Jenniree Dirks ta e nomber cu ta refleha su legado familiar, scogi pa su mama na honor di un presentado di noticia Latino varios aña atras. Desde su inicio di su carera na Telearuba na 2013, hopi a cambia den su bida, enfrentando varios obstaculonan cu a haci’e mas fuerte y resiliente.
Tur cos a cuminsa ora su amiga di infancia a inscribi Jenniree na un ‘casting call’ sin cu e tabata sa. Su amiga a insisti pa e bay y cu poco mucho animo y sin preparacion, Jenniree a participa na e casting. Finalmente, el a keda scogi como un di e faboritonan. Su trayectoria a cuminsa como presentado di Lotto, sigui pa periodista y despues como presentado di noticia.
JENNIREE DIRKS
JENNIREE DIRKS
A lo largo di su carera, Jenniree tabatin e oportunidad di presenta eventonan importante, entre otro: eleccion, reunionnan politico, eventonan carnavalesco, a entrevista ministernan na Aruba y Corsou, acto protocolarionan; tur cu a amplifica su experiencia den e mundo di periodismo. Su experiencia a reenforsa su abilidad pa maneha situacion formal cu confiansa y profesionalismo. Sinembargo, su caminda no a bin sin dificultad. Su temor pa critica tabata un lucha constante, pero el a siña pa enfoca solamente riba e opinion di esnan cu realmente ta importa. Apesar di esaki, su mayor fortaleza ta su durf pa papia y defende su mes den cada situacion.
Jenniree tambe ta mama y tin un pareha. Rondona di famia cu ta apoy’e den tur cos, ofreciendo e respaldo emocional y motivacion necesario pa sigui dilanti den su carera. Famia ta super importante p’e, y e ta balora profundamente e momento cu nan comparti cu otro. Apesar cu hopi ta mir’e como un persona masha serio den pantaya, e realidad ta cu e tin un gran sentido di humor. Den su tempo liber, e gusta relaha na cas, pasa tempo cu su famia y mantene un estilo di bida activo. Esnan conoce di serca ta destaca su abilidad como un team player, mescos su talento pa organisa y traha segun schedule.
Awor, e ta cuminsa un aventura nobo den e mundo di media cu su participacion den e programa 90 Grado na radio Canal 90. E espacio inovador aki cu e lo presenta hunto cu e team di 90 Grado, ta promete di bira un referencia informativo na momento di ofrece noticianan di calidad na su oyentenan. E programa 90 Grado no ta fruta di esfuerso improvisa, pero e resultado di casi tres aña di preparacion y planificacion. Cu e base solido aki, Jenniree y e team di 90 Grado ta cla pa confronta e desafio di mantene e publico bon informa.
Cu su union na Canal 90 como presentado di noticia, Jenniree ta continua den combina su amor pa e periodismo cu su deseo di ta un modelo pa su comunidad y su famia. Su pasion pa television y radio, hunto cu su autenticidad, ta gui’e den su caminda, afirmando su dedicacion pa haci un diferencia den e bida di esnan cu ta rondone.
Built with Shorthand