Skirbi: Jacqueline
Meymey di un era di transformacion den politica di Aruba, e aparicion di Partido Direccion Politiea (PDP) riba panorama politico di Aruba awor den 2023, ta representa un cambio revolucionario. Funda pa hobennan Leonardo Figaroa y Xavier Boekhoudt, PDP ta bisa di ta e luz di speransa pa un generacion nobo di politiconan cu ta dedica na enfrenta e desafionan di duracion largo cu Aruba ta confronta .
"Nos mision ta pa crea un gobierno cu berdaderamente ta traha pa Aruba, unda e interes general ta domina y ciudadanonan di tur nivel, ta sinti nan mes scucha y representa."
Mi kier pidi Aruba un oportunidad pa por demostra na cada cuidadano cu a perde e confiansa den nos politiconan, cu nos por logra.
P’ami e ta importante pa por demostra Aruba cu nos tin politiconan cu kier crea solucion basa riba dialogo, participacion y un debate riba e consecuencia nan huridico cu leynan tin riba ciudadanonan.”
- Leonardo Figaroa, co-fundador di PDP.
UN ESTILO NOBO DI LIDERAZGO
E filosofia central di PDP ta drey rond di cuida y empodera e siguiente generacion di lidernan politico pa atende e problemanan mas urgente di Aruba.
Pa cultiva un ambiente di pensamento critico y participacion activo, e partido ta busca pa interactua cu gruponan den minoria y trece nan voz na e centro di proceso di tuma decision.
"Mi ta comprometi na fomenta un ambiente unda tur hende ta inclui den e dialogo, unda nos ta crea mas lider, y unda nos ta cultiva un sociedad cu ta aprecia pensamento critico y participacion activo.
- Leonardo Figaroa, co-fundador di PDP.
Mi kier ta e simbolo di e politica nobo, e ta importante pa cuminsa prepara e siguiente generacion di politiconan.
“Den e siguiente Parlamento di Aruba, mi ta wak mi mes ta traha tur dia riba leynan social pa mehora e posicion di hobennan y e grupo di ciudadano di mas vulnerabel den comunidad.
E ta importante pa revisa leynan di enseñansa, laboral, proteccion di medio ambiente, finanzas publico.
- Leonardo Figaroa, co-fundador di PDP.
DESAROYO SOSTENIBEL
UN PRIORIDAD PA E FUTURO
Xavier Boekhoudt,tambe co-fundador di PDP, ta trece su experticio den Policy for Sustainable Development na e mesa. “Mi a biba na Hulanda pa 5 aña y a studia na Univerisity of Twente unda mi a cumpli cu mi Bachelor den Technology and Liberal Arts & Sciences c’un profiel di Policy for Sustainable Development.’
Un creyente firme den crea solucionnan duradero cu ta cumpli cu e necesidadnan di e generacion actual, sin compromete e recursonan natural di e isla pa generacionnan futuro, e enfoke di Boekhoudt ta riba haya un balansa entre desaroyo y preservacion.
Leonardo Figaroa y Xavier Boekhoudt
Leonardo Figaroa y Xavier Boekhoudt
"Mi ta aspira pa desaroya solucionnan sostenibel cu ta permiti nos generacion actual pa biba un bida dushi mientras cu nos ta tene cuenta cu nos mester pasa nos pida baranca na e siguiente generacionnan den un estado stabiel y fructifero."
- Xavier Boekhoudt, co-fundador di PDP.
E organisacion politico ta un Forum, un forum ta mas c’un plataforma.
Forum ta un espacio unda intercambio di pensamento ta tuma lugar. Partido Direccion Politiea, e nomber ta deriva for di e principio cu ta traha pa yega na un Gobierno cu ta traha pa Aruba, e interes general ta locual mester prevalece.
VISION
“PDP su vision su ideologia ta social-liberal progresivo, nos punto di salida ta cu e humano mester haya e espacio pa progresa, gobierno su tarea ta pa percura cu e prosperidad cu ta keda genera, keda inverti den e ciudadano. Nos mision ta pa crea un sociedad unda cada ciudadano ta haya mihor oportunidad laboral, prosperidad economico y stabilidad financiero y mobilidad social, den balansa cu e consecuencianan ecologico. E ta importante cu cada ciudadano ta haya e oportunidad pa alcansa su meta.
E principio guia di PDP ta pa crea un sociedad cu ta inclui tur ciudadano na un manera husto y net pa nan por funciona como co-ciudadano den nos pais riba un manera cu ta celebra nan identidad propio pero cu bista riba locual ta responsabilidad y deber di nos tur.
E compromiso aki ta extende den tur faceta di bida na Aruba, for di e leynan di enseñansa y laboral te na proteccion di medio ambiente y finansas publico.
UN YAMADO PA PARTICIPACION ACTIVO Y COMPROMISO
PDP ta invita ciudadanonan cu ta desea di contribui na e cambio cu Aruba mester, pa uni forsa y traha hunto pa crea un futuro mas prospero y sostenibel.
Partido Direccion Politiea ta demostra c’un cambio significativo ta posibel, y cu nos por logra un sociedad mas ekitativo, inclusivo y progresivo pa Aruba.
E exito di Partido Direccion Politiea lo depende di e apoyo y participacion di e pueblo Arubano.
Na e etapa critico di desaroyo politico na Aruba, e partido ta representa un oportunidad pa crea un futuro cu ta celebra e diversidad, creatividad y resiliencia na Aruba.
Built with Shorthand