Un tata. Un coach. Un homber cu a perde su partner…… y ta cria su dos yiunan awor, su so. E bida di Johnny Goitia no ta facil, pero den cada dia yena di responsabilidad, e ta haya espacio pa hari, pa educa y pa djis sigui y trata na e ta, un mihor tata pa su dos yiunan.
“Mi dia ta cuminsa 6’or di mainta,” Johnny ta bisa. “Lanta mi yiunan, traha nan cuminda, hibanan scol, despues mi mes ta bay duna les." Asina, di tennis te padel, Johnny su rutina ta yena. Pero anochi, na cas, tur cos ta cambia. “E ta algo masha simpel, pero ora nos ta na cas mi ta yamanan den mi camber y mi ta gusta haci chansa cu nan riba cama, kishiki, djis hopi harimento. Esaki ta nos momentonan.”
Johnny Goitia
Johnny Goitia
Dos aña pasa, e famia a keda sacudi cu e perdida di Dhayene Goitia, cu sucumbi despues di un lucha largo c’un enfermedad. Aunke como famia nan a biba y lucha hunto cu speransa semper, e perdida a laga un bashi grandi atras.
Johnny a perde su gran amor, pareha y amiga mientras su yiunan a perde nan mama stima. Awor dos aña mas leu, e recuerdonan ta loke ta keda intacto y un forma nobo pa mantene Dhayene bibo den nan curason “Mi ta purba pa nan no corda e momentonan tristo. Mi kier nan keda cu recuerdo feliz.” Pa Johnny mes, e lugar unda e ta sinti su mes mas serca na Dhayene ta na tennis, e ta bisa. “Nos tabata tur dia na cancha. Y ora mi ta drecha racket na cas, mi ta pone canticanan di nan mama. Mi ta wak sonrisanan ta bini.” Y si e por puntra su partner un pregunta awe e lo ta ; “Unda bo ta y si bo ta bon. Bo por consehami con pa sigui duna e amor cu bo tabata duna, awor mi ta tata y mama pa nos yiunan na mes momento.”
Como coach, Johnny ta kere den poder di deporte pa siña di bida. “Tennis ta mas c’un deporte,” e ta bisa. “ e ta siñabo les nan di bida, respet, disciplina, reta bo mes, ta exitoso pero tambe siña perde y sigui p’adilanti. Desde cu el a bira tata e ta bisa cu su forma di coach su muchanan a cambia sigur. “Mi ta compronde hopi mihor kico un coach por nifica pa e muchanan. E mayornan tin un rol inmenso, mescos c’un coach. Y awor mi ta tur dos.”
E les mas importante pa su yiunan; “Bida ta dushi, pero por ta duro tambe, e ta keda na abo si bo ta sufri cu tristesa of cu alegria. Esaki ta palabra nan di nan defunto mama cu mi lo sigui ripitinan”
Dhaena & D’John
Dhaena & D’John
“E 24 ora di un dia no ta suficiente,” Johnny ta bisa. “Pero mester make it happen.” Su kring di amistad ta chikito pero fiel. “Mi amigonan sa ken nan ta. Famia ta yuda ora nan por. Pero mi no ta gusta cansa hende.”
Su yiunnan ta describi nan tata den 3 palabra:"Nos tata, nos amigo, nos coach."
“Mi meta pa mi famia ta pa mi 2 yiunan logra un scholarship cu nan deporte y ami por ta parti di e proceso como Tata y Coach. Mi sa cu pa logra esaki kizas lo nos mester por muda y bay biba afo pa subi e nivel di nan deporte. E lo ta dolor paso mi curason ta pa e tennis di Aruba."
D’John
D’John
Dhaena
Dhaena
Pa otro tata den situacion similar?
E dolor cu nos ta biba cune, no pase nunca pa bo yiunan. ‘Self Talk’ ta importante. Bay lama y goza di naturalesa y deporte / hobby, eseynan ta mi terapia. Percura pa kico cu bo haci, e ta cu ta bale la pena. No uza bo sonrisa manera remedi, uze ora bo ta bon y uze ora bo ta malo.
“Bida ta cortico,” Johnny ta bisa.
“Bib’e bon dunando respect y atencion na tur hende te hasta esnan cu ta contra dibo. Bida ta mane un negoshi, si bo no admistr’e manera mester ta, bo ta bay bancarota.”
Built with Shorthand