E HOBEN CU A PONE PRINSES AMALIA SACA UN LAGRIMA
Revelando su alma artistico di autismo pa medio di Poesia.
Skirbi pa: Jacqueline Wernet
Have you seen the size of the sky?
Can you measure where it starts and where it ends? Don't let anyone tell you there's no room for you to be a star.
Mi ta un grupo di celulalnan, poco ‘straño y diferente, mi mes tin cu bisa. Mi no ta kere cu hopi hende lo por describi mi, incluyendo mi mes. Mi ta mi mes. Mi ta un persona cu lo bo tin cu conoce y lo bisa’ “Ok, esey ta djis Kay”. Mi ta den un cambio y crecemento constante.
INSPIRACION
Mi no a scoge e caminda aki, sino e caminda a scoge ami. Pero lo mi no cambia nada paso esaki ta haci ken mi ta. E reto grandi ta ora un hende no ta compronde autismo y no ta compronde mi.
CUALIDADNAN
E lo ta facil y corecto pa mi menciona algun abilidad y cualidad pero mi ta kere pa un hende keda ken e ta realmente, ta algo cu ami semper lo admira.
MOTIVA UN OTRO
Solo ta sali bek. Hopi duro pa kere ora bo no ta confia pasobra bo ta rondona pa scuridad. E ta un forsa mental inmenso pa corda bo mes cu solo TA y LO sali bek.
CON ABO TA INSPIRA?
Mi inspiracionnan ta bin for di retonan. Con mi ta sobre pasa y expresa di otro banda ta con hende nan ta keda inspira di mi. Ainda mi ta haya increibel ora un hende bisa mi cu mi ta inspira nan. Mi tin cu tuma un rato pa mi refleha riba esaki.
LOGRO
Actualmente mi ta contento den su mayoria, con mi bida ta bayendo. Mi ta poco indeciso cua ta e logro cu mi ta mas orguyoso di dje, pero mi a gusta masha hopi mes e oportunidad di por a recita pa princes di Hulanda, Amalia. Mi a sinti manera ta nos dos so tabata eynan. Mi ta gusta haci otro feliz y mi a haci'e feliz, y esey tabata e mihor parti.
Den un otro nota; Mi gusta e biahenan cu mi a haci y con mi a crece y por a sobrebibi cada un. Esey ta algo cu mi ta 'klop' mi mes riba mi schouder.
Mi bida profesional ta mi hobby tambe y un parti di con mi ta maneha mi emocionnan, dus nan ta bay man den man. Ora mi ta sinti cu mi no ta disfruta haciendo arte, mi ta djis stop. Pa hopi motibo, hende por usa esaki como un distraccion, manera ora mi kier sinti mi sentimientonan. Mi sa cu pa otro hendenan, nan no por djis stop. Ami ta kere cu bo por semper tuma un break.
KICO TA HACI ABO, UN MUHER CU TA INSPIRA?
Si mi ta completamente honesto, mi no ta sigur pero mi ta kere cu hende a wak mi den forma sensitivo y fragil y toch ta continua cu e cos 'ki cu nos ta yama bida.
BARERA
E miedo pa keda huzga. No ta importa loke bo haci, no ta tur hende lo keda satisfecho y esey por ta duro pa 'deal' cune. Ningun hende kier keda bergonza of huzga. Of e pensamento; "ningun hende no ta worry kico mi tin di bisa" . Nan ta worry. Semper lo tin un hende cu ta interesa y ta resalta cu loke bo tin di bisa.
“We are all poems in different forms”
SOLIDARIDAD, CON?
Dor di no compara, competi sino halza otro. Sea honesto, bon hende, yuda otro y comunica bo necesidadnan cu otro. Ami ta kere cu esey ta e mihor manera.
UN OTRO MUHER CU TA INSPIRA BO
Hopi hende muher, den nan mes forma y pa diferente motibo a y ta inspira mi y a yuda mi crece mental- y emocionalmente. To be kinder and more knowledgeable. Hopi hende muhe den mi bida tin e efecto aki riba mi.
CONSEHO
Un hende un biaha a bisami; djis haci’, si bo ta sinti e gana, e ‘gut feeling’ pa haci algo. E peor cos cu por pasa ta cu bo por faya pero bo por semper siña y purba di nobo. Y e mihor cos cu por pasa ta cu lo bo logra bo soño y aspiracionnan. Be scared and do it anyway!
MUHERNAN NA ARUBA
Mi no t'ey pa hopi tempo pero nos tin un Prome Minister muher cu tin hopi pa bisa.
UN MOMENTO INOLVIDABEL DI INSPIRACION
Ora mi tabata mas hoben, mi a parti un bals cu mi ruman muher y su amiganan y mi a keda sin nada pa mi mes. Mi ruman muher a bisami e ora cu e kier ta mes bon hende cu mi y el a puntrami pa e parti esun di dje, cu mi. Nunca mas mi lo lubida esey.
INSPIRA NOS MUCHANAN
Mi ta kere cu esaki a cuminsa caba. Ora bo sigui media bo por mira hopi hende muhernan entrepreneurs of muhernan den posicionnan di poder, muhernan haciendo trabounan di e stereotipo tipicamente pa hende homber. Pues, dor di laga nos muchanan wak esakinan ta inspira nan pa crece y bira como esnan mas grandi.
Built with Shorthand