E hecho di ta un empresario por ta un experiencia gratificante y di reto. Pa Lindy, esaki no tabata diferente. Como doño di su boutique , el a siña e dificultad nan cu ta bin cu maneho di bo mesun negoshi. E experiencia aki a tuma un rumbo diferente despues di 6 aña, ora cu e mester a cera e portanan di su negoshi. Den entrevista aki, Lindy ta comparti su experiencia, lesnan siña, y consehonan pa otro empresarionan.
“E inspiracion tras di Lindy Lifestyle Boutique a cuminsa ora mi tabata un hoben y tabata pasa mi tempo den klas ta diseña e ‘floor plan’ di mi futuro boutique, sin sa c’un dia esaki lo bira un realidad.”
Su soño tabata pa crea un espacio unico unda hende por descubri piezanan di moda cu ta completamente nan estilo personal, impulsa pa un pasion pa moda. Na 27 di maart 2017, Lindy Lifestyle Boutique a habri su porta oficialmente. Tabata un experiencia ‘surreal’, e culminacion di añanan di planificacion y trabou duro, el a pensa...
“Mi ta recorda cuminsando y no sabiendo nada tocante e industria di moda ni e leynan di negoshi di Aruba, pero mescos cu tur otro doño di negoshi, mi mester a siña along the way. Mi a busca recursonan, atende workshops, conecta cu expertonan den industria.” Ora cu el a keda eligi como un miembro di directiva di Camara di Comercio y Industria di Aruba, esaki a habri hopi portanan p’e y a acelera su proceso di aprendisahe. “Adicionalmente, mi rol como representante di nos Prome Minister di Aruba su Caya Betico Croes a duna mi acceso directo na doñonan di empresa. Tambe, mi a tuma e iniciativa pa reuni varios abogadonan, y cu representantenan di SVB y otro representante di otro departamentonan di gobierno pa amplia mi entendimento di leynan y regulacionnan di negoshi aki na Aruba.”
E decision pa cera Lindy Lifestyle Boutique a bin for di un luga di reflexion profundo, resultado for di añanan di desafionan incansabel y, despues, luchanan personal. Manehando un negoshi chikito ta rekeri un nivel abrumador di compromiso personal y envolvimiento. E demanda omnipresente pa atencion y e presion constante pa logra exito por trece stress significativo, manifestando den formanan manera ansiedad, depresion, y agotacion.
E PODER / RETO DI SOCIAL MEDIA & ONLINE SHOPPING
“Mi a comprende desde tempran cu social media tabata un herment poderoso pa visibilidad di marca y interaccion. Mi a usa esaki como un plataforma pa conta nos historia, exhibi nos productonan, y interactua cu nos clientenan na un nivel personal y profesional.” E surgimento di compra online a trece tanto desafionan como oportunidadnan pa negoshinan chikito. “Pa adapta na e cambio aki den comportacion di consumidor, nos a establece un plataforma di comercio electronico y a perfecciona nos strategianan di mercadeo digital. Sinembargo na Aruba, mi ta kere cu nos no mester enfoca solamente riba e competencia di plataformanan legal di compras online, pero di e negoshinan ilegal online tambe. Esaki ta presenta un desafio real pa empresanan legal.
“P’ami, un di e desafionan principal tabata balancea constantemente e necesidadnan di e negoshi cu mi necesidadnan personal y responsabilidadnan di famia. E negoshi tabata demanda atencion sin interrupcion, for di busca productonan, manehando financianan y contabilidad, te cu mercadeo y servicio na cliente. Tabatin momentonan unda e linea entre mi bida personal y profesional a bira ‘borroso’, resultando den tension considerabel.
Mi mes tabata traha oranan largo, frecuentemente comprometiendo mi propio bienestar. Sin embargo, ta importante pa nota cu e desafionan aki no ta unico pa mi of mi negoshi - nan ta realidad cu hopi empresarionan ta enfrenta. Un mensahe cu mi kier pasa pa otro empresarionan - enfatisando cu cuido di bo mes no ta simplemente importante pero un aspecto necesario pa e salud y exito di bo negoshi.
FALTA DI COMPRENSION CU REGULACIONNAN CONSTANTE
Lindy ta sinti cu regulacionnan constante ta keda trece reto pa negoshinan chikito.
“Indudablemente, Pa logra haya permisonan, trata cu trabounan legal y cumpli cu regulacionnan cu ta cambia constantemente ta consumi hopi tempo y energia di hopi empresarionan chikito. Tin un necesidad pa esnan cu ta tuma e decisionnan pa tin experiencia propio den mundo di negoshi, pa por comprende berdaderamente e impacto cu e regulacionnan aki tin ariba negoshinan. Mi tin speransa cu lo tin cambionan, haciendo e situacion mas factibel pa empresarionan chikito no solamente pa sobrevivi, sino pa prospera”
Den mundo di negoshi, mescos cu den bida, mester tuma e decision dificil pa sigui dilanti ora circunstancianan no ta faborabel of ora e deseo pa crece mas, ta fuerte. En berdad, faya ta un parti integral di e trayecto, y ta provee lesnan importante y hopi biaha conduci na oportunidad nan mihor. Mi conseho na otronan lo ta pa acepta tur reto como un oportunidad di siña y corda cu resiliencia ta un di e caracteristicanan mas importante c’un empresario por tin.
Cera e tienda fisico di Lindy Lifestyle Boutique en berdad tabata un di e decisionnan mas dificil cu mi mester a tuma. Ta manera bisa ayo na un realidad c’un biaha tabata solamente un soño. Sin embargo, mi a siña mira esaki no como un fayo, pero como un cambio di rumbo.
Mi ta concentra riba e aspectonan positivo di e experiencia y e lesnan importante cu mi a haya. Y pa bisa e berdad, mi ta realmente feliz y ansioso pa anticipa un bida balansa c’un mente libera yen di creatividad sin limite pa emprendementonan nobo.
Pa awor, lo mi dedica tempo na mi famia, crecemento personal, y yuda mi comunidad como un lider sincero, y obviamente, Lindy Lifestyle Boutique lo sigui ta online. Pa esnan den situacionnan similar, mi lo bisa cu ta ok pa sinti desanima, pero no laga e desapunto defini bo. Enbes di esey, uza esaki como un catalizador pa cuminsa bo siguiente trayecto.
Mi semper tabata apasiona pa duna guia y sosten na otro empresarionan, asina mi ta considera maneranan con mi por usa mi experiencia pa contribui na e comunidad.
”Mi ta kere firmemente den e potencial di Aruba como un luga pa haci negoshi. Tin un granel di reto nan, manera tin na tur caminda, pero tin tambe un multitud di oportunidad nan tambe. Loke ta crucial ta cu tin un ecosistema di sosten pa empresarionan, y mi ta spera di mira mas polisa y iniciativanan cu ta fomenta esaki den futuro.
Built with Shorthand