Maybe the journey isn’t so much about becoming anything.
Maybe it’s about unbecoming everything that isn’t really you, so you can be who you were meant to be in the first place.

ARTN Photography

ARTN Photography

Skirbi pa: Jacqueline Wernet

Den un mundo caminda ta hopi biaha mas facil pa adapta cu pa sobresali, Larissa Bermudez a haci como su meta pa brasa su ser autentico y inspira otro pa haci e mesun cos. 

Mi ta un ‘introverted extrovert’ cu ta aspira pa hiba un bida unapologetically myself. Un persona hopi curioso en busca di constante ‘self-knowledge’. Mi tin un curason grandi pero na mes momento mi ta sobreproteha esaki hopi door di ta cauteloso di kende mi ta laga drenta. Playfulness ta parti grandi di mi personalidad, no solamente e ta siña mi conecta cu otronan pero alabes ta yuda mi hari mi mes prome y den e proceso acepta tur aspecto di ken mi ta.

INSPIRACION
Mi escogencia di estudio (Periodismo, PR & Marketing) tabata mas tanto influencia di mi mama. For di chikito mi tabata haci hopi pregunta, mi tabata hopi social, curioso y hiba combersacion cu tur hende cu mi topa. Biniendo for di un famia cu background medico, e tabata hopi obvio p’ami mama cu ami tabata e ‘social butterfly’ cu lo haci algo completamente diferente y semper el a pusha mi den e direccion ey tambe.

CUALIDADNAN 
Mi ta kere autoconocimento/‘self awareness’, vulnerabilidad y responsabilidad ta esencial. Nos ta biba den un comunidad hopi chikito, unda cu kier of no, semper tin wowo riba bo. E puntonan aki ta siña bo kico ta bo fuerte, unda bo falta pa mehora, cua heridadnan ta frena bo di biba for di bo maximo potencial y principalmente hiba un bida autentico na bo mes.

MOTIVA UN OTRO
Tempo di Dios ta perfecto, mi sa cu nos no gusta warda y tin biaha nos no ta compronde dicon y nos kier contesta awo. Pero, tempo ta revela e pakico nos a struggle y ta trece e momento/hendenan corecto den nos caminda semper.

SOCIAL MEDIA
Honestamente mi ta haye un hopi bon herment pa conecta cu otronan. E tarea dificil ta sinta den con honesto y vulnerabel nos ta presenta nos mes dilanti otronan. Awendia rednan social ta bin cu presion social tambe, y sin sa bo ta haya bo ta ‘doe mee’ den loke ta socialmente aceptabel, contal cu bo ta aden. Si, mi tambe ta gusta uza filter, pero bo lo wak mi cabey plama den gym tambe. Mi ta comparti mi momento nan di alegria, pero mas di un a yega wak mi ta yora online tambe. Eynan e magia di inspira ta nace.

ORGUYOSO LOGRO
Milestones profesional mi tin varios, pero honestamente lo cual mi ta mas orguyoso di dje ta e momentonan cu mi a para pa mi mes y mi balor. Sea den conflicto nan personal, den publico, of cu cliente den meeting rooms priva. Mi a siña lidera cu curashi, demostra cu mi no tin miedo di papia/para pa mi berdad y “burn a bridge or two” na caminda. Consecuentemente, hende sa kico nan tin n’ami. Mi a ripara cu ora ta trata di business, e trato pa cu mi persona a bira hopi mas respetuoso. Hende lo pense dos biaha prome cu purba pasa mi un “fastball”.

Mi a siña cu mi bienestar emocional ta algo cardinal den tur aspecto di mi bida. Pa mantene esaki den balans mi ta purba practica mi spiritualidad hopi mas. Meditacion, practica di gratitud, 1-on-1 cu mi coach tur esakinan ta hermentnan cu ta mantene mi ‘on track’ y enfoca pa mi keda motiva. Si mi ta sinti mi bon cu mi mes den tur aspecto, mi ta kere esaki casi automaticamente ta traduci den motivacion pa otronan rond di bo tambe.

KICO TA HACI ABO, UN MUHER CU TA INSPIRA?

Mi ta kere a pesar di con mi ta wordo percibi den wowo di hende, social media a yuda mi mustra cu no ta importa e popularidad of cualkier factor ‘wow’ cu mi carera ta ilustra. Mi ta mescos cu cualkier otro hende muhe eyfo. Mi tin mi locuranan, pero mi por ta serio y profesional tambe. Mi ta pega barco, mi sa tin mal beis, mi ta enfrenta obstaculonan pero su tras tin hopi logro tambe. Si demas hende muhe di un of otro forma por indentifica cumi, e exito cu hende ta wak den mi ta prueba cu abo tambe tin’e den bo.

BALANS

Den mi area di trabou e la resulta un enseñansa peculiar, pasobra mi ta un figura publico y mi trabou ta hopi publico tambe. E “strategia” cu ami ta uza ta mas bien algo cu mi a siña door di ‘trial & error’. Cu experiencia y tempo mi a siña ta mas selectivo of consciente di kico mi ta publica online of comparti. Na final di dia, si mi tin algun duda mi ta contesta mi 5 “W’s”: What, Why, Who, When, Where. Kico mi kier comparti? Cu ki proposito, pa kende precies? Pakico? Mi mester hacie awo, of mi por comparti despues? Esaki lo yuda trece mi mas serca di mi meta si of no?

