Aruba Airport Authority N.V. (AAA), Aruba Tourism Authority (ATA) y Gobierno di Aruba ta anuncia cu masha orguyo cu LATAM Airlines, e aerolinea lider den Latino America, a lansa su ruta di mas anticipa, esta e ruta Lima, Peru (LIM) pa Aruba (AUA). E vuelo inaugural, cu a tuma luga riba dia 2 di december 2023, ta demostra un logro grandi pa Aruba, como cu Lima - Peru, ta bira di tres hub Latino Americano pa nos isla, lo mehora e conexion pa e pasaheronan.
Tur pasahero cu a yega riba e vuelo inaugural a ricibi un caluroso bonbini di parti di e team di Aeropuerto di Aruba, compaña pa un regalo chikito. E ceremonia oficial a tuma luga den e Arrival Hall di Aeropuerto Internacional Reina Beatrix. A conta cu presencia di varios mandatario, ehecutivo di aviacion, stakeholders hotelero y demas invitado. Entre e invitadonan por a conta cu presencia di Minister Presidente mr. Evelyn Wever-Croes, Minister di Turismo & Salud Publico, Dangui Oduber, CEO di Aruba Tourism Authority, Ronella Croes, CEO di Aruba Airport Authority, Joost Meijs y Lucia Davil kende ta Director di Benta na LATAM Airlines Peru. E evento a termina cu un ceremonia di corta cinta y corta bolo, pa simbolisa inicio oficial di e ruta aki.
E adkisicion di Lima - Peru como un destinacion na e red di expansion di Aeropuerto di Aruba, ta bin despues di un decada desde cu e aerolinea LAN tabatin su ultimo operacion na Aruba. Despues di esey el a uni cu TAM Linhas Aéreas na aña 2022 y asina a bira LATAM. Esaki lo ta di tres hub Latino Americano pa Aruba despues di Bogota cu Avianca y Panama cu Copa. Ta spera cu e ruta nobo aki di Lima lo contribui na un cantidad di 2.080 stoel adicional pa luna, aumentando e capacidad di Latino America pa Aruba cu aproximadamente 8%.
E asociacion cu LATAM ta permiti Aeropuerto di Aruba di brinda diferente opcion di biahe, mirando LATAM su operacionnan domestico den cinco pais di Sur America y su red extenso cu ta cubri un total di 140 destinacion. E ruta nobo aki ta habri oportunidad p’e biaheronan local tin acceso na destinacionnan tan desea den Latino America, incluyendo Argentina, Brasil, Chile, Paraguay y Uruguay.
“Cu e buelo inagura aki di LATAM, nos ta sumamente contento di por reestablece e conexion aereo entre Aruba y Lima. Cu esaki nos por reanuda e intercambio directo cu nos pais ruman Peru”, asina Prome Minister Evelyn Wever-Croes a expresa.
“E ruta directo entre Lima - Peru y Aruba ta un testimonio di colaboracion entre Ministerio di Turismo, AAA, ATA y LATAM. E colaboracion entre nos tabata uno fundamental pa stimula crecemento di Aruba, transformando nos isla den un centro cu ta conecta nos cu e paisahe y cultura di Latino America. Awe, Lima ta bira e di tres centro regional di Latino America pa Aruba, mehorando ainda mas nos conexion y habriendo un mundo di posibilidad. E ruta nobo aki ta habri porta pa trafico di bishita pa famianan y amigonan, specialmente pa e comunidad Peruano na Aruba. Na mes momento, cu miras pa futuro, nos ta mira e potencial di e oportunidadnan comercial. E conexion estableci awe ta pone e fundeshi pa colaboracion economico cu por beneficia ambos region. Mientras nos ta explora e posibilidadnan aki, nos ta visualisa un futuro unda comercio tin fluidez sin problema entre Lima y Aruba”, asina Minister di Turismo, Dangui Oduber, a bisa den su discurso.
“Nos tabata trahando activamente riba un strategia di diversificacion. E momento aki ta un testimonio di e trabou duro andando na nos isla y di nos team di Latino America. E vuelo inaugural aki ta representa un oportunidad fantastico p’asina amplia nos participacion den e mercado di bishitante di Latino America y fortalece ainda mas nos lasonan cu LATAM Airlines. Ta spera cu aña 2024 cuminsa solido pa Aruba, specialmente desde Cono Sur, loke ta priminti un crecemento potencial rond di 8% pa aña 2023 y lo duna nos e oportunidad pa capta mas mercado economicamente atractivo cu ta inclui Chile y Brasil cu tin patronchi halto di gasto, Perú cu 25% di repeat guests y Argentina cu un estadia promedio di nuebe anochi”, asina Ronella Croes, CEO di ATA, a expresa.
Joost Meijs, CEO of AAA N.V., a expresa su entusiasmo pa e ruta nobo aki di Lima-Aruba bisando cu: “E ruta di Lima ta marca un momento significativo pa Aruba, reenforsando nos lasonan cu Latino America. E asociacion cu LATAM ta demostra e compromiso cu Aeropuerto di Aruba tin pa expande conexion y brinda nos biaheronan un acceso incomparabel pa diferente destinacion den e region.” E colaboracion strategico aki no unicamente ta nifica un crecemento pa Aruba sino cu tambe ta alinia cu e mision di LATAM pa ofrece experiencia di biahe facil, conectando e pasaheronan cu henter e continente Americano
Detaye di vuelo
E ruta nobo Lima-Aruba lo encera tres vuelo pa siman, riba diahuebs, diasabra y diadomingo. Lo opera e vuelo aki cu un avion modelo A320 cu ta conta cu 174 stoel. Ticket ta obtenibel a traves di e website di LATAM, www.latamairlines.com of via di bo agencia di biahe preferi.
Tocante Lima
Lima, e capital vibrante di Perú, ta cuater ora leu di Aruba. E ciudad ta famoso pa su patrimonio cultural, arkitectura historico y experiencia culinario. Como gateway pa Perú, Lima ta ofrece un combinacion unico di modernisacion y tradicion, invitando tur e biaheronan pa explora su maraviyanan, su mercadonan y su beyesa di costa.
Tocante LATAM
LATAM Airlines, ta un aerolinea clave den e industria di aviacion, ta reconoci pa su compromiso den brinda servicio top-notch y un conexion amplio rond henter e continente Americano. Cu un red amplio cu ta conecta bo cu un cantidad di pais, LATAM ta reconoci pa facilita e experiencia di biahe, garantisando cu e pasaheronan tin acceso na un variedad di destinacion paden y pafo di Sur America. E aerolinea ta conecta su pasaheronan na difente destinacion interesante manera Argentina, Brasil, Bolivia, Chile, Colombia, Ecuador, Paraguay y Uruguay.
Built with Shorthand