Laboratorio Familiar, e prome laboratorio medico internacionalmente acredita na Aruba y den Caribe, ta orguyoso di anuncia cu actuamente nan a keda someti na un audit integral pa parti di American Association for Laboratory Accreditation (A2LA). Esaki ta un proceso fundamental pa renova e acreditacion internacional cu nan a mantene for di 2008, reflectando nan compromiso inkebrantabel cu excelencia cientifico y cuido di salud na un nivel mundial.
E aña aki, Laboratorio Familiar ta celebrando un hit importante: 39 aña di existencia sirbiendo comunidad Arubiano. Esaki ta reafirma nos dedicacion na calidad y confiansa como lider den prueba medico den e region.
E audit a ser realisa pa Dr. Marc Rumpler y Dr. Robert Bredt,
dos auditor respeta cu ta biaha internacionalmente pa evalua laboratorio den mas di 50 pais,
inclui China, Japon, Abu Dhabi, Mexico, Canada, Italia, Sudafrica, Australia y hopi otro pais.
Dr. Marc Rumpler ta e evaluador principal di A2LA y Director di ThermoFisher Scientific na United States. Cu experencia den hopi disiplina laboratorial, Dr. Rumpler ta trece un gran conocemento global, acumula durante su trabou den laboratoria na diferente parti di mundo.
Dr. Robert Bredt ta afilial na Texas Medical Board y ta Director di tres laboratoria den Texas. Cu mas di 30 aña di experencia cu A2LA, Dr. Bredt ta un experto reconoci den Sistema di Informacion Laboratorial y Sistema di Calidad.
E audit a cubri un periodo di cuater dia, durante cu e auditornan ta revisa detayadamente diferente areanan clave manera:
- ▪️ Sistema di calidad y maneho
▪️Maneho di Personal
▪️Hematologia
▪️Kimica general
▪️Endocrinología
▪️Analisis di Urina
▪️Microbiologia
▪️Parasitologia
▪️Diagnostico Molecular
▪️Sistema di Informacion Laboratorial
E audit di e aña aki a inclui un revision di un version nobo y mas riguroso di e sistema di acreditacion, demonstrando e dedicacion di Laboratorio Familiar na mehoramento continuo y na logra standard mas halto.
"Nos ta orguyoso di a mantene nos acreditacion Internacional pa 17 aña y contando," Lic. Irene van der Linde, Specialista den Microbiologia y Directora di Laboratorio Familiar. "Cada aña, nos ta traha pa fortalece nos sistema y proceso, pa sigui duna e nivel mas halto di cuido na nos comunidad. Mi kier gradici mi team dedica pa nan trabou duro y nan compromiso cu excelencia. Hunto, nos ta pone e standard pa laboratoria na Aruba y den Caribe."
Lic. Irene van der Linde
Lic. Irene van der Linde
E acreditacion di Laboratorio Familiar no ta solamente un motibo di orguyo, sino tambe un aspecto esencial di e sistema di salud di Aruba, garantisando cu e prueba medico ta cumpli cu e standard global di confiabilidad y precision. E experencia di auditornan manera Dr. Rumpler y Dr. Bredt, cu a traha den laboratoria na hopi parti di mundo, ta reforsa e nivel internacional di profesionalismo y calidad cu Laboratorio Familiar ta traha pa mantene.
Laboratorio Familiar ta e laboratorio medico lider na Aruba y e prome den Hemisferio Occidental pa ricibi e acreditacion internacional aki. "For di 2008, nos a mantene e standard mas halto global den prueba laboratorial, sigurando e salud y bienestar di nos comunidad. E aña aki, nos ta celebra cu orguyo 39 aña di existencia, solidificando nos posicion como un institucion confiabel y esensial pa e salud na Aruba."
Built with Shorthand