BENEFICIO

Bo ta realisa masha lihe cu nos ta hopi mas parecido na otro cu nos ta kere. E gap entre nos y loke ta diferencia nos ta bira mas chikito. Si tin mas di nos cu ta inspira y ta mas vulnerabel cu otro, bo ta realisa hopi biaha cu bo no ta enfrenta bo batayanan bo so y cu mas di un por tin consehonan valioso pa motiva bo y yuda bo sigui padilanti.

Abo ta bo miho ‘bestfriend’!!! Inverti den bo mes!

BARERA

E barera mas grandi ta e presion social y hecho di wordo huzga a base di e contenido cu bo ta publica. E storia BS ey cu media/movies/Hollywood ta bende nos for di chikito, cu si bo ta mas bunita/flaco/mas jong, si bo tin e famia perfecto etc. bo lo ta mas feliz. Masha facil bo ta perde ‘strea di Noord’ online. Inconscientemente, hende ta cuminsa copy/paste loke mayoria ta haci of ta comporta nan mes otro di con nan ta en realidad. Tur esaki djis pa mantene popularidad, purba keda relevante of pa sinti cu bo ta ‘belong’, siendo cu bo no ta stay true na ken bo ta en realidad. E aspecto ey den un comunidad asina chikito eventualmente semper ta sali afo y hende ta ripara cu ken bo ta online no ta ken bo ta den bo day-to-day.

SOLIDARIDAD, CON?

Nos mester ta ‘self aware’ y honesto cu nos mes prome, pa despues trece esaki p’adilanti cu un otro y asina “practice what we preach”. E no ta un secreto cu den mi carera profesional, e apoyo/ayudo cu mayoria biaha mi a ricibi tabata bin di hende homber compara cu e hende muher. Por maske con hopi mi kier advocate pa empower hende muher, esey no tur ora tabata mi experiencia personal den practica. Pues mi ta kere nos intencionnan ta bon, pero no tur ora e ta traduci asina den accion dentro di nos comunidad.

UN OTRO MUHER CU TA INSPIRA BO

Localmente, persona nan manera Tisa LaSorte, Nicole Hoevertsz, Nathaly Cabrera y Wanda Broeksema por ehempel ta inspira mi. Nan ta hende muhernan cu ta ‘take charge and are in charge’ cu semper nan a kom over autentico y nan mes. Definitivamente, mi no por laga mi mama afo. Den transcurso di aña, mi a wak‘e embrace su edad cu confidence y un youthful heart, enfrenta su batayanan keto keto su so cu Dios. Na edad di 70+ mi ta maak mee con e ta endure amistad nan long distance, bay les di piano pa prome biaha, wak tutorials riba Youtube pa siña cos nobo. E tin cero miedo di tecnologia. Cosnan asina ta pone mi look forward na ora mi yega su edad. Si bo wak bon y pone atencion en realidad, tin hopi hende muher rond di nos cu di un of otro forma ta inspira tur dia.

CONSEHO:
Abo ta bo miho ‘bestfriend’!!! Inverti den bo mes, get to know your true self; conoce ken bo ta, kico bo gusta of no, dicon bo ta e manera cu bo ta. Sea ta dor di lesa buki, bay na un coach/psicoloog, journaling, ora cu Papa Dios, whatever ta funciona pabo. Esey ta un superpower cu hende hamas lo por kita f’e bo y cu lo permiti bo semper show up ‘unapologetically Yourself’...

MUHERNAN NA ARUBA

Mi ta haya cu el a desaroya den sentido cu tin hopi mas hende muhe den posicionnan clave den nos comunidad. Sin embargo, ainda bo ta ripara un approach y/of comportacion machista respecto esaki. Comentarionan riba aparencia fisico, cabey, bisti, peso, factor “emocional” etc. cu no tin nada di haber cu e balor y capacidad di e ser muhe den cualkier posicion ta keda wordo haci dor di muhe y homber. Eynan nos tin hopi trabou pa haci ainda como sociedad. 

UN MOMENTO INOLVIDABEL DI INSPIRACION
Dia cu mi a renuncia na radio y publicamente comparti mi storia di kico a sosode. Mi no a imagina hamas e impacto di e video ey y honestamente el a spanta mi. Pa 2 dia largo mi no a subi social media (mientras mi tabata na Paris), te ora dos di mi miho amigonan na Hulanda a contact mi pa bisa mi subi online y lesa loke hende tabata comenta. Un avalancha di comentario, mensahe priva, emails di hende demostrando nan apoyo pero principalmente siendo vulnerabel cu mi y compartiendo e mesun frustracion cu mi a pasa aden. Mas cu un persona a email mi nan carta di retiro despues cu nan a wak mi video. E experiencia ey a pone mi a realisa e responsabilidad enorme cu mi ta carga den mi carera y con cada cos cu mi haci tin un impacto den mi comunidad.

INSPIRA NOS MUCHANAN
Nos mes por uza e plataformanan pa trece dilanti un imagen mas realistico y autentico pa e hobennan por wak. Ademas, mi ta kere cu tayer of charlanan na scol hopi biaha ta yuda. Na varios ocacion mi a yega di haci esey y ora ora mi mustra un potret cu mi a photoshop djis pa mi pone online, of un dimi ora mi tbt tin nan edad, nan ta echt keda den shock. Experiencia nan asina ta habri nan wowo pa nan realisa cu hopi cos cu nan ta wak riba social media ta fabrica y cu ta ok pa presenta bo mes online manera cu bo ta. 

TopBuilt with Shorthand