Mi ta un mama soltera y un empresario desde 2017. Pero, desde 2023 mi a bira un empresario fulltime, mientras mi a caba di haya mi prome yiu na aña 2022. Mi meta: scoge pa dedica mas tempo na mi yiu (Xander) y tambe dedica mas tempo na mi compania. Un plan cu a zona BOLD pero salud di mi yiu a cuminsa bira alarmante.
2023: Dus den e mesun aña cu mi a lansa pa bira un mompreneur - mi mester a accepta pa fin di 2023 cu mi a hit ‘rock bottom’. Tabata un aña cu mi a purba di balansa salud di mi yiu y stabilidad financiero di mi compania. Salud di mi yiu sigur a bin na prome lugar.
JARITZA CORREA
JARITZA CORREA
2024: Mi a haya oportunidad di bay traha fulltime na un compania p’asina crea un stabilidad financiero bek. Tambe mi a logra stabilisa salud di mi yiu. Tabata sigur momentonan cu mi a pensa pa mihor sera mi compania. Pero oportunidadnan a presenta cu a bolbe sende e chispa cu mi tin den mi curason. Pa fin di 2024 - mi a bolbe scoge pa mi compania.
2025: Un etapa nobo a bolbe cuminsa pa nos y nos ta bay logra. Solamente e biaha aki c’un mision bunita. Banda di re-build nos plataforma. Nos kier crea conscientisacion y oportunidadnan di ayudo, specialmente pa mompreneurs.
Mompreneurs ta muhernan cu ta lanta un compania c’un man mientras cu e otro man nan ta educa y mantene nan yiu(nan). Algo sumamente savage!
Mi ta spera cu un dia mi storia por yuda cualkier otro mama pa keda kere den nan mes. Na caminda por tin obstaculo pero nunca give-up!
Bo a bisa cu bo a ‘hit rock bottom’ na 2023. Kico tabata e momento exacto cu bo sa cu bo no por a sigui asina? Y kico bo a haci pa sali for di dje?
Den 2023, Mi a inicia cu BoldBizz fulltime c’un oficina y trahador. Pero den e mesun aña e momento exacto cu mi a realisa cu mi a ‘hit rock bottom’ tabata ora mi tabata bay cu mi laptop hospital – Xander tabata interna pa motibo di su salud – pa mi caba cu proyecto, p’asina nos por haya entrada fin di luna. Tabata un aña cu mi a purba di balansa salud di mi yui y stabilidad financiero di mi compania. Salud di Xander sigur ta bin na prome lugar.
Kico bo lo bisa e mamannan cu ta tene tur cos aden djis pa mantene apariencia?
Ta un realidad cu nos cultura facilmente ta husga otro y p’esey hopi hende ta purba di mantene un aparencia cu no ta ‘real’, pa no ‘perde cara’. Pero como empresario y un humano, esaki ta un aspecto cu no ta bon pa bo salud mental. Bo mester ta honesto cu bo mes y cu bo hendenan di confiansa. Hopi biaha nan ta dispuesto pa dunabo un man.
Ora bo a hit rock bottom, ken tabata bo support system?
Mi mayornan y amiganan hopi di serca – un ‘shout out’ sumamente grandi pa nan.
Si bo no tabatin un grupo di apoyo firme, kico bo lo sugeri pa esnan cu no tin un?
Pa papia c’un persona cu por yudabo cu accionan concreto.
Bo tin un buki, podcast of figura inspiracional cu a yudabo durante e proceso di reconstruccion propio?
Buki: Girl on Fire di Cara Alwill Leyba Figura inspiracional: Leila Hormozi
Kico bo por recomenda pa otro mamannan cu ta pasa un situacion similar?
Pa busca ayudo, pasobra solucion tin, den momentonan asina bo por pasa den ansiedad y hasta haya insomnia. E persona cu ta yudabo mester por haci esaki c’un mente trankil y alavez guiabo cu accionan concreto.
Kico bo kier cu e lectornan sa e realidad di lanta un negoshi como un mama soltera y kico pa haci pa no perde bo mes den e proceso?
Pa ta hopi dedica cu bo tempo, proteha bo energia, inverti den bo mes y acepta cu bo prioridadnan ta completemente diferente.
Con ta e realidad diario di un ‘mompreneur’ na Aruba?
Tin dianan cu ta bay ta caotico y otro dianan cu bo ta sumamente agradecido cu bo tin e libertad di por ahusta bo mesun orario di trabou.
Kico bo por bisa pa otro mama cu ta considera e mesun caminda?
Busca informacion, sosten y prepara bo mes mentalmente. Ta consciente cu ‘mompreneur’ no kiermen traha menos cu 8 ora pa dia... bo ta traha sigur mas cu 40 ora pa siman.
Bo ta relaunch bo empresa awe na 2025 c’un mision nobo. Con bo ta spera haci un impacto riba otro mama y famia nan via bo plataforma?
Door di mi experiencia mi a realisa cu no tin un grupo di apoyo profesional cu experiencia pa guia otronan cu ta pasa den mesun situacion.
Bo yiu Xander ta chikito ainda, pero kico el a siñabo den tur esaki?
Di goza di cada fase den bida y no rush nada. Ta agradecido cu cada bendicion pasobra sin salud, bo no tin nada.
Kico abo ta spera cu e siña for di e experiencia ‘ki?
Cu su mama semper tabata banda di dje, te c’un dia e mester puntra su mes ta ki ora mi tabata traha.
Bo mensahe pa Xander den futuro?
Danki pa hacimi e mama di mas fuerte na mundo y pa por lanta un yiu homber mas fuerte ainda.
Di tur e momentonan duro y di duda, cual ta e les principal cu bo a siña?
Pa nunca stop di kere den bo mes.
Y kico bo ta spera pa bo mes mes pa e resto di 2025?
Como profesional, crea un plan di accion di siman pa coordina mi siman como sales, educadora, administradora, business mentor y marketer. Como Mama,Xander tin su orarionan cu mi ta dedica na dje. Den weekend nos ta pasa tempo hunto na lama, speeltuin of simplemente na cas.
Un les of frase di conseho?
Enfoka riba progreso y no perfecion. “Concentrate on 1% better every single day.”
Built with Shorthand