Karixon (30), ta un talento sobresaliente den e comunidad creativo di Aruba. Cu su abilidad pa pensa “out of the box” y su pasion pa innovacion, Karixon ta inspira un generacion nobo di emprendedornan tur dia, pa kere den nan mes y sigui y tuma e prome paso y actua riba nan soñonan creativo. Su historia personal ta un prueba di esaki unda factornan manera forza, determinashon, perseverancia y gana pa comparti y inspira otronan combina cu su mente creativo, ta duna nos un honor pa yam'e nos Persona Xclusivo 2024.
Karixon
Karixon
Naci na Aruba, Karixon su caminda no tabata uno tipico ni tampoco facil. Durante su temporada na MAVO, el a keda sinta 3 biaha y a keda kita for di scol cu consecuencia cu e mester a sigui 'namiddag school'. Pa hopi cu e obstaculonan inicial aki por tabata, un cos nan no por a haci ta, stroba su evolucion den crece y bira un tremendo productor creativo, entrepreneur y hasta un 'motivational speaker' manera cu e ta awe. Su interes pa arte a cuminsa for di hopi trempan, siñando su mes toca piano y drums, mientras e tabata pasa oranan den su camber na Nuñe, Paradera ta produci beats. Pues sin cu e sa, creando e inicio di su futuro.
Ya cu su 15 aña caba e tabata un entrepreneur hoben tocando como DJ na fiestanan di cas. Na 2013, un video cu el a publica, "Karixon Upcoming Tracks 2013," a bay viral. Den un video di 9 minuut, su talento y energia a captura atencion di hende tur caminda rond mundo. “Bo ta bay bira grandi,” otro artistanan tabata bis’e. Y berdad, esey tabata su cuminsamento. Di eynan oportunidadnan pa toca na Corsow, Hulanda a bira un realidad unda eventualmente, el a bay pa sigui su estudio den produccion di musica. Na Hulanda, el a siña mas perfeccionando su abilidadnan como producer y con pa traha den banda y interactua cu otro musiconan.
“Bo mester actua awor pa cumpli bo soño"
“Loke sea cu mi haci cu ta pone pan riba mi mes, mi mester enjoy”
Mientras e tabata desaroya su talento como DJ y producer, Karixon a expande den animacion y edicion di video. Inspira pa street talents na Hulanda, un produccion cu e mes tabata produci den forma spontaneo buscando hendenan cu e ni conoce riba caya pa demostra nan talento eynan mes 'on the spot', e tabata edita e musicanan aki y crea produccionnan unico. Aki ta unda el a siña e arte di edita, anima y pone su historianan den forma visual. Ora 'House Music' a cuminsa bay abou y 'Moombahton' a bira popular, Karixon a adapta. Su abilidad pa evoluciona cu e industria a pone su nomber den 'spotlight' atrobe. Sinembargo, Aruba tabata yam’e. El a bolbe Aruba, pensando cu lo ta pa un rato, pero Aruba a resulta di tabata pa algo mas grandi…
E impacto di fayecimento di su welo, un figura crucial den su bida, a inspira Karixon pa wak bida di un otro manera. E perdida aki tabata un 'despertar' emocional increibel y un recordatorio cu bida ta cortico y cu e momento pa actua riba bo soñonan creativo, ta awor!.
Durante un epoca dificil di pandemia y bek na Aruba, e talento di Karixon a haya un espacio cu creacion di varios videonan cu a bay viral, manera di covid y mas. E tabata cla cu Karixon tabata bek na cas. Pronto despues, el a keda contrata pa otro negoshinan pa traha contenido di marketing. Na e punto aki, Karixon a experencia stabilidad financiero pa prome biaha. Y aki el a tuma e decision pa crea un negoshi nobo y diferente. Inspira pa e alegria y e energia di carnaval di Aruba, el a lansa Road Jam Party Bus, un bus di fiesta unico cu ta trece un ambiente unico. E interior y exterior di e bus ta refleha su pasion pa creatividad y su deseo pa uni hende den ambiente di fiesta, estilo Arubiano. Pues, un experiencia 100% cultural. E idea no solamente a capta e atencion di hende na Aruba, pero tambe a gana reconocimiento internacional. Road Jam Party Bus a bira un simbolo di creatividad den negoshi y un prueba di tur cos ta posibel si pone detereminacion, vision den accion.
Mas c’un entrepreneur, Karixon ta un mentor. Como un mentor pa generacion hoben, e ta constantemente duna charla na scolnan y eventonan, inspirando hendenan hoben pa sigui nan pasion. Cu esaki e ta motiva hendenan pa reconoce e poder di determinacion durante desafionan den bida, pa toch logra metanan grandi, mas ainda den e area di creatividad. ”
Road Jam Party Bus ta un di su exito mayor, pero no ta su unico negoshi. E ta envolvi tambe den produccion di videonan creativo pa eventonan y productonan. E forma cu e ta uni creatividad cu negoshi ta pone resalta. Su produccionnan ta trece mas cu produccionnan atractivo; nan ta conta storia y uni hende.
Built with Shorthand