Carnaval di Aruba 71 a introduci un era fresco cu 4 cara nobo den e rol di MC. Gusta ambiente, yena di talento, y un energia contagioso ta e base cu a haci e cuater MC nan aki, a haya nan lugar den historia di nos Carnaval 2025. Cu su 19 aña, Jorienne Angela ta describi su mes como un persona cu hopi ambiente, jolly, y multifacetico cu hopi talento.
Su pasion pa arte a cuminsa hopi trempan, y awe e ta un figura conoci den e mundo di musica y carnaval. Su trayectoria artistico ta un inspiracion pa hopi hoben, mustrando cu dedicacion y trabou duru ta lanta bo na altura.
JORIENNE ANGELA
JORIENNE ANGELA
JORIENNE ANGELA
JORIENNE ANGELA
Dede su 4 aña, Jorienne a cuminsa su carera como cantante, participando den festivalnan di gospel y scol. “Cu mi 11 aña mi a participa pa prome biaha den un festival ‘Kids Christmas Song Festival unda mi a keda na di 5 lugar.” Esaki tabata e punto di salida tambe pa hopi otro festivalnan y experimentacion cu diferente genero di musica.
Jorienne su talento y dedicacion lo no tarda pa duna resultado. El a keda corona como Reina di Dande Hubenil pa 4 aña consecutivo, ganadora di un canto na Nos Himno na aña 2023, Roadmarch Queen Hubenil dos biaha, y Reina di Tumberito un biaha. Despues di un trayecto exitoso den e era hubenil, Jorienne a tuma un pausa prome di subi na e nivel adulto, preparando su mes pa e categoria grandi. Su prome gran victoria den e nivel adulto tabata na e
Festival di Caya Brazil, sigui pa su premiacion maximo den Tumba Grandi.
Pa Jorienne, arte ta su bida. No solamente un cantante talentoso, pero tambe un pintor, chef, barbera y awor, un MC. Su amor pa creatividad y expresion artistico ta evidencia den tur loke e ta toca. “Mi ta super orguyoso di tur mi logronan y contento pa wak e proceso di unda mi a cuminsa te unda mi ta awe.”
Un di e portanan nobo cu Jorienne a habri recientemente tabata den e mundo di MC. Su invitacion pa tuma e rol a bin di Julio Andrews, cu a reconoce su talento y a puntra si e tabata interesa. “Sin pensa dos biaha, mi a acepta e reto aki,” Jorienne ta bisa. E ta un persona cu gusta reto y e tabata dispuesto pa experimenta algo nobo.
Pa su preparacion, Jorienne a traha duro riba su presentacion mental, mirando video nan di MC na evento di Reina, y ricibiendo tips for di su mentor, MC Tarrick. E ta sinti cu su conexion cu su partner MC tabata bon, mustrando un energia positivo y dinamico riba escenario.
Jorienne ta un amante grandi di carnaval, disfrutando tur e evento nan, pero su preferencia ta e festivalnan di canto. “Den carnaval mi tin mas cu djis 1 rol, door cu mi ta un cantante y awo tambe un MC. E rol di un Maestro di Ceremonia e aña ‘ki ta un experiencia unico paso e ta algo diferente p’ami. E momento cu bo ta riba escenario, tur e atencion ta riba bo y di loke bo ta presentando y na mes momento bo tin manera un poder di por anima un publico asina grandi.”
Un anecdota cu Jorienne ta comparti cu nos ta un momentonan ora e tabata cla pa subi na escenario y su mente a bay bek na su tempo di infancia. “Mi tabata mira television y mi tabata imita e presentadornan di e eleccion di Reina, sin pensa cu un dia mi mes lo para riba escenario y biba e mesun cos.”
Jorienne ta kere cu e generacion nobo mester sigui eleva nos tradicion y bin cu idea nan nobo pa sigui crece.
“Si cada aña nos trece innovacion, sigur evento nan lo crece y bira mas grandi. Nos tin energia nobo di un era nobo cu por sigui engrandece nos carnaval.”
Su conseho pa otro hobennan ta pa kere den bo mes y den bo talento. "Probecha di cada oportunidad cu ta bini dilanti, paso si nos no haci’e, otro hende tampoco lo haci’e pa nos. Nos ta e futuro di carnaval y nos ta carga nos bunita y dushi tradicion.”
Pa futuro, Jorienne ta mira su mes sigui crece den carnaval, y cu e deseo di crea su propio legado como cantante y MC. “Cada aña ta un oportunidad pa sigui mehora y ta e mihor version di bo mes.”
Si e mester describi carnaval den un palabra, Jorienne sin duda ta bisa
"Kippenvel".
Built with Shorthand