hopi enfoke riba e bienestar mental di studiante y maestronan.
Hunto cu su mayornan, Lisette atende e evento di despedida di su tata y traspaso simbolico di Garage Cordia, na su doñonan nobo.
“E ta un proceso di rouw ainda, mi ta kere. Di un banda awor, ‘it is done; dus e ta un alivio cu e ta voorbij. Claro cu e no ta loke mi a kere con mi bida lo ta, pero e ta un momento tambe di aprendisahe pa siña cu nada ta pa semper y cu cualkier momento, cosnan den nos bida por cambia. Kizas e ta un bendicion tambe paso mi pasion ta di wak hende desaroya nan mes y awor cu mi trabou, mi ta sinti satisfecho di mira esaki y di por ta parti di dje. Sigur mi ta sinti mi mes gradicido na tur e clientenan y empleadonan cu tabata asina leal cu Garage Cordia p’asina un tempo largo. Mi ta spera cu nan keda leal na e doño nobo, cu ta hoben y cu awor lo bay haci su esfuerzo pa sigui laga Toyota crece na Aruba. Mi tres yiunnan, nan ta salud, bij de hand y sabi y esey ta hacimi contento. Kizas e ta jammer cu nan lo no sigui den e legado di e negoshi di famia pero di otro banda e no ta algo cu nan tin cu sinti nan mes obliga di haci tampoco.
Nan por scohe y ta ken nan kier ta. Nan no ta mara na ningun legado di un negoshi familiar.”
Built with Shorthand