Skirbi: Jacqueline

Un refran ta bisa 'si bo construi, nan lo bini'. Pero no ta asina facil manera e ta zona. Bo mester pensa, construi y ehecuta. Esaki ta loke Lionel Harms, un Arubiano, a logra. ARUBA MADE a nace den e temporada mas critico cu nos generacion na Aruba a conoce: durante e pandemia di Covid-19. E temporada aki a trece un paro na hopi aspecto den nos bida diario, pero na mesun momento, a bira un tempo cu a genera y alimenta e abilidad di resiliencia y creatividad den hopi di nos, Lionel Harms, ta un di e personan aki.

"E edificio aki a keda construi inicialmente na 2017 y ta dilanti puerto unda barconan crucero ta mara pa turista baha. Tabatin algun tienda di souvenir den dje," Lionel ta cuminsa bisa. Na 2020, ora cu e pandemia a cuminsa, incertidumbre y inseguridad a sigui mesora su tras. Hopi negoshi no por a sigui opera mas y diripiente, Lionel a haya su mes c’un edificio relativamente nobo, enfrentando e reto di sigui y recupera. Eynan tur cos a cuminsa...

Cu e frontera di Aruba sera, sin turista y e pueblo na cas, Lionel a cuminsa haci su investigacion, buscando con e por crea un concepto pa lanta su negoshi bek ora e turistanan bolbe. E prome pregunta tabata; kico turistanan di crucero ta desea di topa cune ora nan yega na un destinacion. El a mantene e vision semper cu e situacion lo drecha bek, y pa e momento cu esaki sosode, e mester ta cla.

Den su mente, e tabata sigur di un solo cos: e kier a trece un concepto diferente y cu ta 'fit' cu Aruba pa e turistanan.

No tabatin nada cu por atrae e hendenan local tampoco. Ademas, e area rond di barconan di crucero ta yena di tienda di souvenir y joyeria, pero e turistanan ta topa cu mesun cos na cada puerto cu nan baha. Diferente pais, pero toch mescos.

Hopi biaha e turista ta topa hasta cu e mesun tipo di souvenir na otro islanan, pero cu e nomber di un diferente pais riba dje. Esaki no ta loke mi tabata kier. Mi tabata sa cu mi mester a bin cu algo diferente."

Lionel ta bisa cu e no a inventa esaki, pero el a pensa un tiki mas leu y a adapta e 'receta' pa Aruba. El a pensa riba un combinacion di arte, cuminda, y lo mas importante, enfocando riba negoshinan local.

"ARUBA MADE; e nomber aki a keda den mi mente pa casi un aña prome, hunto cu e concepto, cual a desaroya su mes cu tempo. Mi kier a crea algo local cu e ambiente di Aruba. Rond di Augustus 2021, mi a cuminsa cu e diseño interior."

E EXPERIENCIA

Un mescla entre un food hall, arte, y elementonan local; ARUBA MADE a haya su bida cu detayenan for di pafor te paden. Armando Goedgedrag a bira e prome artista cu a crea un pintura colorido di parhanan di Aruba, dunando un bunita bonbini for di leu caba na e sitio. "Mi a laga e creatividad habri pa e artista pinta algo unico; mi tabata desea pa e Arubiano sinti su mes orguyoso ora e mira e pintura aki.

LIONEL HARMS

LIONEL HARMS

Item 1 of 4

LIONEL HARMS

LIONEL HARMS

Paden, e prome tiendanan cu a habri ora ARUBA MADE a start tabata 7 restaurant entre otro Island Grind, cu ta roast su mes koffie local, Dal un Pan, y T2 Pan cu cumindanan maner Johnny Cake y Ceviche. Hunto cu nan, tabatin 8 espacionan dedica pa arte y un bar na e entrada, hunto c’un stand cu ta bende awa di coco. Ora cu barconan di crucero ta yega, Lionel ta percura pa tin musica manera steelband, pa duna un toque adicional na e experiencia di ARUBA MADE.

"Durante e pandemia, hopi hende a cuminsa cu nan propio negoshinan chikito, promoviendo esaki riba Instagram. E parti grandioso di e concepto aki ta cu hopi empresarionan a haya e chens cu ARUBA MADE pa yega na un espacio cu ta practicamente cla, sin mester haci un inversion grandi, pa nan por establece nan negoshi, traha y produci. Nan ta haya na coriente, un mesa, ta nan producto nan mester. E doñonan di negoshi ta hopi emociona cu e oportunidad aki.

E rekisitonan ta simpel: e empresarionan den ARUBA MADE mester ta biba na Aruba y ta produci/bende productonan cu nan mes a traha na Aruba. E mester ta un concepto crea na Aruba, y e bon servicio na e cliente ta importante.

“Mi kier pa e turista sinti cu nan ta den un lugar di Arubianonan. Hopi biaha e turista ta keda ataca na puerto di otro islanan ora nan baha di barco. Nos kier pa ora nan yega na ARUBA MADE, nan por sinti nan mes trankil, sin cu hende ta atacanan pa nan cumpra algo. E ambiente di e lugar lo motiva nan pa cumpra di nan mes. Nos ta contento cu nos localnan ta contento, y nos turistanan, tambe.

Lionel ta un persona cu no ta gusta duna entrevista, pero mirando e reaccion di asina hopi hende cu su mas di 20 aña den negoshi y cu e mensahe di resilencia despues di un pandemia, e ta un storia cu ta bal'e la pena pa comparti unda mas y mas, hendenan ta busca experiencia y den e proceso aki na ARUBA MADE, Aruba ta keda promovi na mes momento.