Hopi conoce Jason Gerling como un entrenador fisico y coach mental y co-propietario di Bodyzone Fitness Club na Aruba. Su bida profesional for di Hulanda pa varios otro puesto nan di seguridad halto na Merca y Aruba no tabata mas cu un bida cu rectitud y hopi exigencia personal. Tabata precisamente e rectitud y estilo aki mes cu finalmente a conduci’e den e mundo di fitness, algo cu e tabata gusta y tabata pas perfectamente cu su estilo di bida. Es mas, mirando bek, Jason ta bisa cu como un mucha, manera hopi otro muchanan, el a lanta den un mundo cu ta pre-condiciona cu regla y metanan cu e lo tin cu logra pa yega na 'exito y felicidad' pero segun el a crece, el a cuminsa compronde tambe cu no ta tur ora bida ta alinea cu plan nan cu nos ta traha pa nos mes. E realisacion aki, manera serca hopi otro hende, ta haci e ora cu nos ta cuminsa cuestiona nos proposito y lugar den mundo cu consecuencia cu nos ta cuminsa sinti desconecta for di nos propio felicidad.

Awor, despues di un trayecto di 6 aña di descubrimento propio y transformacion, Jason ta comparti cu hopi corahe, un storia cu no ta unicamente di dje, pero un narativa comparti cu ta resona universalmente den e experiencia di hopi hende.

Mi temporada den polis a transformami den un persona cu mester tabata semper firme, determina y sin tambalea. Constantemente mi tabata midi mi limite mental y fisico. E persecucion incansabel aki di forsa a bira mi di dos naturalesa, formando mi rol despues como director di seguridad y security freelance. Pero e berdad ta cu den e carera exigente aki, mi a perde contacto cu mi bos interno tambe.

Expectativanan impone riba mi mes, a bira mi compania constante y nan ‘whisper’ a bira mas fuerte cu tempo. Mi fortalesa cu tabata prome completamente stabil – un mente indestructibel y cu control firme – a cuminsa kraak. Mi a hayami constantemente ta tapa mi emocion nan, ignorando e necesidad pa analisa e proceso di mi mesun emocion mental y emocional. Asina mi a bin realisa cu loke mi tabata haciendo ta purba huy for di mi pensamento nan, locual no tabata e solucion.
E cura di berdad lo por a cuminsa solamente te ora cu mi reconoce e heridanan scondi aki y enfrenta nan directamente. Aki ta unda mi a dicidi busca ayudo profesional – mi prome paso den mi transformacion nobo. Ora cu mi a cuminsa wak mi mes internamente, mi a cuminsa mi biahe pa realmente comprende y conoce mi mes. Mas lat, ora mi a identifica e raiz di mi condicion y a siña con pa lidia cune, finalmente, mi a cambia.
Mi a comprende cu MI FORSA MAS GRANDI A BIRA MI PARTI MAS DEBIL.

Puntra bo mes; No tin un tempo den bo bida unda, apesar cu tur cos ta bay bon, toch tin un bos den bo cabes cu ta keda cuestiona tur cos, kizas hasta saboteando e cos nan positivo cu por ta pasando cu bo e momento ey?

Ta algo cu nos tur ta enfrenta na un cierto punto. Nos tur ta diferente, y nos ta lidia cu esaki, den nos mesun forma. Pero pa algun hende, manera ami, e tabata un forma di tortura mi mes. Aunke nos ta bataya contra nos 'demoñonan interno', toch nos tin cu sigui cu nos bida diario y t’ey c’un cara serio y cumpli cu nos actividadnan normal den nos bida. Pues, basicamente, nos ta bisti un ‘mask’ ,y sigui riba nos caminda di bida. Pero mi a siña cu esaki no ta dura.

Jason a haya recomendacion di un cliente pa lesa e buki "The Untethered Soul" di Michael Singer, y e buki aki a bira un punto crucial den su bida, resonando profundamente serca dje y dunand'e un bista mas profundo ainda den su emocion nan turbulento.
"Desde e tempo ey mi a cuminsa cu long nature and Beach walks y meditacion."

Den su buskeda pa paz interno, Jason a embarca riba un curso di transformacion di 10 dia di meditacion Vipassana na Canada. "Cu esaki, mi a yega na e punto pa yega na e profundidad di mi alma." Tabata aki unda el a pasa dianan den retiro silencioso, sumergi den naturalesa virgen, leu for di zonido nan di sociedad y rutina diario. E silencio aki tabata mas cu djis ausencia di desordo –e tabata un invitacion pa explora su consciencia, un espacio pa confronta y accepta su miedo- y inseguridad nan di mas profundo. "Den e trankilidad di naturalesa ‘ki, mi a haya e paz cu mi mente tabata anhela."

"Crecemento real ta ora cu nos compronde cu nos no ta solamente e bos den nos mente, pero esun cu ta scucha tambe." - Michael Singer.
E sabiduria nobo aki a causa un cambio significante den perspectiva di Jason. El a comprende e relacion simbiotico entre curpa y mente, cambiando su enfoke pa fitness. Hunto cu su co-fundadornan, el a transforma e realisacion aki den Bodyzone Fitness Club - un espacio unico pa hendenan traha y construi, no solamente resistencia fisico sino mental tambe. "Mi tabata pensa antes cu 'tin forsa' tabata nifica ora bo ta blokea dolor. Pero mi a siña cu e forsa di berdad ta ora bo ta reconoce, comprende, y crece for dolor."
E biahe aki di Jason ta revela un dimension nobo di forsa. No ta trata solamente di e poder di nos musculonan of e resistencia di nos curpa. Ta trata di drenta mas profundo den nos miedonan, cuestiona nos creencia nan di hopi tempo, y siña crece por medio di e lucha nan den nos bida.

"No purba huy di bo pensamento nan; sino pruba reconoce nan.

E ta OK pa no ta OK .


Comprende cu vulnerabilidad no ta un señal di debilidad, pero un simbolo di corahe."

CON MEDITACION REALMENTE A CAMBIA MI BIDA

Mi a siña experencia e profundidad di e momento presente, permitiendo mi mes pa observa mi pensamento- y emocion nan sin huzga mi mes. E claridad aki a trece un sentido di paz interno y stabilidad, permitiendo mi pa nabega desafionan di bida cu mas resistencia y paz.
E practica aki a yudami libera mi mes for di patron nan y custumber nan cu no tabata saludabel, hibando mi awor na crecemento personal, mehoracion di relacion nan, y un sentido renoba di proposito.

Si tin un persona lesando esaki cu ta lidiando cu turbulencia mental, mi ta recomenda tres cos: prome, papia c’un profesional; di dos, analisa bo costumbernan y narativo interno; y di tres, rondona bo mes c’un sistema di apoyo.

"Bida ta cortico; si bo ta 40 aña of mas bieu, probabelmente bo no lo t'aki den 60 aña.
Ki uzo tin pa no ta completamente entrega, pasiona y feliz cu bo bida? Lo tin hopi subida y caida, pero e pregunta no ta ki ora e lo pasa sino con abo lo reacciona ora e pasa…


ENGLISH

TopBuilt with Shorthand