Cu su 37 aña, Kimberly Joanne Hoo, directrice di Trinity Quality Care Services, ta mira como un lider den cuido pa hende grandi na Aruba. Su amor pa e trabou como verpleegkundige y su dedicacion pa mehora cuido na nos isla ta un inspiracion pa tur hende.
Kimberly Joanne Hoo
Kimberly Joanne Hoo
Kimberly Joanne Hoo
Kimberly Joanne Hoo
Pakico bo a sinti e yamado pa haci e trabou como verpleegkundige?
Kimberly ta conta cu e no tabatin intencion pa bira un verpleegkundige inicialmente. “Semper mi a bisa mi ta bay studia pa schoonheidsspecialist. Mi a hasta schrijf in y wordo aangenomen pa e opleiding di schoonheidsspecialist. Ora cu mi a haya rondleiding na e skol, something did not feel right. Mi a sinti cu mi no a fit in”, e ta bisa.
Pero, durante un conferencia Christian na Hulanda, el a sinti un yamado profundo pa sigui un rumbo diferente: enfermeria. Cu su 17 aña, el a cuminsa su formacion na nivel 3, sigui pa MBO y HBO verpleegkundige. Ora el a bolbe Aruba, el a specialisa den cuido intensivo. “No tin nada di enfermeria cu mi no ta gusta”, e ta bisa. “Di yuda un persona den un situacion critico te na wak nan recupera ta algo hopi bunita y gratificante.”
Kimberly su idea pa Trinity Quality Care a nace ora e tabata traha na Hospital Oduber (HOH). El a ripara un necesidad pa cuido priva tanto pa turista como pa nos hendenan local. Na 2019, el a cuminsa modestamente c’un medical bag, su auto, y su laptop. Un boca a bisa otro y asina e servicio a cuminsa crece. Durante COVID-19, el a adapta su negoshi pa yuda nos comunidad local. “Mi no a pensa cu mi lo crece asina liher, pero mi semper tabatin mi vision di unda mi kier yega,” e ta agrega.
“E posibilidad di keda biba na cas y mantene bo control personal ta algo sumamente importante,” e ta bisa. Trinity no ta solamente asistiendo hende grandi, pero tambe ta duna servicio como post-operacion care, terminale zorg, y cuido pa turista durante nan vakantie. “Nos no ta traha solamente cu hende grandi, un 80% di nos clientenan ta hende grandi si. Nos ta asisti cualkier persona di cualkier edad cu tin mester di cuido. E servicio cu nos ta brinda mas hopi pa hendenan local ta asisti nan den baña y bisti, wondzorg y health checks." Otro servicio nan cu nos ta duna ta ‘post-operation care’, ora c’un persona caba di opera nos ta asisti den haci e herida limpi, duna guia y asisti den e parti di recuperacion. Tambe nos ta haci cuido paliativo, mantelzorg, cuido pa turista durante nan vakantie, random drug testing, IV-services etc.. E unico servicio cu nos no ta brinda (ainda) ta Kraamzorg. Kimberly ta destaca cu e falta di acceso na cuido accesibel ta un reto pa nos comunidad, algo cu e ta spera gobierno por investiga y mehora.
Con bo ta mira cu gobierno por yuda pa alivia e cuido di hende grandi na Aruba?
“E tin cu cuminsa na e parti di ley. Cuido mester ta algo accesibel pa nos tur. Na e momento aki nos sistema di seguro no ta cubri Thuiszorg pa adulto mayor ni tampoco e cuido ora un persona wordo interna den un verpleeghuis. Na Aruba nos no tin Wet Langdurige Zorg (WLZ) cu por sostene nos grandinan ora nan tin cu paga pa cuido. Mayoria di nos grandinan ta biba di nan pensioen, cual ta haci’e financieramente dificil pa nan paga pa cuido. Na e momento aki e Gobierno di Aruba ta sostene algun instancia cu subsidie. Pero den e ultimo 10 añanan sigur por a mira cu e cantidad di enfermedad a subi, nos ta den un vergrijzing, cual ta nifica cu e cantidad di adulto mayor a subi y ta bay keda subi e proximo añanan. Mester pone mas atencion (y tambe inverti) den diferente recursonan pa por maneha e vergrijzing y malesanan cronico na Aruba. Debi na e cantidad di enfermedad y e cantidad di adulto mayor cu a subi, diferente personanan (incluyendo mi mes) a tuma iniciativa pa brinda diferente tipo di servicio di cuido, sea ta habri un verpleeghuis of thuiszorg priva. Pero manera menciona, no ta tur hende por paga pa cuido priva, cual ta duel mi hopi.”
Kimberly ta splica cu e momento mas dificil ta ora un cliente fayece. “Nos ta forma un laso fuerte cu e cliente nan y nan famia, y ora nan fayece, e ta un duelo pa nos tambe.” Pero e ta agrega cu e gratificacion di nan trabou ta grandi. “Un momentonan inolvidabel ta ora clientenan y nan famianan ta expresa nan gratitud pa nos cuido durante momentonan dificil. Tin diferente cliente y famianan cu mi nunca lo lubida. Nos ta mira y experencia cosnan hopi impresionante y impactante tur dia debi cu nos ta yega serca un persona/famia den nan momentonan mas debil. E no ta un decision facil pa permiti un persona “straño” drenta den bo privacidad y wak bo debilidadnan. Dus, p’ami personalmente e ta un honor cu nos clientenan ta duna nos e confiansa pa drenta den nan hogar durante momentonan dificil.”
“Tur aña nos ta haci un klantentevredenheids onderzoek. E aña’aki nos a score 93% cu nos clientenan ta satisfecho cu e servicio cu nos ta duna. Tambe nos team tin cu raporta tur dia kico nan a haci serca cada pashent. Nos tin periodo caminda cu nos ta manda un enfermera haci evaluacion cu nos clientenan y tambe pa controla con nos enfermeranan ta trahando.”
Con bo ta combina bo trabou cu bo rol como mama soltera?
“Esaki sigur ta un di mi reto nan di mas grandi vooral cu mi famia ta biba na Hulanda (mama, tata y rumanan). E titulo di mama ta mi titulo di mas importante. Mi yiunan semper ta na prome luga. Pa combina un negoshi y t’ey pa mi yiunan ta rekeri hopi ‘planning’, pasenshi y comunicacion. Tin momentonan cu e por bira ‘overwhelming’, pero danki na Dios mi tin sosten di mi famianan akinan (tantanan/omo/prima, etc) y mi amiganan.”
Bo plannan pa futuro?
Kimberly ta spera expande e servicionan di Trinity y crea colaboracion cu stakeholders pa yuda mehora e calidad di cuido na Aruba. “Tin tanto mas cu nos por logra tanto pa nos hendenan local como turista,” e ta bisa. Su meta ta pa duna cuido di calidad mas halto, pa sigura cu nos hendenan grandi por biba na nan cas cu dignidad y amor.
Built with Shorthand